ព្រះសីហនុ៖ អភិបាលខេត្តព្រះសីហនុ លោក យន្ត មីន មានប្រសាសន៍ថា មានអតីតចៅសង្កាត់- ចៅសង្កាត់រង ទី១ ចៅសង្កាត់រងទី២ និងសមាជិកក្រុមប្រឹក្សាឃុំ-សង្កាត់ មកពីគណបក្សសង្គ្រោះជាតិ ចំនួន ៦រូបទៀត នាខេត្តព្រះសីហនុ បានសុំចូលរួមជីវភាពនយោបាយជាមួយគណបក្សប្រជាជនកម្ពុជាវិញ បន្ទាប់ពីតុលាការកំពូល សម្រេចសាលដីការំលាយគណបក្សនេះចោល កាលពីថ្ងៃទី១៦ ខែវិច្ឆិកា ឆ្នាំ២០១៧។
លោក យន្ត មីន បង្ហាញឈ្មោះអតីតមន្ត្រីគណបក្សសង្គ្រោះជាតិចុះចូលទាំង ៦នាក់ ដែលបានចុះចូលជាមួយគណបក្សប្រជាជនកម្ពុជា នាខេត្តព្រះសីហនុ កាលពីថ្ងៃទី១៨ ខែវិច្ឆិកា រួមមាន៖ លោក សេង នីម ចៅសង្កាត់លេខ៤- លោក សេង សុផន ចៅសង្កាត់រងទី១សង្កាត់លេខ៤- លោក លោក កោះ ងន- លោក អ៊ុន ចាន់ថា- លោក ម៉ិញ ថាវ- ជាក្រុមប្រឹក្សាសង្កាត់លេខ៤ ក្រុងព្រះសីហនុ និងលោក អ៊ិន ចាត ចៅសង្កាត់រងទី២ ឃុំតានៃ ស្រុកព្រៃនប់ ខេត្តព្រះសីហនុ។
លោក យន្ត មីន បញ្ជាក់ថា រហូតមកដល់ពេលនេះ មានអតីតចៅសង្កាត់-ចៅសង្កាត់រង និងសមាជិកក្រុមប្រឹក្សាមកពីគណបក្សសង្គ្រោះជាតិចន្លោះពី ៧ ទៅ ៨រូបហើយ នាខេត្តព្រះសីហនុ បានមកសុំចូលរួមជីវភាពនយោបាយជាមួយគណបក្សប្រជាជនកម្ពុជាវិញ។ លោកបន្តថា តាមព័ត៌មាន នឹងអាចមានអតីតចៅសង្កាត់-ចៅសង្កាត់រង និងសមាជិកក្រុមប្រឹក្សាឃុំ-សង្កាត់ គណបក្សប្រឆាំងជាច្រើនរូបទៀត ត្រៀមចុះចូលជាមួយគណបក្សប្រជាជនកម្ពុជា ដែលកំពុងកាន់អំណាច។
ទាក់ទិនបញ្ហានេះកន្លងមក លោក សុខ សាវ៉ាត ប្រធានប្រតិបត្តិគណបក្សសង្គ្រោះជាតិ ប្រចាំខេត្តព្រះសីហនុ មានប្រសាសន៍ថា រូបលោកមិនមានអត្ថាធិប្បាយទៅលើការចាកចេញ របស់សមាជិកខ្លួននេះទេ ដោយចាត់ទុកការចាកចេញនេះ ថាជាសិទ្ធិ ក្នុងការសម្រេចចិត្ត របស់បុគ្គលម្នាក់ៗ។
តុលាការកំពូល កាលពីថ្ងៃទី១៦ ខែវិច្ឆិកា ឆ្នាំ២០១៧ បានសម្រេចសាលដីកា រំលាយចោល គណបក្សសង្គ្រោះជាតិ តាមពាក្យបណ្តឹង របស់ក្រសួងមហាផ្ទៃលើសំណុំរឿងជាប់ពាក់ព័ន្ធ អំពើក្បត់ជាតិ។ ភ្លាមៗ បន្ទាប់ពីគណបក្សនេះត្រូវរំលាយ ក្រសួងមហាផ្ទៃ ក៏បានប្រកាសលុបឈ្មោះគណបក្សនេះចេញពីបញ្ជីគណបក្សនយោបាយ នៅក្រសួងមហាផ្ទៃ កាលពីថ្ងៃទី១៧ ខែវិច្ឆិកា។
សាលដីកាតុលាការកំពូល ក៏បានហាមសមាជិកជាន់ខ្ពស់ របស់គណបក្សសង្គ្រោះជាតិចំនួន ១១៨រូប មិនឲ្យធ្វើនយោបាយក្នុងរយៈពេល ៥ឆ្នាំថែមទៀត៕ ដោយ៖ ដែន សីមា
ខាងក្រោមនេះ គឺជាពាក្យសុំចុះចូលជាសមាជិកគណបក្សប្រជាជនកម្ពុជា របស់ អតីតចៅសង្កាត់ -ចៅសង្កាត់រង និងសមាជិកក្រុមប្រឹក្សាឃុំសង្កាត់គណបក្សសង្គ្រោះជាតិ នៅខេត្តព្រះសីហនុ៖