ភ្នំពេញ ៖ ដូចតាមការដែលគ្រោងទុកសម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានជួបជុំសមាជិកនិងសមាជិការគណបក្ស នៅកោះពេជ្រ បន្ទាប់មកនឹងចេញដឹកនាំសមាជិក សមាជិកាប្រមាណ ២៥ម៉ឺននាក់ បិទយុទ្ធនាការឃោសនាបោះឆ្នោតជ្រើសរើសតំណាងរាស្ត្រនីតិកាលទី៦ឆ្នាំ២០១៨ ដែលធ្វើឡើងនៅមជ្ឈមណ្ឌលកោះពេជ្រ រាជធានីភ្នំពេញ។ ពិធីដង្ហែរក្បួនគណបក្សគឺចាប់ពីកោះពេជ្រឆ្ពោះទៅកាន់ទីតាំងនាគបាញ់ទឹកមុខវត្តបទុមវតី នាថ្ងៃទី២៧ ខែកក្កដា ឆ្នាំ២០១៨នេះ។
នៅព្រឹកនេះ សម្តេចតេជោ ហ៊ុន សែន អញ្ជើញឡើងថ្លែងសារនយោបាយ ដែលមានខ្លឹមសារសំខាន់ជូនមហាជន ដែលនឹងផ្សាយផ្ទាល់តាមទូរទស្សន៍ វិទ្យុ និងប្រព័ន្ធផ្សព្វផ្សាយដទៃទៀតផងដែរ។ នៅក្នុងថ្ងៃចុងក្រោយនៃយុទ្ធនាការបោះឆ្នោតថ្ងៃនេះមានការជួបជុំសមាជិក សមាជិកាទាំងអស់នៅរាជធានីភ្នំពេញប្រមាណ ២៥ម៉ឺននាក់។
ដោយឡែកនៅពេលរសៀលថ្ងៃទី២៧កក្កដាដដែលនេះ តាមគម្រោងដែលគ្រោងទុកលោក ឃួង ស្រេង អនុប្រធានគណបក្សប្រជាជនកម្ពុជា រាជធានីភ្នំពេញនឹងដឹកនាំក្បួនដង្ហែរបិទក្បួន យុទ្ធនាការឃោសនារកសំឡេងឆ្នោតទៅតាមតំបន់មួយចំនួន ក្នុងរាជធានីភ្នំពេញរួចហើយវិលមកបញ្ចប់នៅកោះពេជ្រវិញ។
ផ្អែកតាមលិខិតសម្តេចវិបុលសេនាភក្តី សាយ ឈុំ អនុប្រធានគណបក្សប្រជាជនកម្ពុជា ផ្ញើទៅកាន់ប្រធានគណៈកម្មាធិការគណបក្សប្រជាជនកម្ពុជា តាមរាជធានី-ខេត្តនាពេលកន្លងទៅបានឲ្យដឹងថា ការដឹកនាំក្បួនបិទយុទ្ធនាការឃោសនារកសំឡេងឆ្នោតនេះ នឹងធ្វើការជួបជុំ ព្រមទាំងដង្ហែក្បួនចេញពីមជ្ឈមណ្ឌលសន្និបាត និងពិព័រណ៍កោះពេជ្រ។ បើតាមលិខិតដដែលនេះបានគូសបញ្ជាក់ថា៖ មុននឹងចេញដង្ហែក្បួនសម្តេចប្រមុខបក្សកាន់អំណាច នឹងមានការថ្លែងសារនយោបាយជូនមហាជន ហើយការថ្លែងសារនេះ នឹងផ្សាយផ្ទាល់តាមទូរទស្សន៍ វិទ្យុ និងប្រព័ន្ធផ្សព្វផ្សាយដទៃទៀត ដែលបក្សបានជួលរួចរាល់ហើយនោះ។
