ម្ចាស់ក្សត្រី Kate ធ្លាប់មានកាយវិការ ធ្វើឲ្យពិភពលោកទាំងមូលស្រឡាំងកាំង នៅពេលបង្ហាញវត្តមានដោយពររាជបុត្រ Louis នៅលើដៃ ក្រោយពីសម្រាលកូនរួចមិនបាន ៧ម៉ោងផង កាលពីថ្ងៃទី ២៣ ខែមេសា នៅមន្ទីរពេទ្យ St.Mary ។ ប៉ុន្តែថ្មីៗនេះ បណ្តាប្រព័ន្ធផ្សព្វផ្សាយអង់គ្លេសបានបង្ហើបប្រាប់ថា ម្ចាស់ក្សត្រី Kate នៅបានធ្វើរឿងមួយគួរឲ្យភ្ញាក់ផ្អើលខ្លាំងជាងមុន ចំពោះព្រះអង្គម្ចាស់ George តែ១ថ្ងៃក្រោយពេលសម្រាលកូន ។
មិនខុសប្លែកពីគ្រួសារដទៃទៀតទេ ប្តីប្រពន្ធក្សត្រ William -Kate យល់ថា រៀងរាល់ពេលមានសមាជិកថ្មីមួយចាប់កំណើត កូនដែលធំជាងនៅក្នុងគ្រួសារមានអារម្មណ៍ថាក្នុងជីវិតពួកគេ មានសភាពប្រែប្រួលទោះតិចឬច្រើន ។ហេតុនេះអ្នកជាមាតាបិតាគប្បីធ្វើអ្វីៗឲ្យស្ថានភាពវិលទៅកាន់ភាពប្រក្រតីកាន់តែឆាប់កាន់តែល្អ ចំពោះកូនដែលធំជាងប្អូនទើបនឹងកើត ។
តាមនោះ Kate បានទៅទទួលព្រះអង្គម្ចាស់ George នៅសាលាមត្តេយ្យ Thoma’s Battersea West London ក្រោយពេលសម្រាលកូនរួចតែ១ថ្ងៃប៉ុណ្ណោះ ហើយនាងបានឈរតម្រៀបជួរ រង់ចាំទទួលកូនមិនខុសពី “រាស្ត្រសាមញ្ញ”ទេ ។
ប្តីប្រពន្ធ William និង Kate តែងចង់ឲ្យកូនរបស់ខ្លួនបានរស់នៅរៀនសូត្រដូចកូនៗពលរដ្ឋសាមញ្ញដទៃ ។ Kate តែងជាអ្នកទៅទទួលកូននាំកូនទៅលេងកម្សាន្តជាមួយក្មេងៗដទៃទៀតជាប្រក្រតី ៕ ចន្ទ្រា