ស្វាយរៀង៖ យុវជនម្នាក់បានស្លាប់ភ្លាមៗនៅនឹងកន្លែងកើតហេតុខណះពេលដែលជិះម៉ូតូលឿន ដូចហោះ បានទៅបុកសត្វក្របីញីមួយក្បាលដែលដើរឆ្លងផ្លូវរីឯក្របីក៏ងាប់ផងដែរ។
ករណីនេះ បានកើតឡើង កាលពីវេលាម៉ោង៧និង ១៥នាទី យប់ថ្ងៃទី២៤ ខែកក្កដា ឆ្នាំ២០១៨ ស្ថិតក្នុងភូមិ ព្រៃស្ទៀង ឃុំ ស្វាយតាយាន ស្រុក កំពង់រោទ៌ ខេត្តស្វាយរៀង។
បើយោងតាមមន្ត្រីនគរបាលមូលដ្ឋាន បានអោយដឹងថា នៅមុនពេលកើតហេតុគេឃើញយុវជនរងគ្រោះខាងលើបានជិះម៉ូតូមួយគ្រឿងពីជើងទៅត្បូងលុះមកដល់ចំណុចកើតហេតុ ក៍មានក្របីមួយហ្វូង កំពុងដើរតាមផ្លូវ ដែលមានម្ចាស់ដេញពីក្រោយ ដោយសារតែការបើកបរមានល្បឿនលឿនពេកមិនអាចគ្រប់គ្រងនៃល្បឿនបានក៏បុកក្របីញីពេញទំហឹងបណ្តាលឲ្យយុវជនខាងលើស្លាប់ភ្លាមៗចំណែកឯក្របីក៏ងាប់នៅនឹងកន្លែងដែរ។
គួរបញ្ជាក់ថា៖ ជនរងគ្រោះមានឈ្មោះ សំ ជិក ភេទប្រុសអាយុ ១៧ឆ្នាំ រស់នៅភូមិព្រៃស្ទៀង ឃុំស្វាយតាយាន ស្រុក កំពង់ រោទ៌ ខេត្តស្វាយរៀងជិះម៉ូតូសង់សេរី២០១៦ ។ក្រោយពីជួបគ្រោះថ្នាក់ចរាចរណ៍រួចមកគេឃើញមានបងប្អូនប្រជាពលរដ្ឋចេញមកជួយនិងរាយការណ៏មកសមត្ថកិច្ចមូលដ្ឋានចុះមកដើម្បីពិនិត្យនិងសម្រួលចរាចរណ៍ ។
ហើយបច្ចុប្បន្នសាកសពជនរងគ្រោះខាងលើត្រូវបានសមត្ថកិច្ចប្រគល់អោយទៅក្រុមគ្រួសារ យកទៅធ្វើបុណ្យ តាមប្រពៃណី៕វ៉ៃកូ