ប៉ូលិសឥណ្ឌាកំពុងដំណើរការ ជីកកកាយដីធ្លីនៅក្រោមមជ្ឈមណ្ឌលគាំពារក្មេងស្រី បន្ទាប់ពីមានការចោទប្រកាន់ថា ៖ ក្មេងស្រីជាង ៤០នាក់ បានរងការរំលោភ ហើយជនរងគ្រោះម្នាក់បានស្លាប់នៅទីនេះ ។
បាតុកម្មប្រឆាំងការចាប់រំលោភនៅឥណ្ឌា ។
ជាក់ស្តែងប៉ូលិសបានដំណើរការជីកកកាយដីធ្លី នៅមជ្ឈមណ្ឌលគាំពារក្មេងស្រី នាទីក្រុង Muzaffarpur រដ្ឋ Bihar កាលពីថ្ងៃទី ២៣ ខែកក្កដា តាមបទបញ្ជារបស់តុលាការដើម្បីថតជាភស្តុតាងបញ្ជាក់ បន្ទាប់ពីក្មេងស្រីម្នាក់បាននិយាយថា នាងបានឃើញបុគ្គលិកម្នាក់នៅមជ្ឈមណ្ឌលនេះបានវាយមនុស្សម្នាក់រហូតដល់ស្លាប់ ។
អគ្គអធិការប៉ូលិស Sumil Kumar ពោលថា ៖ “យើងខ្ញុំកំពុងត្រួតពិនិត្យរកសសាកសព” ។
រឿងអាស្រូវនេះ បានត្រូវគាស់កកាយចេញនៅខែឧសភា កន្លងមក បន្ទាប់ពីវិទ្យាស្ថានសង្គមមួយមានស្នាក់ការនៅ Mumbai បានប្រកាសជាសាធារណៈនូវរបាយការណ៍លំអិតពីការរំលោភបំពាន និងជិះជាន់នៅមជ្ឈមណ្ឌលខាងលើនេះ ។
របាយការណ៍អមដោយសម្តីសាក្សីឲ្យដឹងថា ក្មេងៗនៅទីនោះបានរងទទួលនូវការវាយធ្វើបាប ហើយយ៉ាងតិចមានក្មេង ២៩នាក់ ក្នុងវ័យពី ៧ឆ្នាំ-១៧ឆ្នាំ បានរងការរំលោភ ខណៈពេលក្មេងៗដទៃទៀត កំពុងរង់ចាំរបាយការណ៍ត្រួតពិនិត្យរួចបញ្ជូនមក ។
ក្មេងស្រីមួយចំនួនបាននិយាយថា ពួកគេត្រូវបង្ខំឲ្យដេកស្រាតជាមួយមេដឹកនាំមជ្ឈមណ្ឌល ហើយរងការរំលោភច្រើនខែមកហើយ ។
មានមនុស្ស ១០នាក់ ដែលធ្វើការនៅទីនោះ និងមន្ត្រីដទៃទៀត ដែលទាក់ទិនដល់ទង្វើស្មោកគ្រោកខាងលើ ត្រូវបានចាប់ខ្លួន ។
រឿងនេះបាននឹងកំពុងបន្ទុះភ្លើងកំហឹងរបស់មហាជននៅប្រទេសមួយ ដែលការរំលោភ ហើយសម្លាប់កើតមាន… ពុំស្វាងសោះ ៕ ចន្ទ្រា