ប្រភពពី xinhua ឱ្យដឹងថា នៅថ្ងៃទី២៦ខែកក្កដា ការិយាល័យតំណាងក្រុមហ៊ុនអាកាសចរណ៍ Air China ប្រចាំក្រុងប៉ារីសឱ្យដឹងថា ព័ត៌មានអំពីការគំរាមកំហែងភេរវកម្ម ជាហេតុបណ្ដាលឱ្យជើងហោះហើរលេខCA876 របស់ក្រុមហ៊ុនអាកាសចរណ៍នេះត្រូវបកក្បាលវិលមកក្រុងប៉ារីសវិញគឺជាព័ត៌មានក្លែងក្លាយ។
យន្ដហោះរបស់ក្រុមហ៊ុន Air China
តាមសេចក្ដីប្រកាសរបស់ការិយាល័យនេះ អ្នកដំណើរលើជើងហោះហើរខាងលើនេះបានត្រូវគេរៀបចំឱ្យសម្រាកនៅបន្ទប់រង់ចាំនាអាកាសយានដ្ឋាន Charles de Gaulle រដ្ឋធានីប៉ារីស បន្ទាប់ពីការត្រួតពិនិត្យសន្ដិសុខលើយន្ដហោះត្រូវបានបញ្ចប់។
គួររម្លឹកថា មុននោះAir China បានប្រកាសលើគណនីបណ្ដាញសង្គមថា ជើងហោះហើរមានលេខសម្គាល់CA876 ចេញដំណើរពីក្រុងប៉ារីសទៅក្រុងប៉េកាំងបានបកក្បាលវិលត្រឡប់មកវិញ ព្រោះមានការគំរាមកំហែងទាក់ទងដល់អំពើភេរវកម្ម។
បន្ទាប់មកលើគណនីបណ្ដាញសង្គមដដែលAir China បានប្រកាសឱ្យដឹងថា យន្ដហោះនិងអ្នកដំណើរសុទ្ធសឹងមានសុវត្ថិភាព ហើយក្រុមហ៊ុនអាកាសចរណ៍នេះនឹងរៀបចំជើងហោះហើរមួយផ្សេងទៀតក្នុងពេលវេលាយ៉ាងឆាប់តាមតែអាចធ្វើទៅបាន៕
សូយន
