នេះជាខណៈពេលដ៏ស្លុតរន្ធត់មួយ ដែលក្មេងស្រីអាយុ ៦ ឆ្នាំ ម្នាក់ ត្រូវបានត្រីឆ្លាមឆ្មក់ខាំដៃរបស់នាង នៅគែមនៃអាងចិញ្ចឹមត្រីនៃផ្សារទំនើបមួយកន្លែង ក្នុងប្រទេសចិន ។
ហេតុការណ៍ដ៏ពុំនឹកស្មាននេះ បានកើតឡើងកាលពីថ្ងៃទី២៤ ខែកក្កដា នៅសួនកម្សាន្តនៃផ្សារទំនើបមួយ ស្ថិតក្នុងទីក្រុង Guiyang ខេត្ត Guizhou បន្ទាប់ពីក្មេងស្រីរងគ្រោះ និងគ្រួសាររបស់នាង កំពុងទស្សនាអាងចិញ្ចឹមត្រី ស្ថិតនៅជាន់ទី២នៃផ្សារទំនើបនោះ ។
យាយរបស់ក្មេងស្រីរងគ្រោះឈ្មោះ Xiao Li បាននិយាយថា ត្រីឆ្លាមបានត្របាក់ដៃចៅស្រីរបស់ខ្ញុំ ខណៈអ្នកគ្រប់គ្រងនៅទីនោះ បានចេញវីដេអូបញ្ជាក់ភ្លាមៗថា ក្មេងស្រីបានដាក់ដៃចូលក្នុងទឹក និងនៅពេលនោះ ត្រីឆ្លាម១ក្បាលក៏ឆ្មក់វាយប្រហារដៃនាងតែម្តង ។
ក្មេងស្រីនេះត្រូវបានឃើញដកដៃពីក្នុងទឹកយ៉ាងលឿន ខណៈត្រីឆ្លាមហែលចាកចេញ ដោយបន្សល់ទុកឲ្យក្មេងស្រីនេះជាមួយឈាមហូរនៅដៃរបស់នាងយ៉ាងសាហាវ ។
Xiao Li ត្រូវបាននាំយកទៅកាន់មន្ទីរពេទ្យ Guizhou Orthopaedics ដោយគ្រួសាររបស់នាង ។ ក្រុមគ្រូពេទ្យបានរកឃើញជាលិកាទន់ជាច្រើនបានបានរហែក និងបាក់ឆ្អឹងលើម្រាមដៃរបស់នាង ។
បច្ចុប្បន្ន នាងកំពុងបន្តព្យាបាលរបួសនៅមន្ទីរពេទ្យខាងលើនេះផងដែរ ៕ ចន្ទី (breakingnewstime)