ភ្នំពេញ ៖ សមាគមអ្នកលក់ឱសថកម្ពុជា សហការបច្ចេកទេស ជាមួយមន្ទីរសុខាភិបាលរាជធានីភ្នំពេញ ដោយមានការគាំទ្រពីរដ្ឋបាលរាជធានីភ្នំពេញ និង ក្រសួងសុខាភិបាល បានរៀបចំឱ្យមានការបណ្តុះបណ្តាល មូលដ្ឋាន សម្រាប់អ្នកលក់ឱសថ តាមឱសថស្ថាន ដើម្បីបង្កើននូវចំណេះ ដឹងដល់អ្នកលក់ឱសថ ក្នុងការធានា បាននូវ គុណភាព ប្រសិទ្ធភាព និង សុខមាលភាពប្រជាពលរដ្ឋ។
លោក ឡី សុភាព ប្រធានសមាគមអ្នកលក់ឱសថកម្ពុជា និងជាអនុប្រធានសមាគមសហព័ន្ធវិនិយោគិន បានលើកឡើងនៅក្នុងពិធី ប្រគល់វិញ្ញាបនបត្រមូលដ្ឋាន សម្រាប់អ្នកលក់ឱសថ តាមឱសថស្ថាន នៅរាជធានីភ្នំពេញ នាព្រឹកថ្ងៃទី២៥ខែកក្កដាននេះថា ការផ្តល់ជូនការបណ្តុះបណ្តាលនេះ គឺជាការគិតគូរ ពីសុវត្ថិភាព សុខភាព ប្រជាពលរដ្ឋ និងជាការបង្ការហានិភ័យ ជាយថាហេតុដែលផ្តើមចេញ ពីអ្នកលក់គ្មានវិជ្ជាជីវៈ និងការប្រើប្រាស់ឱសថ។ លើសពិនេះក៏ជាការចូលរួមអភិវឌ្ឍធនធានមនុស្ស បម្រើឱ្យវិស័យសុខាភិបាល ក៏ដូចជាពង្រឹងសេវាកម្មសុខាភិបាលឱ្យកាន់តែប្រសើរ។
លើសពីនេះ ក៏ជាការពង្រឹងសមត្ថភាព ជំនាញវិជ្ជាជីវៈ និងក្រមសីលធម៌ ដល់អ្នកលក់ឱសថទាំងអស់ ដែលនឹងក្លាយជាអ្នកបម្រើសេវាសុខភាពផ្ទាល់ ជាមួយប្រជាពលរដ្ឋ ទាំងចំណេះដឹង ចំណេះធ្វើ បន្ថែមទៀត សម្រាប់យកទៅធ្វើការប្រឹក្សាយោបល់បន្តនៅកម្រិតមូលដ្ឋានអាជីវកម្មសេវាកម្មសុខភាព ធ្វើយ៉ាងណាឲ្យមានសេវាសុខភាព នៅគ្រប់ទីកន្លែងឆ្លើយតបកំណើនប្រជាជន ដែលកើនឡើងឈប់ឈរ និងចូលរួមចលនាប្រឡងប្រណាំង បម្រើសេវាសុខភាព ដើម្បីឱ្យរាល់ការលក់ឱសថ មានការទទួលខុសត្រូវ និងគិតពីសុវត្ថិភាព សុខភាពប្រជាពលរដ្ឋ។
នាឱកាសនោះ លោក ឃួង ស្រេង អភិបាលរាជធានីភ្នំពេញ បានកត់សម្គាល់ថា នៅមានអ្នកលក់ឱសថ មួយចំនួនមិនទាន់មានចំណេះដឹង គ្រប់គ្រាន់នៅឡើយ ទាមទារឱ្យមានការយកចិត្តទុកដាក់ បង្កើនចំណេះដឹងបន្ថែមពីអ្នកពាក់ព័ន្ធ ព្រោះថា ឱសថជាអាវុធមុខពីរ ប្រើប្រាស់មិនត្រូវវានឹងធ្វើឱ្យមនុស្សស្លាប់។
លោក អភិបាលបន្តថា មនុស្សតែងតែមានជំងឺជាមិនខាន បើទោះជាចំណាយថវិកាប៉ុន្មានក៏ដោយ ក៏ត្រូវតែចាយវាយនោះដែរ ដោយជឿជាក់ទៅលើគ្រូពេទ្យ និងឱសថការីទាំងអស់ ដូច្នេះ ដើម្បីកុំឱ្យប្រជាជនមានជំនឿទុកចិត្ត គម្បីត្រូវមានចំណេះដឹងគ្រប់គ្រាន់ ក្នុងការធ្វើអាជីវកម្ម លើផ្នែកឱសថនេះ ដោយការទទួលខុសត្រូវខ្ពស់ ចៀសវាងអ្នកជំងឺចាយលុយអស់ពីខ្លួនហើយ អស់ទាំងអាយុជីវិតថែមទៀត នោះ។
លោក អភិបាល សុំឱ្យអ្នកលក់ឱសថនៅកម្ពុជាទាំងអស់ យកចិត្តទុកដាក់ពីសុខភាពប្រជាជន ពិសេស អ្នកជំងឺ ដើម្បីឱ្យគាត់ចំណាយថវិកា ហើយទទួលបាននូវសុខភាពល្អប្រសើរឡើងវិញ។ ការផ្តល់នូវការបណ្តុះបណ្តាល និង ការប្រគល់នូវវិញ្ញាបនបត្រនៅថ្ងៃនេះ ក៏ជាការបញ្ជាក់ឱ្យឃើញពី ការយកចិត្តទុកដាក់ របស់រាជរដ្ឋាភិបាល ក្នុងការជម្រុញ និងបង្កើនចំណេះដឹងលើផ្នែកឱសថ ដើម្បីធានានូវគុណភាព សុវត្ថិភាព និងសុខមានលភាពប្រជាពលរដ្ឋ។
សូមបញ្ជាក់ថា សិក្ខាកាមដែលជាឱសថ ម្ចាស់ អ្នកគ្រប់គ្រងទូទៅ អ្នកលក់ឱសថ និងតំណាងមូលដ្ឋាន អាជីវកម្មលក់ឱសថ អាហារបំប៉នសុខភាព និងគ្រឿងសម្អាង ក្នុងរាជធានី បានទទួលការបណ្តុះបណ្តាល កម្រិតមូលដ្ឋាន នូវចំណេះដឹងផ្នែកឱសថការី និងទទួលវិញ្ញាបនបត្រ នៅថ្ងៃនេះ មានចំនួន៧០៣នាក់ ក្នុងនោះស្រី៤៤៣នាក់ ។ វគ្គបណ្តុះបណ្តាលនេះ មានរយៈពេល១០ខែ គិតចាប់ពីថ្ងៃទី៩ ខែកញ្ញា ឆ្នាំ២០១៧ រហូតដល់ថ្ងៃទី៨ ខែមិថុនា ឆ្នាំ២០១៨ នៅសមាគមអ្នកលក់ឱសថកម្ពុជា លើមុខវិជ្ជា វេជ្ជសាស្ត្រ និងឱសថសាស្ត្រ ៕ ដោយ ៖ កូឡាប
