ភ្នំពេញ ៖ ក្រសួងធនធានទឹក និងឧតុនិយម នៅថ្ងៃទី២១ខែកក្កដានេះ បានចេញផ្សាយនូវស្ថានភាពទឹកជំនន់ នៅតាមបណ្តារាជធានីខេត្តមួយចំនួនដែលកំពុងរងនូវការជន់លិចដោយទឹកជំនន់ ដែលបង្កឲ្យមានផលប៉ះពាល់ដល់ប្រជាពលរដ្ឋ សត្វ ដំណាំស្រូវ ផងដែរជាពិសេស ទឹកជំនន់នៅក្នុងខេត្តកំពង់ស្ពឺ បានធូរស្រាលបន្តិច ប៉ុន្តែពេលនេះ ទឹកកំពុងហូរធ្លាក់យ៉ាងគំហុក ទៅកាន់ផ្នែកខាងក្រោមតាមស្ទឹងព្រែកត្នោត និងកំពុងគម្រាមកំហែង រាជធានីភ្នំពេញ និងខេត្តកណ្តាល។
ក្រសួងធនធានទឹក បានបញ្ជាក់ថា ៖
១)ទ្វារទឹក ចំនួន ៤ នៃទ្វារទឹកសរុបចំនួន ៦ របស់អាងទឹកខ្ពបត្របែក ស្ថិតក្នុងស្រុកត្រាំកក់ខេត្តតាកែវ ត្រូវបានបិទទាំងស្រុងវិញហើយ គិតត្រឹមព្រឹកថ្ងៃទី ២១ ខែកក្កដា ឆ្នាំ ២០១៨ នេះ បន្ទាប់ពីទឹកក្នុងអាងបានស្រកចុះ ១,១៥ម៉ែត្រ (ធៀបកម្ពស់ទឹកកើនឡើងអតិបរមា កាលពីថ្ងៃទី ១៨) ។
២)ទិដ្ឋភាពចុះអ័ព្ទក្រាស់នៅក្រុងសែនមនោរម្យ ខេត្តមណ្ឌលគិរីនាព្រឹកព្រលឹមថ្ងៃទី ២១ ខែកក្កដា ឆ្នាំ ២០១៨ នេះ ។
៣)ស្ថានភាពទឹកជំនន់ព្រែកស្រែអំបិល ខេត្តកោះកុង ៖ មកដល់ព្រឹកថ្ងៃទី ២១ ខែកក្កដា ឆ្នាំ ២០១៨ នេះ ទឹកជំនន់ព្រែកស្រែអំបិល ស្រុកស្រែអំបិល ផ្នែកខាងលើ (ភូមិបាក់អង្រុត ឃុំដងពែង) បានបន្តស្រកចុះ ០,២០ម៉ែត្រ បន្ថែមទៀត បើធៀបនឹងកម្ពស់ទឹកម្សិលមិញ ។ ដោយឡែកនៅផ្នែកខាងក្រោម (ទីប្រជុំជនផ្សារក្រោម ឃុំស្រែអំបិល) ទឹកបានចាប់ស្រកចុះ ០,១០ ម៉ែត្រ វិញហើយ ។
៤)ស្ថានភាពទឹកជំនន់នៅក្នុងខេត្តកំពត ៖ មកដល់ព្រឹកថ្ងៃទី ២១ ខែកក្កដា ឆ្នាំ ២០១៨នេះ ស្ថានភាពទឹកជំនន់នៅក្នុងខេត្តកំពត បានធូរស្រាលជាបណ្តើរៗហើយ ក្នុងនោះ ទឹកព្រែកកំពង់បាយ បានបន្តស្រកចុះ ០,៣៦ ម៉ែត្រ បើធៀបនឹងថ្ងៃម្សិលមិញ ។ ទឹកនៅតាមបណ្តាព្រែក ស្ទឹងផ្សេងៗទៀត ក៏មានការស្រកចុះព្រមៗគ្នាផងដែរ ។ ឯការធ្លាក់ភ្លៀង ក៏មានការថមថយច្រើន ។
៥)រសៀលថ្ងៃសុក្រ ទី ២០ ខែកក្កដា ឆ្នាំ ២០១៨ មន្ត្រីជំនាញតំណាងក្រសួងធនធានទឹក និងឧតុនិយម និងក្រសួងសេដ្ឋកិច្ច និងហិរញ្ញវត្ថុ បានចុះពិនិត្យ និងវាយតម្លៃការងារកែលម្អ និងថែទាំប្រចាំ នៅប្រព័ន្ធធារាសាស្ត្រ កណ្តាលស្ទឹង ។
៦)ប្រព័ន្ធធារាសាស្ត្រ កណ្តាលស្ទឹង មានទីតាំងលាតសន្ធឹងនៅលើភូមិសាស្ត្រមួយផ្នែកនៃខណ្ឌដង្កោ រាជធានីភ្នំពេញ និងមួយផ្នែកទៀតនៃស្រុកកណ្តាលស្ទឹង ខេត្តកណ្កាល ។ ប្រព័ន្ធនេះ ត្រូវបានសាងសង់ឡើង ក្នុងគោលបំណងប្រើប្រាស់ជាប្រព័ន្ធគ្រប់គ្រងទឹកជំនន់ស្ទឹងព្រែកត្នោតផង កាត់បន្ថយជំនន់ដែលគំរាមកំហែងរាជធានីភ្នំពេញផង និងជាប្រព័ន្ធធារាសាស្ត្រ ដែលមានលទ្ធភាពស្រោចស្រពលើផ្ទៃដីស្រូវវស្សា ចំនួន ៨.៤០០ ហិកតា និងស្រូវប្រាំង ចំនួន ១.០០០ ហិកតា ផង ។
