ដោយឡែកនៅថ្ងៃទី២៣កក្កដា បណ្ដាគ្រោះមហន្ដរាយ៖ បាក់ទំនប់វារីអគ្គិសនី ភ្លើងឆេះព្រៃនិងការកើនកម្ដៅបណ្ដាលឱ្យមនុស្សស្លាប់ បានយាយីនៅប្រទេសជាច្រើននៅលើពិភពលោក។
នៅវេលាម៉ោង២០យប់ ថ្ងៃ២៣ ខែកក្កដា ទំនប់វារីអគ្គិសនី Xe-Pian Xe-Namnoy បានបាក់រលំធ្វើឱ្យជន់លិចភូមិចំនួន៧ ដែលមានមនុស្សរស់នៅជាង៦០០០នាក់ នៅស្រុក Sanamxay ខេត្ដ Attapeu ភាគអាគ្នេយ៍ប្រទេសឡាវ។
មកទល់ថ្ងៃទី២៥ ខែកក្កដា គេសង្គ្រោះបានជនរងគ្រោះ 2.851នាក់ និងជាង៣០០០នាក់កំពុងស្ថិតនៅលើដំបូលផ្ទះ ទីទួល រង់ចាំការសង្គ្រោះ។
តាមរបាយការណ៍មិនទាន់ផ្លូវការរបស់ខេត្ដ Attapeu ឱ្យដឹងថា គេបានមរកឃើញសាកសព១៩ ដែលសុទ្ធសឹងជាពលរដ្ឋឡាវ ។
មហន្ដរាយភ្លើងឆេះព្រៃគួរឱ្យរន្ធត់នៅប្រទេសក្រិក នាប្រជុំជន Kineta, Rafinan និងភូមិក្បែរឆ្នេរសមុទ្រMati, ចម្ងាយពីរដ្ឋធានី Athens ប្រមាណ៤០គីឡូម៉ែត្រ។
ភ្នាក់ងារពន្លត់អគ្គិភ័យរាប់រយនាក់បានប្រឹងប្រែងគ្រប់គ្រងស្ថានការណ៍ ដើម្បីទុកពេលឱ្យភ្នាក់ងារសង្គ្រោះប្រើប្រាស់ទូកជម្លៀសពលដ្ឋចេញពីតំបន់ឆ្នេរសមុទ្រ។
ក្រៅពីអ្នកដែលត្រូវបានជម្លៀសចេញរួចនោះ ជនរងគ្រោះដែលជាប់គាំងក្នុងផ្ទះ ឬរថយន្ដ សុទ្ធសឹងតែត្រូវបាត់បង់ជីវិត។រដ្ឋាភិបាលក្រិកបានបញ្ជាក់ថា មានមនុស្ស៧៧នាក់ស្លាប់ ហើយកងកម្លាំងសង្គ្រោះកំពុងរុករកអ្នកដែលបាត់ខ្លួន។អាណោចអាធមបំផុតនោះ គឺគេបានរកឃើញសាកសព២៦នាក់ រួមមានមនុស្សចាស់និងកូនក្មេងត្រូវឆេះខ្លោចក្នុងកាយវិការឱបគ្នានៅក្បែរជញ្ជាំងថ្មមួយ។
នាយករដ្ឋមន្ដ្រីក្រិក Alexis Tsipras បានប្រកាសកាន់ទុក្ខរយៈពេលបីថ្ងៃ។
នៅថ្ងៃ២៣ខែកក្កដានេះដែរ សីតុណ្ហភាពនៅជប៉ុនបានកើនឡើងដល់កម្រិតឯតទគ្គកម្ម ដែលកន្លែងខ្លះបានកើនដល់កម្រិត៤១អង្សាសេ។
នៅតូក្យូ សីតុណ្ហភាពកើនឡើងដល់៤០,៨អង្សាសេ ហើយដោយឡែកនៅថ្ងៃទី២១ ខែកក្កដាមានមនុស្សយ៉ាងតិច៧៧នាក់បានស្លាប់ និងមនុស្សរាប់ម៉ឺននាក់ត្រូវសង្គ្រោះនៅមន្ទីរពេទ្យ។
អាជ្ញាធរជប៉ុនបានទូន្មានឱ្យពលរដ្ឋមានការប្រុងប្រយ័ត្ន ចៀសវាងការប្រាស្រ័យផ្ទាល់នឹងកម្ដៅថ្ងៃ ហើយគប្បីបរិភោគទឹកឱ្យបានច្រើន៕
សូយន
