តាម Sputniknews ដែលដកស្រង់ព័ត៌មាន ឱ្យដឹងថា ក្នុងជំនួបដោយឡែកជាមួយទីប្រឹក្សា ប្រធានាធិបតីអាមេរិកDonald Trump បាបបង្ហាញនូវការអស់សង្ឃឹម ព្រោះពុំទាន់ឃើញមានការលូតលាស់អ្វីមួយភ្លាមៗក្រោយជំនួបកំពូលជាមួយមេដឹកនាំKim Jong-un។
ប្រធានាធិបតីអាមេរិក Donald Trump
កាសែតWashington Post ដែលដកស្រង់ប្រភពពីសេតវិមាននិងក្រសួងការបរទេសអាមេរិកឱ្យដឹងថា ទោះបីជាប្រធានាធិបតីTrump ស្ងើចសរសើរដោយចំហអំពីជោគជ័យក្នុងជំនួបជាមួយមេដឹកនាំKim ប៉ុន្ដែលោកក៏បានសម្ដែងកង្វល់យ៉ាងសម្ងាត់អំពីការពុំឃើញមានភាពលូតលាស់ឆាប់រហ័សណាមួយដូចដែលអ្នកវិភាគជាច្រើនបានរំពឹងទុក។
កាសែតខាងលើបានឱ្យដឹងថា លោកTrump បានបញ្ជាឱ្យបុគ្គលិកសេតវិមានរាយការណ៍ជូនលោកប្រចាំថ្ងៃអំពីការវិវឌ្ឍនៃកិច្ចចរចាទាំងឡាយ អំពីការរំសាយនុយក្លេអ៊ែរជាមួយកូរ៉េខាងជើង។
តាមWashington Post អាមេរិកបានសម្លឹងឃើញថា ប៉ុន្មានសប្ដាហ៍ក្រោយជំនួបកំពូលអាមេរិក-កូរ៉េខាងជើងដែលប្រព្រឹត្តទៅនៅសិង្ហបុរី ភាគីកូរ៉េខាងជើងដាច់ខាតគេចចេញអំពីជំនួបមានលក្ខណៈស្ថាបនាជាមួយក្រុងWashington ក្នុងនោះមានទាំងការដែលក្រុងព្យុងយ៉ាងលុបចោលជំនួបមួយចំនួនជាមួយភាគីអាមេរិក ហើយសំណូមពរចំនួនទឹកប្រាក់មួយច្រើនជាងមុន។
គួររម្លឹកថា ក្នុងជំនួបកំពូលជាប្រវត្តិសាស្ដ្រកាលពីថ្ងៃទី១២ ខែមិថុនា នៅសិង្ហបុរី មេដឹកនាំទាំងពីរបានព្រមព្រៀងគ្នា ដោយក្រុងព្យុងយ៉ាងរំសាយចោលនុយក្លេអ៊ែរដើម្បីប្ដូរយកការបញ្ឈប់សមយុទ្ធយោធារវាងអាមេរិកនិងកូរ៉េខាងត្បូង ក៏ដូចជាការលុបចោលជាជំហានៗនូវទណ្ឌកម្មលើកូរ៉េខាងជើង។
ប៉ុន្ដែកិច្ចប្រជុំនេះពុំបានកំណត់ច្បាស់ពេលវេលានៃការចាប់ផ្ដើមនិងបញ្ចប់ដំណើរការរំសាយនុយក្លេអ៊ែររបស់កូរ៉ខាងជើងឡើយ៕
សូយន