៧)ស្ថានភាពទឹកជំនន់ព្រែកស្រែអំបិល ស្រុកស្រែអំបិល មកដល់ល្ងាចថ្ងៃទី ២០ ខែកក្កដា ឆ្នាំ ២០១៨ នេះ ទឹកនៅផ្នែកខាងលើ (ភូមិបាក់អង្រុត ឃុំដងពែង) បានស្រកចុះប្រមាណ ០,១០ ម៉ែត្រ បើធៀបនឹងកម្ពស់ទឹកព្រឹកមិញ ។ ដោយឡែកទឹកនៅផ្នែកខាងក្រោម (ទីប្រជុំជនផ្សារក្រោម ឃុំស្រែអំបិល) ទឹកនៅនឹងថ្កល់បើធៀបនឹងកម្ពស់ទឹកព្រឹកមិញ ។ សូមបញ្ជាក់ផងដែរថា នៅក្នុងភូមិសាស្ត្រស្រុកស្រែអំបិល គិតចាប់ពីម៉ោងប្រមាណ ៩ ព្រឹក មកដល់វេលាល្ងាចនេះ ពុំទាន់មានភ្លៀងធ្លាក់បន្ថែមទេ ។
៨)ទ្វារទឹករលាំងជ្រៃ ត្រូវបានទម្លាក់ចុះមួយកម្រិតបន្ថែមទៀត ៖ នៅម៉ោង ៣:៣០ នាទីរសៀល ថ្ងៃទី ២០ ខែកក្កដា ឆ្នាំ ២០១៨ នេះលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានបញ្ជាឲ្យក្រុមការងារ ទំលាក់ទ្វារទឹករលាំងជ្រៃ ចំនួន ២ ទ្វារចុះបន្ថែម ចំនួន ១ ម៉ែត្រ ទៀត ។ ដូចនេះ ទ្វារទឹករលាំងជ្រៃ ចំនួន ២ ទ្វារ ត្រូវបានទម្លាក់ចុះបាន ចំនួន ៣ ម៉ែត្រ បន្ទាប់ពីស្ថានភាពទឹកជំនន់នៅផ្នែកខាងលើ មានសភាពកាន់តែធូរស្រាល ។
សូមជម្រាបផងដែរថា ទ្វារទឹករលាំងជ្រៃ មានសរុបចំនួន ៥ ទ្វារ ដោយទ្វារនីមួយៗមានទទឹង ១២ ម៉ែត្រ និងកម្ពស់ ៧ ម៉ែត្រ ។
មន្ត្រីបច្ចេកទេសក្រសួងធនធានទឹក និងឧតុនិយម កំពុងអន្តរាគមន៍ទប់ទល់នឹងជំនន់ស្ទឹងព្រែកត្នោត នៅចំណុចសង្កាត់ព្រៃវែង ខណ្ឌដង្កោ ដើម្បីការពារកុំឱ្យទឹកជំនន់ស្ទឹងព្រែកត្នោត ហូរចូលរាជធានីភ្នំពេញ ។
នៅរសៀលថ្ងៃសុក្រ ទី ២០ ខែកក្កដា ឆ្នាំ ២០១៨ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយមកំពុងដឹកនាំកម្លាំងទប់ទល់ ជាមួយនឹងទឹកជំនន់ស្ទឹងព្រែកត្នោត ដើម្បីការពារភូមិសាស្ត្ររាជធានីភ្នំពេញ និងខេត្តកណ្តាល ។
សូមបញ្ជាក់ជូនថា ទោះបីជាទឹកជំនន់នៅក្នុងខេត្តកំពង់ស្ពឺបានធូរស្រាលបន្តិច ប៉ុន្តែពេលនេះ ទឹកកំពុងហូរធ្លាក់យ៉ាងគំហុកទៅកាន់ផ្នែកខាងក្រោម តាមស្ទឹងព្រែកត្នោត និងកំពុងគម្រាមកំហែងរាជធានីភ្នំពេញ និងខេត្តកណ្តាល ។ ចំពោះមុខបញ្ហានេះ លោករដ្ឋមន្ត្រីបានដឹកនាំកម្លាំងផ្ទាល់ ចុះទប់ទល់ជាមួយនឹងទឹកជំនន់នៅតាមទំនប់សណ្តរស្ទឹងព្រែកត្នោត ដើម្បីការពារកុំឱ្យមានការហូរច្រោះ លិចចូលតំបន់ទំនាបក្នុងភូមិសាស្ត្ររាជធានីភ្នំពេញ និងខេត្តកណ្តាល ។
ក្នុងឱកាសនេះដែរ លោករដ្ឋមន្ត្រី បានរៀបចំឱ្យមានក្រុមប្រចាំការ ២៤ម៉ោង លើ ២៤ ម៉ោង សម្រាប់ប្រចាំការ និងតាមដានដើម្បីធានានូវសុវត្ថិភាពជូនបងប្អូនប្រជាពលរដ្ឋ ។ លោករដ្ឋមន្ត្រី បានបញ្ជាក់ថា កម្សួលទឹកនេះ ត្រូវការរយៈពេលប្រមាណ ១០-១២ម៉ោងទៀត ទើបបានធូរស្រាលទៅវិញ ។
ក្រសួងធនធានទឹក និងឧតុនិយម ក៏ចេញផ្សាយនូវព្រឹត្តិបត្រព័ត៌មាន និងព្យាករណ៍កម្ពស់ទឹកជំនន់ សម្រាប់ថ្ងៃទី ២១ ខែកក្កដា ឆ្នាំ ២០១៨ ៖
ដោយ៖បញ្ញាស័ក្តិ
