ភ្នំពេញ ៖ រដ្ឋបាលរាជធានីភ្នំពេញ បានចេញសេចក្ដីជូនដំណឹង ស្ដីពី ការទុកដាក់សំរាម នៅក្នុងឱកាសថ្ងៃឈប់សម្រាក បោះឆ្នោតជ្រើសតាំងតំណាងរាស្ត្រ ថ្ងៃទី៩ខែកក្កដា ឆ្នាំ២០១៨។ រដ្ឋបាលរាជធានី បានណែនាំឲ្យប្រជាពលរដ្ឋ ទុកដាក់សំរាមឲ្យបានត្រឹមត្រូវ ក្នុងទីតាំងលំនៅដ្ឋានរបស់ខ្លួន ក្នុងអំឡុងពេលដំណើរការ នៃការបោះឆ្នោត ជ្រើសរើសតំណាងរាស្ត្រ នីតិកាលទី៦ ដោយកម្មករ-កម្មការិនីរបស់ក្រុមហ៊ុនស៊ីទ្រី នឹងឈប់សម្រាកចំនួន៣ថ្ងៃ ចាប់ពីថ្ងៃទី២៨ ដល់ថ្ងៃទី៣០ ខែកក្កដា ឆ្នាំ២០១៨ ដើម្បីចូលរួមក្នុងការបោះឆ្នោត។
នៅសល់តែកម្មករ កម្មការិនីដែលមានទីតាំងបោះឆ្នោតនៅរាជធានីភ្នំពេញ និងខេត្តជិតរាជធានីភ្នំពេញប៉ុណ្ណោះ នៅបម្រើការងារតាមការស្ម័គ្រចិត្ត ដូច្នេះក្នុងអំឡុងពេល៣ថ្ងៃ នៃការឈប់សម្រាកនេះ ការផ្តល់សេវាសម្អាត ប្រមូល និងដឹកជញ្ជូនសំរាមក្នុងរាជធានីភ្នំពេញ មិនបានពេញលេញឡើយ។
សេចក្តីជូនដំណឹងរបស់រដ្ឋបាលរាជធានីភ្នំពេញ នៅថ្ងៃទី២០ ខែកក្កដានេះ បានបញ្ជាក់ថា ដើម្បីថែរក្សាសោភ័ណភាព អនាម័យ បរិស្ថានរាជធានីភ្នំពេញ រដ្ឋបាលរាជធានីភ្នំពេញ សូមអំពាវនាវឲ្យបងប្អូនប្រជាពលរដ្ឋជាម្ចាស់លំនៅឋាន ម្ចាស់អាជីវកម្ម សេវាកម្ម ដែលមានទីតាំងនៅក្នុងរាជធានីភ្នំពេញ ទាំងអស់ សូមមេត្តាយោគយល់ និងអធ្យាស្រ័យ កុំបញ្ចេញសំរាមមកដាក់តាមដងផ្លូវសាធារណៈ ក្នុងអំឡុងពេលថ្ងៃឈប់សម្រាក៣ថ្ងៃ ដោយសូមរក្សាទុកដាក់សំរាមឲ្យបានត្រឹមត្រូវ នៅក្នុងទីតាំងរបស់ខ្លួន រៀងៗខ្លួន ជាបណ្តោះអាសន្នសិន។ រដ្ឋបាលរាជធានីភ្នំពេញ សង្ឃឹមជឿជាក់ថាបងប្អូនប្រជាពលរដ្ឋ ជាម្ចាស់លំនៅឋាន ម្ចាស់អាជីវកម្ម សេវាកម្ម ទាំងអស់ នឹងចូលរួមចំណែកថែរក្សាអនាម័យ បរិស្ថានរាជធានីភ្នំពេញ ឲ្យបានល្អប្រសើរជាមិនខាន៕ ដោយ ៖ កូឡាប
