ខេត្តស្វាយរៀង ៖ លោក ម៉ែន វិបុល អភិបាលខេត្តស្វាយរៀង នាព្រឹកថ្ងៃចន្ទ ១១កើត ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៣ ខែកក្កដា ឆ្នាំ២០១៨នេះ បានធ្វើការជម្រុញឱ្យមន្ត្រីគ្រប់មន្ទីរ-អង្គភាព អាជ្ញាធរក្រុង ស្រុក និងកងកម្លាំងប្រដាប់អាវុធទាំងអស់នៅក្នុងខែកក្កដានេះ ត្រូវអនុវត្តតួនាទីភារកិច្ចផ្ដល់សេវាសាធារណៈជូនប្រជាពលរដ្ឋ និងការថែរក្សាការពារសន្តិសុខ សុវត្ថិ ភាព និងសណ្ដាប់សាធារណៈជាទូទៅក្នុងខេត្ត រួមទាំងដំណើរការការឃោសនាបោះឆ្នោត ឲ្យប្រព្រឹត្តទៅបានល្អប្រសើរ ដោយគ្មានបាតុភាពអសកម្មណាមួយកើតឡើង ។
លោកអភិបាលខេត្តបានមានប្រសាសន៍ដូច្នេះក្នុងឱកាសដែលលោកបានអញ្ជើញជាអធិបតីនៅក្នុងកិច្ចប្រជុំបូកសរុបលទ្ធផលការងារប្រចាំខែកក្កដា និងលើកទិសដៅការងារខែសីហា ឆ្នាំ២០១៨ របស់រដ្ឋបាលខេត្ត ដែលពិធីនេះបានប្រព្រឹត្តទៅនាសាលប្រជុំសាលាខេត្ត ស្វាយរៀង។ ក្នុងកិច្ចប្រជុំនេះ ក៍៍មានការអញ្ជើញចូលរួមផងដែរពីសំណាក់អស់លោកជាអភិបាលរងខេត្ត លោកនាយក នាយករងរដ្ឋបាលសាលាខេត្ត លោកតំណាងប្រធានសាលាដំបូងខេត្ត លោកស្នងការរងនគរបាលខេត្ត លោកមេបញ្ជាការរងតំបន់ប្រតិបត្តិសឹករងស្វាយរៀង លោកមេបញ្ជាការរងកងរាជអាវុធហត្ថខេត្ត លោកសាកលវិទ្យាធិការរងសាកលវិទ្យាល័យស្វាយរៀង លោក លោកស្រីប្រធានមន្ទីរ-អង្គភាពនានាជុំវិញខេត្ត លោកអភិបាលក្រុង ស្រុក លោក លោកស្រីនាយកទីចាត់ការ/ប្រធានអង្គភាពសាលាខេត្ត ប្រធានច្រកទ្វារព្រំដែន និងមន្ត្រីពាក់ព័ន្ធមួយចំនួន ។
មានប្រសាសន៍ក្នុងឱកាសនោះ លោកម៉ែន វិបុល អភិបាលខេត្ត ស្វាយរៀងក៍បានថ្លែងនូវការអរគុណ ចំពោះគ្រប់មន្ទីរ-អង្គភាព អាជ្ញាធរក្រុង ស្រុក និងកងកម្លាំងប្រដាប់អាវុធទាំងអស់ ដែលនៅក្នុងខែកក្កដានេះ បានអនុវត្តតួនាទីភារកិច្ចផ្ដល់សេវាសាធារណៈជូនប្រជាពលរដ្ឋ និងការថែរក្សាការពារសន្តិសុខ សុវត្ថិភាព និងសណ្ដាប់សាធារណៈជាទូទៅក្នុងខេត្ត រួមទាំងដំណើរការការឃោសនា បោះឆ្នោត ឲ្យប្រព្រឹត្តទៅបានល្អប្រសើរ ដោយគ្មានបាតុភាពអសកម្មណាមួយកើតឡើង ។
ជាមួយគ្នានេះដែរ លោកអភិបាលខេត្ត បានមានប្រសាសន៍ផ្ដាំផ្ញើដល់មន្ទីរអង្គភាព រដ្ឋបាលក្រុង ស្រុក និងកងកម្លាំងពាក់ព័ន្ធទាំងអស់ ៖
-ត្រូវបន្តបន្តខិតខំអនុវត្តតួនាទី ភារកិច្ចក្នុងការបម្រើសេវាជូនប្រជាពលរដ្ឋ និងការថែរក្សាការពារសន្តិសុខ សណ្តាប់ធ្នាប់សង្គម និងសុវត្ថិភាពនៅក្នុងខេត្តឲ្យបានកាន់តែល្អប្រសើរថែមទៀត ជាពិសេសដំណើរការរៀបចំការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ទាំងនៅក្នុងពេលឃោសនា ពេលបោះឆ្នោត ពេលរាប់សន្លឹកឆ្នោត និងក្រោយពេលបោះឆ្នោត ។
-អាជ្ញាធរក្រុង ស្រុក ត្រូវបន្តអប់រំ ផ្សព្វផ្សាយ និងណែនាំដល់ប្រជាពលរដ្ឋឲ្យមានការប្រុងប្រយ័ត្នខ្ពស់ ចំពោះគ្រោះថ្នាក់សង្គមផ្សេងៗ និងគ្រោះមហន្តរាយធម្មជាតិ ដូចជាអគ្គីភ័យ ខ្យល់កន្ត្រាក់ ជំនន់ទឹកភ្លៀង និងរន្ទះ ជាដើម ជាពិសេសនៅពេលមានភ្លៀងធ្លាក់ ព្រម ទាំងត្រូវត្រៀមរៀបចំទីទួលសុវត្ថិភាព និងចុះអន្តរាគមន៍ជួយសង្គ្រោះឲ្យបានទាន់ពេលវេលា ។
-មន្ទីរកសិកម្ម រុក្ខាប្រមាញ់ និងនេសាទខេត្តត្រូវបន្តជំរុញប្រជាពលរដ្ឋឲ្យអនុវត្តការបង្កបង្កើនផលស្រូវរដូវវស្សា ឲ្យបានទាន់ពេល វេលា និងទទួលបានទិន្នផលខ្ពស់ ព្រមទាំងត្រូវចាត់វិធានការត្រៀមបង្ការសត្វល្អិតបំផ្លាញដំណាំស្រូវ និងដំណាំផ្សេងៗ និងនៅពេលមានទឹកជំនន់កើតឡើង ។
-មន្ទីរធនធានទឹក និងឧតុនិយមខេត្ត ត្រូវបន្តតាមដានអំពីស្ថានភាពអាកាសធាតុ ទឹកភ្លៀង និងកម្ពស់ទឹកទន្លេក្នុងខេត្ត ដើម្បីមានវិធានការការពារ និងដោះស្រាយបានទាន់ពេលវេលានៅមានប្រធានស័ក្តិណាមួយកើតឡើង ។
-រដ្ឋបាលក្រុង-ស្រុក ត្រូវធ្វើការផ្សព្វផ្សាយឲ្យបានទូលំទូលាយ និងអនុវត្តឲ្យបានម៉ឺងម៉ាត់នូវសេចក្ដីណែនាំរបស់រាជរដ្ឋាភិបាល ស្ដីពីការផ្អាកលក់ដូរ និងពិសាគ្រឿងស្រវឹងនៅមួយថ្ងៃមុនថ្ងៃបោះឆ្នោត និងថ្ងៃបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ៕ វ៉ៃកូ