ភ្នំពេញ ៖ មានសមាជិកព្រឹទ្ធសភាសហរដ្ឋអាមេរិក សមាជិកព្រឹទ្ធសភាអឺរ៉ុប និងស្ថាប័នអន្តរជាតិនៅអឺរ៉ុបចំនួន៤៨រូប បានចុះឈ្មោះចូលរួមសង្កេតការណ៍ បោះឆ្នោតជ្រើសតាំងតំណាងរាស្ត្រ អាណត្តិទី៦ នៅក្នុងប្រទេសកម្ពុជា។ ចំណែកឯស្ថានទូតជប៉ុនប្រចាំនៅកម្ពុជា បានដាក់មន្ត្រីរបស់ខ្លួន ឱ្យចូលរួមជាភ្ញៀវពិសេស ដើម្បីចូលរួមសង្កេតការណ៍បោះឆ្នោត នៅកម្ពុជា។
នៅក្នុងសន្និសីទកាសែត ស្តីពីការបូកសរុបលទ្ធផលនៃការឃោសនាបោះឆ្នោត នៅល្ងាចថ្ងៃទី២៧ ខែកក្កដា ឆ្នាំ២០១៨នេះ លោក ហង្ស ពុទ្ធា អ្នកនាំពាក្យរបស់ គ.ជ.ប បានប្រកាសថា ក្នុងចំណោមអ្នកសង្កេតការណ៍អន្តរជាតិ មកពីអឺរ៉ុប និងអាមេរិកទាំងនោះ រួមមាន៖ សមាជិកព្រឹទ្ធសភាអាមេរិកចំនួន៤រូប សមាជិកព្រឹទ្ធសភារបស់សហគមន៍អឺរ៉ុបចំនួន៣០រូប ក្រុមប្រឹក្សាអឺរ៉ុប សម្រាប់ការការងារទំនាក់ទំនងអន្តរជាតិចំនួន៥រូប និងក្រុមប្រឹក្សាអឺរ៉ុប ដើម្បីទេសចរណ៍ និងពាណិជ្ជកម្មចំនួន៩រូប។
អ្នកនាំពាក្យ គ.ជ.ប បានបញ្ជាក់ថា អ្នកសង្កេតការណ៍អន្តរជាតិ ដែលចូលរួមសង្កេតការណ៍បោះឆ្នោត នៅអាណត្តិទី៦ គឺអាចមានរហូតដល់ជាង៥០០នាក់ឯណោះ មកពី៤២ប្រទេស ខណៈពេលនេះគ.ជ.ប បានទទួលស្គាល់ជាផ្លូវការចំនួន៣២២នាក់ និងកំពុងពិនិត្យមើលសំណើចំនួន២១៦នាក់។ ខណៈដែលឆ្នាំ២០១៣ ក្នុងការបោះឆ្នោតជាតិជ្រើសតាំង តំណាងរាស្ត្រ អាណត្តិទី៥ អ្នកសង្កេតការណ៍អន្តរជាតិដែលចូលរួម សង្កេតការណ៍បោះឆ្នោតនោះ មានចំនួនត្រឹមតែ២៤៣នាក់ប៉ុណ្ណោះ។
ដោយឡែកសម្រាប់អ្នកសង្កេតការណ៍ជាតិវិញ គ.ជ.ប ក៏បានអះអាងដែរថា មានការកើនឡើងច្រើនជាងអាណត្តិមុន ដោយមានអ្នកសង្កេតការណ៍ជាតិ ក្នុងការបោះឆ្នោតលើកនេះ ដែលគ.ជ.ប បានទទួលស្គាល់ហើយ មកពីស្ថាប័នចំនួន១១២ មានចំនួន៩៩៦១២នាក់។ ចំណែកតួលេខអ្នកសង្កេតការណ៍ជាតិ សម្រាប់ការបោះឆ្នោតអាណត្តិទី០៥ មានចំនួន ៤០១៤២នាក់ អញ្ចឹងយើងឃើញថា មានការកើនឡើងជិតទ្វេដង។
ក្រៅពីការអ្នកសង្កេតការណ៍អន្តរជាតិនៅអឺរ៉ុប និងអាមេរិកនេះ។ សម្រាប់ជប៉ុនវិញ ទោះបីមានព័ត៌មានផ្សព្វផ្សាយថា ខ្លួនមិនបញ្ជូនអ្នកសង្កេតការណ៍មកកម្ពុជាក៏ដោយ ប៉ុន្តែស្ថានទូតជប៉ុនប្រចាំនៅកម្ពុជា បានដាក់មន្ត្រីរបស់ខ្លួន ជាភ្ញៀវបរទេសពិសេសរបស់គ.ជ.ប ចំនួន៩រូប ឱ្យចូលរួមជួយ និងសង្កេតការណ៍បោះឆ្នោតនៅកម្ពុជាផងដែរ។
ភ្ញៀវពិសេស ដែលត្រូវបានអនុញ្ញាតដោយគ.ជ.ប ហាក់ដូចជាទទួលបានសិទ្ធិពិសេសពីគ.ជ.ប ជាងអ្នកសង្កេតការណ៍ទៅទៀត ដែលអាចចូលពិនិត្យការបោះឆ្នោត ហើយនៅពេលពិនិត្យមើលការបោះឆ្នោតនៅតាមការិយាល័យបោះឆ្នោត និងការិយាល័យរាប់សន្លឹកឆ្នោតនោះ ភ្ញៀវពិសេសមិនតម្រូវឲ្យចុះវត្តមាន ដូចអ្នកសង្កេតការណ៍នោះទេ។
គ.ជ.ប ក៏បានប្រកាសឱ្យ ភ្នាក់ងារសន្តិសុខបោះឆ្នោត ដែលបំពេញភារកិច្ចការពារសន្តិសុខ សុវត្ថិភាព និងសណ្តាប់ធ្នាប់នៅការិយាល័យបោះឆ្នោត និងការិយាល័យរាប់សន្លឹកឆ្នោត និងមន្ត្រីគណៈកម្មការរៀបចំការបោះឆ្នោតគ្រប់លំដាប់ថ្នាក់ ត្រូវសហការសម្របសម្រួលដល់ភ្ញៀវពិសេស ដែលចូលទៅពិនិត្យមើលការបោះឆ្នោតឲ្យបានល្អប្រសើរផងដែរ។
ភ្នាក់ងារអន្តរជាតិជាភ្ញៀវពិសេស មានសរុបទាំងអស់១២រូប គឺមាន២នាក់មកពីក្រុមហ៊ុន Musaji Co., Ltd នៃប្រទេស ដើម្បីពិនិត្យហិបឆ្នោត និងមួយរូបមកពីក្រុមហ៊ុនផលិតទឹកខ្មៅឥណ្ឌា ព្រមទាំង៩នាក់មកពីស្ថានទូតជប៉ុន៕ ដោយ៖កូឡាប