ខេត្តព្រះសីហនុ ៖ ប្រធានមន្ទីរពេទ្យបង្អែកខេត្តព្រះសីហនុ លោកវេជ្ជបណ្ឌិត សេង ណុង មានប្រសាសន៍ថា ចាប់ពីពេលនេះតទៅ ប្រសិនបើមានប្រជាពលរដ្ឋរងគ្រោះដោយគ្រោះថ្នាក់ចរាចរណ៍នៅតាមដងផ្លូវនានា ក្នុងមូលដ្ឋានខេត្តព្រះសីហនុ នឹងទទួលបានសេវាដឹកជញ្ជូន មកកាន់មន្ទីរពេទ្យបង្អែក ដើម្បីសង្គ្រោះដោយឥតគិតប្រាក់។
លោកវេជ្ជបណ្ឌិត សេង ណុង បញ្ជាក់ថា រថយន្ត របស់ក្រុមសង្គ្រោះបន្ទាន់៧១១ នៃទីបញ្ជាការដ្ឋានកងពលតូចលេខ៧០ មានរថយន្តសង្គ្រោះចំនួន៣គ្រឿង ប្រចាំការនៅសាលាហ្វឹកហ្វឺនសង្គ្រោះមិត្តភាពកម្ពុជា-ជប៉ុន មានទីតាំងនៅភូមិ៣ សង្កាត់១ ក្រុងព្រះសីហនុ បានសហការជាមួយមន្ទីរពេទ្យបង្អែកខេត្តព្រះសីហនុ រង់ចាំបំរើសេវាដឹកជញ្ជូនប្រជាពលរដ្ឋ ដែលរងគ្រោះថ្នាក់ចរាចរណ៍ នៅតាមដងផ្លូវនានា ដឹកមកកាន់មន្ទីរពេទ្យខេត្ត ដោយឥតគិតប្រាក់។
លោក សេង ណុង ប្រកាសលេខទូរស័ព្ទទំនង មកកាន់រថយន្តសង្គ្រោះ តាមរយៈលេខ៖ ០៩៦ ៩២៥ ៤៤៤០ និង០៨៨ ៧៧៧ ១១១៥៕ ដែន អយុធ្យា