ថ្នាក់ដឹកនាំស្ថាប័នពាក់ព័ន្ធ នៃរដ្ឋបាលខេត្តព្រះសីហនុ អំពាវនាវអោយប្រជាពលរដ្ឋ ពិសេសភ្ញៀវទេសចរជាតិអន្តរជាតិ ត្រូវប្រុងប្រយ័ត្នពីសុវត្ថិភាពផ្ទាល់ខ្លួន អោយបានខ្ពស់ជាប្រចាំ ព្រោះនៅថ្ងៃអាទិត្យ ទី១៩ ខែវិច្ឆិកា ឆ្នាំ២០១៧ ស្ថានភាពអាកាសធាតុ នៅតំបន់ជាប់ឆ្នេរសមុទ្រមួយនេះ មានព្យុះភ្លៀង និងរលកសមុទ្រធំៗ បក់បោកខ្លាំង នៅលើលម្ហសមុទ្រ។
ផ្តើមពីបញ្ហានេះ លោក យន្ត មីន អភិបាលខេត្តព្រះសីហនុ និងថ្នាក់ដឹកនាំស្ថាប័នពាក់ព័ន្ធ រួមមាន៖ ទីបញ្ជាការជួរមុខ កងទ័ពជើងទឹក និងអង្គភាពនគរបាលបង្ក្រាបបទល្មើសលើលម្ហសមុទ្រជាដើម បានរំលឹកដល់ប្រជាពលរដ្ខ ធ្វើដំណើរនៅលើលម្ហសមុទ្រ ជាពិសេស ភ្ញៀវទេសចរ និងអ្នកនេសាទសមុទ្រ ត្រូវបង្កើនការប្រុងប្រយ័ត្នពីសុវត្ថិភាពផ្ទាល់ខ្លួន អោយបានជាប្រចាំពេលធ្វើដំណើរតាមសមុទ្រ។
ទាក់ទិនបញ្ហាអាកាសធាតុនេះដែរ ក្រសួងធនធានទឹក និងឧតុនិយម បានចេញសេចក្តីជូនដំណឹង អំពីការព្យាករណ៍អាកាសធាតុ បង្ហាញថា បន្ទាប់ពីបានតាមដានលើស្ថានភាពអាកាសធាតុរួចមក ឃើញថា នៅក្នុងសមុទ្រចិនខាងត្បូង មានសម្ពាធទាបសកម្មមួយ កំពុងធ្វើដំណើរសំដៅ មកទិសខាងលិច។
សម្ពោធទាបសកម្មនេះ នឹងបន្តវិវត្តទៅជាវិសម្ពាធ ហើយនឹងបន្តដំណើរទៅដល់តំបន់ដីសណ្តរទន្លេមេគង្គ នាថ្ងៃទី១៩ ខែវិច្ឆិកា។
លក្ខណៈបែបនេះ នឹងធ្វើអោយមានភ្លៀង បន្តធ្លាក់នៅតាមបណ្តារាជធានីខេត្តនានា ចាប់ពីថ្ងៃទី១៩ ដល់ថ្ងៃទី២១ ខែវិច្ឆិកា ក្នុងនោះ៖ រាជធានីភ្នំពេញ ខេត្តស្វាយរៀង ព្រៃវែង កណ្ដាល តាកែវ កំពង់ស្ពឺ កំពត កែប និងខេត្តព្រះសីហនុ អាចនឹងមានភ្លៀងធ្លាក់ពីបង្គួរទៅច្រើន។
ចំណែកតំបន់ឆ្នេរ និងនៅលើផ្ទៃសមុទ្រ នឹងមានភ្លៀងធ្លាក់ច្រើនលាយឡំជាមួយខ្យល់បក់បោកខ្លាំង និងមានរលកសមុទ្រខ្ពស់ៗ។
ត្រង់ចំណុចនេះ ក្រសួងធនធានទឹក បានស្នើដល់ប្រជាពលរដ្ឋ ជាពិសេសអ្នកនេសាទសមុទ្រ និងអ្នកធ្វើដំណើរតាមសមុទ្រ ត្រូវបង្កើនការប្រុងប្រយ័ត្នខ្ពស់ ដើម្បីចៀសវាង នូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕ ដោយ៖ ដែន សីមា
