កាលពីចុងសប្ដាហ៍មុន អ្នកលេងអ៊ិនធើណេតថៃមានការភ្ញាក់ផ្អើលយ៉ាងខ្លាំង ពេលដែលវីដេអូនៃកូនក្រមុំដែលមានការឈឺចាប់ម្នាក់ បានប្រកាសនៅចំពោះមុខភ្ញៀវចូលរួមមង្គលការរបស់នាងថា កូនកំលោះរបស់នាងមិនដឹងនៅទីណាទេ រកមិនឃើញ បានចាប់ផ្តើមរាលដាលនៅលើប្រព័ន្ធផ្សព្វផ្សាយសង្គម ។
យោងតាមទស្សនាវដ្តី Straits Times Jutathip Nimnual អាយុ ២៤ ឆ្នាំ នឹងត្រូវរៀបការជាមួយ Phakin Junjerm អាយុ 22 ឆ្នាំ នៅថ្ងៃអាទិត្យទី២២ ខែកក្កដា ប៉ុន្តែ ស្រាប់តែនៅថ្ងៃដ៏ពិសេសនោះ កូនកំលោះពុំបង្ហាញវត្តមាន និងត្រូវបានគេបញ្ចេញឲ្យដឹងថា កូនកំលោះនេះពិតណាស់ជាមានស្នេហ៍សម្ងាត់ ។
ទោះបីជាយ៉ាងនេះក្តី ក៏ Phakin បានទទូចថា គាត់នឹងបន្ដរៀបអាពាហ៍ពិពាហ៍ជាមួយ Jutathip ។ ប៉ុន្តែ គាត់បានសារភាពប្រាប់នាងកាលពីថ្ងៃសុក្រទី២០ ខែកក្កដា ថាគាត់មិនអាចមានលទ្ធភាពសម្រាប់ថ្លៃបណ្ណាការ 200,000 បាត (ជិត ៦០០០ ដុល្លារអាមេរិក) ជាសាច់ប្រាក់ និងគ្រឿងអលង្ការ 200,000 បាត ដែលមានទឹកប្រាក់សរុបចំនួន 400,000 បាត (ជាង ១១,០០០ ដុល្លារអាមេរិក) ។
នៅថ្ងៃសៅរ៍ទី២១ ខែកក្កដា សាច់ញាតិរបស់កូនក្រមុំបានផ្តល់ឱ្យកូនកំលោះ 140,000 បាត ដើម្បីជួយគាត់ឱ្យបង់បង្គ្រប់ ។ ទោះជាយ៉ាងណាក៏ដោយ កូនកំលោះមិនអាចរកឃើញទេ នៅកៀកថ្ងៃមង្គលការទាំងស្រុងទៅហើយ ។
សំណាងណាស់ ដែលសាច់ញាតិរបស់ Phakin បានរកឃើញគាត់នៅយប់នោះ ហើយបានធានានឹង Jutahip និងគ្រួសាររបស់នាងថា គាត់នឹងមានវត្តមាននៅទីនោះសម្រាប់ពិធីមង្គលការនៅថ្ងៃស្អែក ។ ទោះជាយ៉ាងណាក៏ដោយ កូនក្រមុំមានការសោកស្តាយយ៉ាងខ្លាំង នៅពេលមង្គលការរបស់នាងមិនបានជោគជ័យនៅថ្ងៃអាទិត្យ ទី២២ ខែកក្កដា ។
គ្រួសាររបស់នាង អស់សង្ឃឹមយ៉ាងខ្លាំង ចំពោះទង្វើធ្វើឲ្យបាក់មុខមាត់ Jutathip ហើយសុំអង្វរពូរបស់ Phakin ដើម្បីធ្វើជាកូនកំលោះជំនួសនៅថ្ងៃនោះ ប៉ុន្តែ គាត់បានទាមទារប្រាក់ ១ លានបាត (ជាង ២៩,០០០ ដុល្លារ) ដើម្បីធ្វើរឿងនេះ ។ នៅទីបំផុត នាង Jutathip បានសម្រេចចិត្តទម្លាយរឿង និងប្រកាសនៅចំពោះមុខភ្ញៀវថា កូនកំលោះរបស់នាងពុំមានវត្តមានទេ ។
នាងបាននិយាយថា៖ «ខ្ញុំសូមថ្លែងអំណរគុណបងប្អូនទាំងអស់គ្នា ដែលបានមកចូលរួមក្នុងមង្គលការរបស់ខ្ញុំ និងគាំទ្រដល់រូបនាងខ្ញុំ ។ ខ្ញុំបានបំពេញកាតព្វកិច្ចរបស់ខ្ញុំ ក្នុងនាមជាកូនក្រមុំបានយ៉ាងល្អបំផុតសម្រាប់ថ្ងៃនេះ… ខ្ញុំពិតជាមិនបានដឹងមុនពីស្ថានភាពដែលបានកើតឡើងសម្រាប់រូបខ្ញុំនៅថ្ងៃនេះទេ» ។
ទោះយ៉ាងណា Jutathip បានដាក់ពាក្យបណ្តឹងប្រឆាំងនឹងកូនកំលោះ Phakin ហើយ ។ យោងតាមបងប្អូនជីដូនមួយរបស់កូនក្រមុំ នោះធៀបការសរុប ១,០០០ ធៀប ត្រូវបានចែកជូនភ្ញៀវ និងតុភោជនីយអាហារស្ទៃល៍ចិន ត្រូវបានរៀបចំចំនួន ១៧០ តុ សម្រាប់ថ្ងៃមង្គលការនេះ ៕ ចន្ទី