នាយករដ្ឋមន្ត្រីស្តីទីរបស់ប្រទេសនូវែលហ្សេឡង់ លោក Winston Peters បានចោទប្រកាន់ប្រទេសអូស្ត្រាលីថា បានចម្លងទង់ជាតិរបស់ប្រទេសខ្លួន និងប្រាប់ឲ្យប្រទេសជិតខាងមួយនេះ ឲ្យចេះច្នៃម៉ូតទង់ជាតិដោយខ្លួនឯង។
លោកបានថ្លែងប្រាប់ពត៌មានក្នុងស្រុក TVNZ ដូច្នេះថា “ពួកយើងមានទង់ជាតិផ្ទាល់ខ្លួន ដែលយើងបានប្រើប្រាស់រយៈពេលជាយូរមកហើយ ហើយវាត្រូវបានចម្លងដោយប្រទេសអូស្ត្រាលី”។
“ពួកគេគួរតែប្តូរទង់ជាតិ និងទទួលស្គាល់ការពិតថា ពួកយើងមានទង់ជាតិគំរូនោះមុន”។
ជាការពិតណាស់ ទង់ជាតិរបស់ប្រទេសនូវែលហ្សេឡង់ និងអូស្ត្រាលីមានលក្ខណៈស្រដៀងគ្នាខ្លាំង ហើយបើអ្នកមិនសូវស្គាល់ច្បាស់ អាចនឹងមានការភ័ន្តច្រឡំ។
ទង់ជាតិរបស់ប្រទេសនូវែលហ្សេឡង់ ត្រូវបានអនុម័តក្នុងឆ្នាំ ១៩០២ រយៈពេល ៥២ឆ្នាំ មុនពេលទង់ជាតិរបស់ប្រទេសអូស្ត្រាលីបច្ចុប្បន្នត្រូវបានទទួលស្គាល់ក្នុងឆ្នាំ ១៩៥៤៕ សុភ័ក្ត្រ
ប្រភព៖ CNN