ប៉ូលិសចិនបានចាប់ជនសង្ស័យបង្កការផ្ទុះខ្លាំងមួយនៅខាងក្រៅស្ថានទូតអាមេរិក នារដ្ឋធានីប៉េកាំង។ ករណីផ្ទុះនេះបានបង្កចលាចល ហូរឈាម និងបែកកញ្ចក់នៅតំបន់ជុំវិញនោះ។
ប៉ូលិសចិននិយាយថា ជនល្មើសក៏ជាជនតែមួយគត់ដែលរបួសក្នុងករណីនេះ
តាមកាសែត SCMP ឱ្យដឹងថា បរិក្ខារបំផ្ទុះមួយត្រូវបានគេចុចឱ្យផ្ទុះនៅខាងក្រៅស្ថានទូតអាមេរិកក្នុងក្រុងប៉េកាំង នៅល្ងាចថ្ងៃទី២៦ ខែកក្កដា។ស្ថានទូតអាមេរិកឱ្យដឹងថា ពុំមានមនុស្សណារងរបួសនៅក្នុងករណីនេះទេ។
ប៉ូលិសចិនទទួលស្គាល់ថា នៅកន្លែងកើតហេតុមានកម្ទេចកញ្ចក់ជាច្រើន ស្នាមឈាមហូរ ហើយផ្សែងពណ៌សខ្មួលខ្មាញ់។ករណីផ្ទុះនេះបានកើតឡើងនៅជិតកន្លែងដែលពលរដ្ឋចិនតម្រៀបជួរគ្នាសុំវីសាចូលអាមេរិក។
ចិនបានចាប់ជនសង្ស័យវ័យ២៦ឆ្នាំម្នាក់ ដែលគេសង្ស័យថាបានបង្កការផ្ទុះដោយប្រើ«ផាវផ្កា»។ ជនសង្ស័យត្រកូលJiang បានមកពី«Inner Mongolia Autonomous Region» តំបន់ព្រំដែនភាគខាងជើងប្រទេសចិន។ ក្នុងភាសាចិន«ផាវផ្កា» សម្រាប់គេចង្អុលទៅលើវត្ថុគ្រប់យ៉ាងគិតតាំងពីផាវធម្មតារហូតដល់រំសេវផ្ទុះ។
តាមប៉ូលិស ត្រកូលJiang មានជំងឺសរសៃប្រសាទ ហើយបានឈប់ធ្វើការតាំងពីឆ្នាំ២០១៦។ក្រោយហេតុការណ៍នេះJiang ត្រូវបានបញ្ជូនទៅមន្ទីរពេទ្យ។
ប៉ូលិសចិនឡោមព័ទ្ធកន្លែងកើតហេតុ
អ្នកនាំពាក្យក្រសួងការបរទេសចិន Geng Shuang បានប្រកាសថា ព្រឹត្ដិការណ៍ខាងលើគឺជាករណីផ្ទុះធម្មតាមួយ ហើយប៉ូលិសកំពុងស៊ើបអង្កេត។
ក្រសួងការបរទេសអាមេរិកវិញប្រកាសថា បើតាមមណ្ដាភ្នាក់ងារសន្ដិសុខ មានតែមនុស្សម្នាក់បំផ្ទុះគ្រាប់បែក ហើយជននោះគឺជាមនុស្សតែម្នាក់គត់ដែលរងរបួស៕
សូយន
