គណបក្សកាន់អំណាចប្រទេសស៊ីមបាវ៉េ បានស្នើឲ្យមេដឹកនាំរបស់ខ្លួន គឺលោកប្រធានាធិបតី រ៉ូបឺត មូហ្គាបេ (Robert Mugabe) ចុះចេញពីតំណែង។ ការស្នើនេះបានធ្វើឡើងនៅថ្ងៃដែលលោក មូហ្គាបេបានលេចមុខជាសាធារណៈលើកដំបូង ចាប់តាំងពីប្រទេសរបស់លោកធ្លាក់ចូលក្នុងវិបត្តនយោបាយ។
រចនាសម្ព័ន្ធរបស់បក្សកាន់អំណាច ZANU-PF នៅតាមបណ្តាលខេត្តចំនួន ១០នៃប្រទេសស៊ីមបាវ៉េ បានជួបប្រជុំគ្នានៅថ្ងៃសៅរិ៍នេះ និងបានស្នើឲ្យលេខាធិការបក្សទី ១របស់ខ្លួន គឺលោក ប្រធានាធិបតី រ៉ូបឺត មូហ្គាបេ លាលែងពីតំណែង។ ពួកគេក៍បានស្នើឲ្យមានការលាលែងរបស់ស្ត្រីទី ១របស់មេដឹកនាំស៊ីមបាវ៉េផងដែរ គឺអ្នកស្រី Grace Mugabe ដែលជាលេខាធិការសម្ព័ន្ធស្ត្រី។
លោក មូហ្គាបេ បានលេចមុខជាសាធារណៈលើកដំបូងដើម្បីចូលរួមពិធីចែកសញ្ញាប័ត្រនៅក្នុងរដ្ឋធានី ហ៉ារ៉ារ៉េ (Harare) បន្ទាប់ពីមានការឃុំខ្លួននៅផ្ទះមួយរយៈដោយយោធារបស់ប្រទេស។ ការលេចមុខរបស់លោកគឺត្រូវបានគេជឿជាក់ថា គាត់មិនមែនជាអ្នកដឹកនាំប្រទេសស៊ីមបាវ៉េទៀតឡើយ។
លោកបានដឹកនាំប្រទេសស៊ីមបាវ៉េអស់រយៈពេល ៣៧ឆ្នាំមកហើយ។ គាត់ត្រូវបានយោធាចាប់ខ្លួន និងឃុំខ្លួននៅផ្ទះចាប់តាំងពីមានរដ្ឋប្រហារយោធាកាលពីថ្ងៃពុធកន្លងទៅនេះ បន្ទាប់ពីលោកព្យាយាមរៀបចំប្រពន្ធរបស់គាត់គឺអ្នកស្រី Grace Mugabe ដើម្បីបន្តតំណែងពីគាត់ បណ្តាលឲ្យមានទំលោះផ្ទៃក្នុងយ៉ាងខ្លាំង៕ សុភ័ក្ត្រ
