ភ្នំពេញ ៖ ជនល្មើសចំនួន២ក្រុមចំនួន៨នាក់ ពាក់ព័ន្ធករណីវាយប្លន់យកម៉ូតូ និងក្រុមកាច់កម៉ូតូ ត្រូវបានកងកម្លាំងអន្តរាគមន៍ ព្រហ្មទណ្ឌ និងកម្លាំងនគរបាលប៉ុស្តិ៍ ខណ្ឌពោធិ៍សែនជ័យ បានសការគ្នាស្រាវជ្រាវបង្ក្រាប នៅយប់ថ្ងៃទី២៤ ខែកក្កដា ឆ្នាំ២០១៨។
លោកវរសេនីយ៍ឯក យឹម សារ៉ាន់ អធិការនគរបាលខណ្ឌពោធិ៍សែនជ័យ បានឲ្យដឹងថា ជនល្មើសទាំង២ក្រុម រួមមាន ទី១ ក្រុមវាយប្លន់យកម៉ូតូ ពីជនរងគ្រោះម្តុំ ក្លិបស្បាយឌឺ នគរបាលឃាត់បានចំនួន៥នាក់ ក្រោយពេលធ្វើសកម្មភាព ប្រហែល២០នាទី ស្ថិតក្នុងសង្កាត់ចោមចៅទី១។ ក្រុមទី២ នគរបាលឃាត់បានក្រុមកាច់កម៉ូតូចំនួន៣នាក់ វត្ថុតាងស្លាកលេខម៉ូតូចំនួន៩សន្លឹក ស្ថិតក្នុងសង្កាត់ចោមទី១ ខណ្ឌពោធិ៍សែនជ័យ។
បច្ចុប្បន្នកម្លាំងជំនាញ កំពុងសាកសួរ រកបក្ខពួក និងកសាងសំណុំរឿង បញ្ជូនទៅតុលាការ ដើម្បីចាត់ការតាមនីតិវិធី ៕ ដោយ ៖ បញ្ញាស័ក្តិ