ខេត្តព្រះសីហនុ៖ រដ្ឋបាលខេត្តព្រះសីហនុ បានចេញសេចក្តីជូនដំណឹង ជម្រាបជូនដល់អាណាព្យាបាល និងសិស្សានុសិស្ស ដែលជាបេក្ខជន ត្រូវចូលរួមប្រឡងសញ្ញបត្រមធ្យមសិក្សាទុតិយភូមិ ឬបាក់ឌុប នាសម័យប្រឡងថ្ងៃទី២០ ខែសីហា ឆ្នាំ២០១៨ទាំងអស់ឲ្យបានជ្រាបថា ក្នុងគោលបំណងដោះស្រាយការប្រឈមរបស់ក្មួយៗជាបេក្ខជនប្រឡង ក៏ដូចជាសម្រាលការលំបាក របស់អាណាព្យាបាល និងសិស្សានុសិស្ស ដែលមកពីបណ្តាស្រុកឆ្ងាយៗ រួមមានស្រុកកំពង់សិលា និងស្រុកស្ទឹងហាវ ដែលពុំមានលទ្ធភាពគ្រប់គ្រាន់ក្នុងការដោះស្រាយការស្នាក់នៅក្នុងកំឡុងពេលប្រឡងនេះ រដ្ឋបាលខេត្តបានត្រៀមកន្លែងស្នាក់នៅ តាមបណ្តាផ្ទះសំណាក់ និងសណ្ឋាគារមួយចំនួនក្នុងទីរួមស្រុកព្រៃនប់ និងក្រុងព្រះសីហនុ សម្រាប់ផ្តល់ជូនអាណាព្យាបាល និងសិស្សា នុសិស្សដោយឥតគិតថ្លៃ។
សេចក្តីជូនដំណឹង ចុះថ្ងៃទី២០ ខែកក្កដា ឆ្នាំ២០១៨ មានចុះហត្ថលេខា និងបោះត្រា ឯកឧត្តម យន្ត មីន អភិបាលខេត្តព្រះសីហនុ បានបញ្ជាក់ថា សិស្សានុសិស្ស ដែលមកពីសាលាវិទ្យាល័យ ហ៊ុន សែន កំពង់សិលា និងសាលាវិទ្យាល័យ ហ៊ុន សែន កែវផុស គឺស្នាក់នៅទីប្រជុំជនស្រុកព្រៃនប់។ ដោយឡែកសិស្សានុសិស្ស មកពីសាលាវិទ្យាល័យស្ទឹងហាវ ស្នាក់នៅទីរួមក្រុងព្រះសីហនុ។
ករណីនេះ រដ្ឋបាលខេត្តព្រះសីហនុ បានស្នើឲ្យអាណាព្យាបាល និងសិស្សានុសិស្ស ដែលមានបំណងស្នាក់នៅផ្ទះសំណាក់ ឬសណ្ឋាគារ ដែលត្រៀមរៀបចំខាងលើនេះ សូមរួសរាន់ទាក់ទង និងមកចុះឈ្មោះ នៅសាលាខេត្តព្រះសីហនុរៀងរាល់ម៉ោងធ្វើការ ឬទាក់ទងផ្ទាល់ជាមួយ លោកស្រី នួន សុភាព នាយកស្តីទី ទីចាត់ការហិរញ្ញវត្ថុសាលាខេត្តតាមរយៈទូរស័ព្ទលេខ៖ ០១៦ ៨៣ ៦១ ៦១ និងលោក កែវ ឡាយ ប្រធានមន្ទីរអប់រំ យុវជន និងកីឡាខេត្តព្រះសីហនុតាមរយៈទូរស័ព្ទ៖ ០១៦/០១២ ៩៥៥ ០៨០៕ ដែនសីមា