មន្ត្រីបក្សបានឱ្យដឹងថា៖ ការចេញដឹកនាំក្បួនបិទយុទ្ធនាការ ឃោសនារកសំឡេងឆ្នោត នៅថ្ងៃទី២៧ ខែកក្កដា ឆ្នាំ២០១៨ថ្ងៃនេះ គឺជាការដឹកនាំក្បួនឃោសនារកសំឡេងឆ្នោត ជាលើកទីពីរហើយ សម្រាប់ប្រមុខបក្សកាន់អំណាច។ កាលពីក្នុងយុទ្ធនាការឃោសនារកសំឡេងឆ្នោតជ្រើសរើសក្រុមប្រឹក្សាឃុំ-សង្កាត់ នាឆ្នាំ២០១៧កន្លងទៅ សម្តេចតេជោ ហ៊ុន សែន ក៏បានចេញដឹកនាំយុទ្ធនាការឃោសនារកសំឡេងឆ្នោតបែបនេះផងដែរ។
គួរបញ្ជាក់ថា៖ចាប់តាំងពីការបោះឆ្នោតឡើងដំបូងនាឆ្នាំ១៩៩៣ សម្តេចតេជោ ហ៊ុន សែន មិនដែលចេញដឹកនាំក្បួនឃោសនារកសំឡេងឆ្នោតនោះឡើយ ពោលប្រមុខបក្សរូបនេះ តែងធ្វើសកម្មភាពខ្លាំងនៅមុនយុទ្ធនាការឃោសនារកសំឡេងឆ្នោតចូលមកដល់។ លុះដល់ថ្ងៃឃោសនារកសំឡេងឆ្នោត សម្តេចតេជោ ហ៊ុន សែន តែងតែរក្សាភាពស្ងប់ស្ងាត់។ ដូច្នេះសម្រាប់ការចេញដឹកនាំក្បួនឃោសនាដោយផ្ទាល់របស់សម្តេចតេជោ ហ៊ុន សែន បានធ្វើឲ្យមហាជនមានការចាប់អារម្មណ៍ខ្លាំង។ ជាពិសេសតាមរយៈសកម្មភាពនេះ បានបង្ហាញថា៖ ប្រមុខបក្សកាន់អំណាចរូបនេះ បានផ្តល់តម្លៃខ្ពស់លើការប្រកួតប្រជែង ជាលំអាននៃលទ្ធិប្រជាធិបតេយ្យដែលកម្ពុជា កំពុងប្រតិបត្តិយ៉ាងខ្ជាប់ខ្ជួននោះ។
ក្រៅពីគណបក្សប្រជាជនកម្ពុជា ដែលមានកម្លាំងរហូតដល់ទៅ២៥ម៉ឺននាក់ ចេញដង្ហែបិទក្បួនយុទ្ធនាការឃោសនារកសំឡេងឆ្នោតទៅ នៅក្នុងរាជធានីភ្នំពេញនេះ ក៏មានគណបក្សនយោបាយ៥ផ្សេងទៀត បានចេញដង្ហែបិទយុទ្ធនាការឃោសនារកសំឡេងឆ្នោតផងដែរ។ នេះបើតាមរបាយការណ៍គណៈកម្មាធិការជាតិរៀបចំការបោះឆ្នោត។
បើយោងរបាយការណ៍គ. ជ .ប បានឲ្យដឹងថា គណបក្សនយោបាយទាំង៥នោះរួមមាន៖ គណបក្សសម្ព័ន្ធដើម្បីប្រជាធិបតេយ្យ, គណបក្សសញ្ជាតិកម្ពុជា, គណបក្សខ្មែរក្រោក, គណបក្សខ្មែរអភិវឌ្ឍន៍សេដ្ឋកិច្ច និង គណបក្សហ្វ៊ុនស៊ិនប៉ិច។ បើតាមរបាយការណ៍ដដែលនេះ បានឲ្យដឹងថា ការដង្ហែក្បួនបិទបញ្ចប់យុទ្ធនាការឃោសនារកសំឡេងឆ្នោតនៅក្នុងរាជធានីភ្នំពេញ មានអ្នកចូលរួមសរុបទាំងអស់ជាង ៣២ម៉ឺននាក់ និងមានរថយន្តចំនួន ៣៦៧០គ្រឿង ម៉ូតូកង់បីជិត ១ពាន់គ្រឿង និងម៉ូតូជាង ៨ពាន់គ្រឿង៕ ដោយ៖បញ្ញាស័ក្តិ