ការគំរាមកំហែងខាងលើត្រូវបានប្រធានាធិបតី Trump លើកឡើងក្នុងកិច្ចសម្ភាសន៍ជាមួយទូរទស្សន៍CNBC។
ប្រធានាធិបតីអាមេរិក Donald Trump
នៅថ្ងៃទី២០ខែកក្កដា ប្រធានាធិបតីអាមេរិកDonald Trumpប្រកាសថា បានត្រៀមជាស្រេចដើម្បីវាយពន្ធលើបណ្ដាមុខទំនិញនាំចូលពីចិនមានតម្លៃសរុបដល់ទៅ៥០០ពាន់លានដុល្លារ ហើយការគំរាមកំហែងនេះបានធ្វើឱ្យសង្គ្រាមពាណិជ្ជកម្មបច្ចុប្បន្នរវាងខឿនសេដ្ឋកិច្ចធំបំផុតពីរលើពិភពលោកកាន់តែក្ដៅគកុក។លោកTrumpថ្លែងថា៖«យើងខ្ញុំបានកាត់បន្ថយនូវបរិមាណដ៏ធំនៃការបាត់តុល្យភាពពាណិជ្ជកម្មជាមួយចិនហើយខ្ញុំត្រៀមជាស្រេចសម្រាប់ឈានដល់កម្រិត៥០០ពាន់លានដុល្លារ។ មេដឹកនាំអាមេរិករូបនេះអះអាងថា លោកពុំបានធ្វើរឿងនេះដើម្បីគោលបំណងនយោបាយឡើយ ប៉ុន្ដែគឺដើម្បីរឿងត្រឹមត្រូវសម្រាប់ប្រទេសជាតិ។
ក្រុងវ៉ាស៊ីនតោនបានចាប់ផ្ដើមវាយពន្ធទំនិញនាំចូលពីប្រទេសចិនដល់ទៅ២៥ភាគរយលើបណ្ដាមុខទំនិញដែលមានតម្លៃ៣៤ពាន់លានដុល្លារហើយក៏ត្រៀមធ្វើការវាយពន្ធលើកញ្ចប់មុខទំនិញមួយផ្សេងទៀតមានតម្លៃ១៦ពាន់លានដុល្លារ។សេតវិមានក៏នូវបានបន្ដឱ្យក្រសួងពាណិជ្ជកម្មអាមេរិកពិនិត្យនិងរៀបចំបញ្ជីលើមុខទំនិញមានតម្លៃសរុប២០០ពាន់លានដុល្លារសម្រាប់ការវាយពន្ធនាំចូលនៅខែកញ្ញាខាងមុខនេះ។
ការវាយប្រហារតាមរយៈពន្ធរវាងខឿនសេដ្ឋកិច្ចលំដាប់ពិភពលោកទាំងពីរនេះកាន់តែធ្វើឱ្យសង្គ្រាមពាណិជ្ជកម្មពិភពលោកប្រឈមនឹងគ្រោះថ្នាក់កាន់តែខ្លាំងឡើងៗ៕
សូយន