បច្ចុប្បន្ននេះទីផ្សារអចនៈទ្រព្យកំពុងមានសន្ទុះខ្លាំង ជាពិសេសគឺដីឡូតិ៍តែម្ដង ដែលមានឈ្មួញជាច្រើនកំពុងនាំគ្នាពុះដីឡូតិ៍លក់ពីមួយថ្ងៃទៅមួយថ្ងៃ ជាច្រើនកន្លែង ហើយក្នុងនោះក៏មានតារាសិល្បៈមួយចំនួនដែរ កំពុងបោះទុនលើវិស័យនេះជាក់ស្ដែងដូចជាលោក យត្ថារ៉ា ឆាន់នី លោក ហេង ប៊ុន លាភ ហើយកាលពីពេលថ្មីៗនេះលោក ព្រាប សុវត្ថិ ក៏បានបោះទុនខ្ទង់លានដុល្លារ ជាមួយលោក ឧកញ៉ា ឡេង ណាវ៉ាត្រា ។
ជាមួយគ្នានេះដែរ ក្រៅពីតារាទាំងប៉ុន្មាននាក់ខាងលើ ទស្សនិកជនក៏បានចាប់អារម្មណ៍ផងដែរ ជាមួយលោក អ៊ីណូ ដែលទើបតែបានដឹងថា លោក ក៏បានបោះទុនលើវិស័យដីឡូតិ៍ដែរ ខណៈដែលលោក នៅមានវ័យក្មេងនៅឡើយ ហើយសម្រាប់សកម្មភាពនេះ ធ្វើឱ្យអ្នកគាំទ្រកោតសរសើរយ៉ាងខ្លាំង ។
លោក អ៊ីណូ ម្ចាស់បទ «ប្រុសក្រញ៉ាញ់ខូចចិត្ត» ត្រូវបានគេដឹងថា លោក ជាតារាចម្រៀងប្រុសតែម្នាក់គត់នៅក្នុងផលិតកម្មសាន់ដេ ដែលបានងាកមកចាប់មុខជំនួញលើដីធ្លី ខណៈដែលមុខជំនួញនេះជាជំនួញធំ ពុំទាន់មានតារាច្រើន ឭដែលចាប់របរនេះនៅឡើយ ហើយសម្រាប់ទីតាំងដីនេះគឺស្ថិតនៅភូមិបេង ឃុំម្កាក់ ស្រុកអង្គស្នួល ខេត្តកណ្តាល ( ជិតភ្នំរៀប បាសិទ្ធ ) ៕ សាវុធ