កាលពីថ្ងៃទី ១៧ ខែកក្កដា មន្ទីរដាំដុះ និងការពាររុក្ខជាតិខេត្តឡឹមដុង (ដាឡាត) បានធ្វើការឆ្លើយតបនឹងអ្នកសារព័ត៌មានអំពីការដែលឈ្មួញចិនសម្រុកប្រមូលទិញគ្រាប់ទុរេន ជាហេតុនាំឲ្យតម្លៃផ្លែឈើនេះកើនពី ៥-៦ដង ប្រៀបនឹងតម្លៃលក់កាលពីឆ្នាំទៅម៉ិញ ហើយនេះពិតជារឿង… កម្រមាន !។ …ប្រមាណមួយខែកន្លងមក តម្លៃទុរេននៅដាឡាត បានកើនឡើងដល់ 70.000ដុង/kg – 90.000ដុង/kg (ជាង 4USD/kg) ខ្ពស់ជាងពី ៥ដង-៦ដង ប្រៀបនឹងឆ្នាំ ២០១៧ ។ ឥឡូវក្រុមឈ្មួញវៀតណាមកំពុងដើរប្រមូលទិញគ្រាប់ទុរេនពីគ្រប់ទិសទីក្រុង ប្រទេស ដើម្បីនាំចេញទៅចិន ។
តម្លៃលក់ដុំផ្លែទុរេន ១kg តែ ១០.០០០ដុង (ជិតកន្លះដុល្លារ) តែគ្រាប់វាបានកើនលើស ៩ដង ។
មូលហេតុសំខាន់តាមមន្ទីរដាំដុះខាងលើបកស្រាយថា ដោយនៅតំបន់ខ្ទង់រាបជាប់ព្រំដែនកម្ពុជា (យ៉ាឡាយ ដាក់ឡាក់…) និងតំបន់វាលរាបភាគខាងត្បូង បានប្តូរទៅដាំទុរេន “គ្មានគ្រាប់” គ្រាប់តូចជាអាទិ៍ពូជ Rib , Monthong និង Dona ធ្វើឲ្យពុំមានគ្រាប់ទុរេនពូជល្អសម្រាប់ដាំធ្វើជាគល់សម្រាប់ “ក្លូនផ្សាំ” ។
មន្ទីរនេះឲ្យដឹងទៀតថា ចិនកំពុងមានគំរោងធំ ក្នុងការដាំទុរេននៅប្រទេសកម្ពុជា និងឡាវ ហើយគេត្រូវការគ្រាប់ធុរេនយកទៅធ្វើពូជដាំយកគល់មកផ្សាំ ។ ប៉ុន្តែមន្ទីរដដែលកត់សម្គាល់បន្ថែមថា ទោះបីមានចលនាសម្រុកប្រមូលទិញគ្រាប់ធុរេន ក៏ចិននៅនាំចូលផ្លែទុរេនសម្បើមណាស់ដែរ ។
គ្រាន់តែមកទល់ពេលនេះគេពុំទាន់ដឹងច្បាស់ថា ក្រៅពីយកធ្វើ “ពូជ” តើគ្រាប់ទុរេននៅមានសារៈប្រយោជន៍អ្វីទៀត ។
សូមរំលឹកថា មុននេះ CEN.COM.KH ធ្លាប់បានបកប្រែផ្សាយអត្ថបទដែលអ្នកវិទ្យាសាស្ត្រប្រាប់ថា គ្រាប់ទុរេន មានលក្ខណៈជីវសាស្ត្រដូចជាគ្រាប់កៅឡាក់ ហើយគ្រាប់កៅឡាក់គេយកទៅធ្វើជាឱសថជំនួយព្យាបាលជំងឺកាចសាហាវ ។ គ្រាប់ទុរេនមានប្រសិទ្ធភាពព្យាបាលជំងឺរលាកក្រពះពោះវៀន https://www.cen.com.kh/archives/63586.html ៕ បូព៌ា