ខេត្តព្រះសីហនុ ៖ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ កាលពីព្រឹកថ្ងៃសុក្រ ទី២០ ខែកក្កដា ឆ្នាំ២០១៨ បានបើកកិច្ចប្រជុំបន្ទាន់មួយ ដើម្បីត្រួតពិនិត្យផែនការ ការពារសន្តិសុខសុវត្ថិភាព សណ្តាប់ធ្នាប់ នៃការបោះឆ្នោតជ្រើសតាំងតំណាងរាស្ដ្រនីតិកាលទី៦ ដែលនឹងប្រព្រឹត្តទៅ នៅថ្ងៃអាទិត្យទី២៩ ខែកក្កដា ឆ្នាំ២០១៨។
កិច្ចប្រជុំនេះមានការចូលរួមពី លោក លោកស្រី ស្នងការរង នាយ-នាយរងការិយាល័យ អធិការ-អធិការរងនគរបាលក្រុង-ស្រុក និងនាយនគរបាលប៉ុស្តិ៍រដ្ឋបាល ទូទាំងខេត្តព្រះសីហនុ។
នាឱកាសនោះ លោកឧត្តមសេនីយ៍ទោ ជួន ណារិន្ទ បានណែនាំដល់កងកម្លាំងទាំងអស់ ត្រូវស្វែងយល់អំពីច្បាប់បទបញ្ជា នីតិវិធីសម្រាប់ការបោះឆ្នោត និងក្រមសីលធម៌ សម្រាប់ភ្នាក់ងារសន្តិសុខ ការពារ ការិយាល័យ បោះឆ្នោត ឲ្យបានច្បាស់លាស់ និងមានការទទួលខុសត្រូវខ្ពស់។
ព្រមជាមួយគ្នានេះ លោកស្នងការ ក៏បានបែងចែកម៉ូតូម៉ាកស៊ុយស៊ូគីស្មាស ចំនួន ២៩គ្រឿង ជូនប៉ុស្តិ៍នគរបាលរដ្ឋបាល២៩ឃុំ-សង្កាត់ទូទាំងខេត្តព្រះសីហនុ ដែលក្រសួងមហាផ្ទៃផ្តល់ជូន ដើម្បីធ្វេីជាមធ្យោបាយ សម្រាប់បម្រើការងារជំនាញប្រចាំថ្ងៃផងដែរ។
ទន្ទឹមគ្នានេះ លោកវរសេនីយ៍ឯក ឆឹង សុខា នាយការិយាល័យបង្ការ និងពន្លត់អគ្គីភ័យ បានជួយឧបត្ថម្ភមីចំនួន៥០កេសធំ ឬស្មើថវិកាចំនួន១៥០០ដុល្លារ សហរដ្ឋអាមេរិក ជូនដល់ស្នងការដ្ឋាននគរបាលខេត្តព្រះសីហនុ ដើម្បីបែងចែកជូនដល់កងកម្លាំងប្រចាំការ ប្រចាំបញ្ជា នៅស្នងការដ្ឋាន អធិការដ្ឋាននគរបាលក្រុង-ស្រុក និងនគរបាលប៉ុស្តិ៍រដ្ឋបាល នៅតាមមូលដ្ឋាននីមួយៗថែមទៀតផង៕ ដោយ ៖ ដែនសីមា
