ខេត្តព្រះសីហនុ ៖ អភិបាលក្រុងព្រះសីហនុ លោក អ៊ី សុខឡេង បានដឹកនាំមន្ត្រីក្រោមឱវាទ និងមានការចូលរួមពីតំណាងកំពង់ផែស្វយ័តក្រុងព្រះសីហនុ និងមន្ទីរសាធារណៈការ និងដឹកជញ្ជូន ខេត្ត បានចុះទៅពិនិត្យចិញ្ចើមផ្លូវឆ្ពោះទៅតំបន់ទំនប់រលក ស្ថិតនៅភូមិ៣ សង្កាត់លេខ១ ក្រុងព្រះសីហនុ ដើម្បីរៀបចំចិញ្ចើមផ្លូវ ដោយក្រាលការ៉ូឡាមានទទឹង៥ម៉ែត្រ និងបណ្តោយជាង ៧០០ម៉ែត្រ។
លោក អ៊ី សុខឡេង បន្តថា រាល់ការចំណាយរៀបចំក្រាលការ៉ូឡានេះ រដ្ឋបាលក្រុងបានស្នើសុំការឧបត្ថម្ភថវិកាទាំងស្រុងពី ឯកឧត្តម លូ គឹមឈន់ ប្រធានអគ្គនាយកកំពង់ផែស្វយ័តក្រុងព្រះសីហនុរួចហើយ។
លោកអភិបាលក្រុងបន្តថា ក្រោយបានការរៀបចំក្រាលការ៉ូឡារួចរាល់ ក្រុមការងាររដ្ឋបាលក្រុង សង្ឃឹមថាចិញ្ចើមផ្លូវនេះនឹងមានសោភ័ណភាព កាត់បន្ថយការកក់ស្ទះ និងគ្រោះថ្នាក់ចរាចរណ៍ជាយថាហេតុផ្សេងៗ ពិសេសប្រជាពលរដ្ឋ និងភ្ញៀវទេសចរ ងាយស្រួលក្នុងការធ្វើដំណើរឆ្លងកាត់ និងដើរហាត់ប្រាណជាដើម៕ ដែនសីមា
