តារាចម្រៀង រិន សាវ៉េត ត្រូវបានទស្សនិកជនស្គាល់ច្បាស់ថា ជាតារាចម្រៀងសំនៀងផ្អែម និងធ្ងន់ នៅក្នុងផលិតកម្មរស្មីហង្សមាស់ ប៉ុន្តែក្នុងនោះគេក៏សង្កេតឃើញថា តារាចម្រៀងពោះម៉ាយរូបនេះ ពុំសូវមានបទចម្រៀងច្រៀងដូចតារារួមទ្រនំឯទៀតឡើយ ដោយបទចម្រៀងរបស់លោមានតែក្នុងឱកាសបុណ្យចូលឆ្នាំថ្មី តែប៉ុន្មានបទប៉ុណ្ណោះ ។
ជាមួយគ្នានេះដែរ សម្រាប់ការគ្មានបទចម្រៀងច្រៀងរបស់លោក រិន សាវ៉េត នៅក្នុងផលិតកម្ម នេះផងដែរ ក៏បានធ្វើឱ្យអ្នកគាំទ្រមានការអន់ចិត្ត និងលើកឡើងថា ហេតុអ្វីបានជាតារាចម្រៀងមានសមត្ថភាពមួយទាំងមូល តែគ្មានការយកចិត្តទុកដាក់ ចេញបទចម្រៀងឱ្យគាត់ច្រៀង? សម្រាប់ការលើកឡើងរបស់ទស្សនិកជនដូចនេះ គឺមិនមែនជាលើកទីមួយឡើយ ។
ចំពោះលោក រិន សាវ៉េត ផ្ទាល់ ក៏ពុំដែលនិយាយអ្វីទាក់ទងនឹងការស្ងប់ស្ងាត់របស់ដែរ ប៉ុន្តែទើបតែកាលពីពេលថ្មីៗនេះ លោកក៏បាននិយាយហាក់ដូចជាអន់ចិត្ត តាមរយៈគណនីហ្វេសប៊ុករបស់លោកថា “ធម្មតានៅផលិតកម្មធំមួយ មានតារាចម្រៀងជាច្រើន ពួកគេខំប្រឹងបញ្ចេញសមត្ថភាព។ ដូច្នេះពេលវេលានិងឱកាស គួរទុកសម្រាប់ប្អូនៗបញ្ចេញសមត្ថភាពដល់ទស្សនិកជនទស្សនាកម្សាន្ត ។ ដូច្នេះ សម្រាប់ខ្ញុំទោះមិនសូវមានបទចម្រៀង ក៏គ្មានបញ្ហាអ្វីនោះទេ” ។
គួរបញ្ជាក់ថា លោក រិន សាវ៉េត បានផ្ញើខ្លួននៅក្នុងផលិតកម្មរស្មីហង្សមាសរយៈពេលជាង ១០ឆ្នាំមកហើយ ហើយបទដែលធ្វើឱ្យលោកទទួលបានប្រជាប្រិយភាពនោះគឺបទ «ខ្លោចបេះដូង» «មើលច័ន្ទនឹកអូន» ជាដើម ៕ សាវុធ
