នៅថ្ងៃទី២៤ ខែកក្កដា ក្រុមហ៊ុនសំណង់កូរ៉េខាងត្បូង SK E&C ដែលជាក្រុមហ៊ុនមួយក្នុងចំណោមក្រុមហ៊ុនចូលរួមស្ថាបនាវារីអគ្គិសនី Xe Pien-Xe Nam Noy ឡាវបានបង្កើតក្រុមដោះស្រាយវិបត្តិដើម្បីប្រតិកម្មជាមួយព្រឹត្ដិការណ៍ខាងលើ។
ប្រធានក្រុមហ៊ុនSK E&C លោកAhn Jae-hyun រួមនឹងថ្នាក់ដឹកនាំក្រុមហ៊ុនបានចាកចេញពីកូរ៉េខាងត្បូងមកឡាវដើម្បីវាយតម្លៃពីចំណុចខូចខាតនិងជំនួយគាំទ្រដល់យុទ្ធនាការសង្គ្រោះនៅទីនោះ។
ក្រុមហ៊ុននេះឱ្យដឹងថា នៅការដ្ឋានខាងលើកំពុងរងការលិចលង់ ហើយការបាក់ទំនប់ផ្ដើមចេញពីកម្រិតទឹកភ្លៀងដែលលើស ពីធម្មតាដល់ទៅបីដង។ ចំពោះមុខក្រុមហ៊ុនបានជួយដល់យុទ្ធនាការសង្គ្រោះដល់រដ្ឋាភិបាលឡាវ ដោយជួលឧទ្ធម្ភាគចក្រពីប្រទេសថៃមកសង្គ្រោះអ្នកកំពុងជាប់គាំងដោយសារទឹកជន់លិច។
ដោយឡែកក្រុមហ៊ុនថាមពលអគ្គិសនី Ratchaburi របស់ថៃ ដែលមានចំណែកចូលរួមក្នុងគ្រោងការណ៍ស្ថាបនាវារីអគ្គិសនីនេះជាមួយកូរ៉េខាងត្បូងនិងឡាវ ក៏បានបើកសន្និសីទកាសែតដើម្បីរាយការណ៍អំពីការបាក់ទំនប់បណ្ដាលឱ្យមនុស្សជាច្រើនស្លាប់និងបាត់ខ្លួនហើយតំបន់មួយយ៉ាងធំធេងត្រូវបានជន់លិច។តាមរបាយការណ៍ក្នុងសន្និសីទកាសែតឱ្យដឹងថា នៅយប់ថ្ងៃទី២៣ខែកក្កដា ទំនប់ D ក្នុងគម្រោងមានទទឹង៨ម៉ែត្រ បណ្ដោយ៧៧០ម៉ែត្រ និងកម្ពស់១៦ម៉ែត្រ ដែលសម្រាប់ជួយដល់ចរន្ដបញ្ជូនទឹកនៃបឹងSepien ត្រូវបានបាក់រលំ ធ្វើឱ្យទឹកបុកធ្លាក់ទៅតំបន់ខាងក្រោមនិងទន្លេចម្ងាយពីទំនប់នេះ៥គីឡូម៉ែត្រ។
បើតាមរបាយការណ៍ដដែលទំនប់វារីអគ្គិសនី Xe Pien-Xe Nam Noyបានសាងសង់សម្រេច៩០ភាគរយហើយ ហើយនឹងសម្ពោធដាក់ឱ្យប្រើប្រាស់នៅឆ្នាំ២០១៩ ប៉ុន្ដែចៃដន្យបានទទួលការខូចខាតយ៉ាងធ្ងន់ធ្ងរព្រោះតែកម្រិតទឹកបណ្ដាល មកពីព្យុះភ្លៀងច្រើនថ្ងៃកើនឡើងលើសធម្មតាដល់ទៅបីដង៕
សូយន
