ភ្នំពេញ៖ ករណីអតីតអ្នកយកព័ត៌មានវិទ្យុអាស៊ីសេរី គឺលោក អ៊ួន ឈិន និងលោក យាង សុជាមេត្តា ដែលត្រូវសមត្ថកិច្ចបានឃាត់ខ្លួននិងតុលាការឃុំខ្លួននៅពន្ធនាគារព្រៃសនោះ ត្រូវបានអ្នកសារព័ត៌មាន ជាង៤០នាក់ ចេញលិខិតមួយច្បាប់ រួមជាមួយនឹងស្នាមមេដៃពណ៌ក្រហម បានស្នើយ៉ាងទទូចដល់ព្រះរាជអាជ្ញា និងចៅក្រមស៊ើបសួរទម្លាក់បទចោទប្រកាន់ហើយដោះលែងពួកគេទាំងពីរនាក់ ឲ្យមានសេរីភាពវិញ។
លិខិតចំហ ស្នាមមេដៃ និងឈ្មោះអ្នកសារព័ត៌មាន ជាង៤០នាក់ ដែលធ្វើឡើងនៅរាជធានីភ្នំពេញ ថ្ងៃទី១៩ ខែវិច្ឆិកា ឆ្នាំ២០១៧ បានឲ្យដឹងថា “យើងខ្ញុំជាអ្នកសារព័ត៌មានកម្ពុជា សូមស្នើព្រះរាជអាជ្ញា និងចៅក្រមស៊ើបសួរនៃសាលាដំបូងរាជធានីភ្នំពេញ ពិចារណាទម្លាក់បទចោទប្រកាន់លើអតីតអ្នកយកព័ត៌មានវិទ្យុអាស៊ីសេរី(RFA) លោក អ៊ួន ឈិន និងលោក យាង សុធារិន ហៅ យាង សុជាមេត្តា ដែលត្រូវបានឃាត់ខ្លួនកាលពីថ្ងៃទី១៤ ខែវិច្ឆិកា ឆ្នាំ២០១៧។ នៅថ្ងៃទី១៨ ខែវិច្ឆិកា ឆ្នាំ២០១៧ តំណាងអយ្យការអមសាលាដំបូងរាជធានីភ្នំពេញ បានចោទប្រកាន់អ្នកទាំងពីរ ពី”បទប្រគល់ឲ្យរដ្ឋបរទេស នូវព័ត៌មានជាអាទិ៍ ដែលបង្កឲ្យមានការអន្តរាយដល់ការការពារជាតិ តាមបញ្ញត្តិ មាត្រា៤៤៥ នៃក្រមព្រហ្មទណ្ឌ”។
ក្នុងលិខិតដដែល បានបញ្ជាក់ស្នើសុំបន្ថែមថា “យើងខ្ញុំដែលបានផ្តិតស្នាមមេដៃ នៅក្នុងលិខិតចំហមួយនេះ មានការព្រួយបារម្ភយ៉ាងខ្លាំងចំពោះការចោទប្រកាន់ ដ៏ធ្ងន់ធ្ងរ ទៅលើអតីតអ្នកយកព័ត៌មាន វិទ្យុអាស៊ីសេរីទាំងពីរ។ នៅក្នុងសង្គមប្រជាធិបតេយ្យ សារព័ត៌មានបានដើរតួនាទីយ៉ាងសំខាន់ ក្នុងការផ្តល់ព័ត៌មាន ពិតប្រាកដ ជូនដល់ប្រជាពលរដ្ឋ។ អ្នកសារព័ត៌មាន មានតួនាទី ក្នុងការរាយការណ៍អ្វីដែលជាការពិត ជូនដល់សាធារណជន។ យើងខ្ញុំយល់ថា ការចោទប្រកាន់ទាក់ទង នឹងការផ្តល់ព័ត៌មាន ដែលនាំអន្តរាយ ដល់ការការពារជាតិ ជាការចោទប្រកាន់មួយ ដ៏ធ្ងន់ធ្ងរ។ ការចោទប្រកាន់ លើអតីតអ្នកយកព័ត៌មាន ទាំងពីររូបនេះ កំពុងតែបង្កភាព ភាពភ័យខ្លាច ដល់អ្នកសារព័ត៌មាន ដែលកំពុងបំពេញវិជ្ជាជីវៈ និងធ្វើឲ្យសេរីភាពសារព័ត៌មាន នៅកម្ពុជាធ្លាក់ចុះ”។
ក្រុមអ្នកសារព័ត៌មាន បានលើកឡើងថា សេរីភាពសារព័ត៌មាន ត្រូវបានធានា ដោយរដ្ឋធម្មនុញ្ញកម្ពុជា ដែលបានចែងថា ប្រជាពលរដ្ឋខ្មែរ មានសេរីភាព ខាងការបោះពុម្ពផ្សាយ សេរីភាពខាងការប្រជុំ។ សេរីភាព នៃសារព័ត៌មាន ក៏មានចែងក្នុងច្បាប់ ស្តីពី របបសារព័ត៌មានឆ្នាំ១៩៩៥ ផងដែរ។ ការចុះផ្សាយ នូវការកែតម្រូវ ត្រូវបានចែង ក្នុងមាត្រា១០ នៃច្បាប់ ស្តីអំពី របបសារព័ត៌មាន ត្រង់ចំណុចថា បើតុលាការរកឃើញថា ការផ្សាយណា មានលក្ខណៈខុស ពីការពិត តាមបណ្តឹង របស់ដើមបណ្តឹងរដ្ឋប្បវេណី តុលាការ អាចបង្គាប់ឲ្យសារព័ត៌មាននោះ ចុះផ្សាយនូវការកែតម្រូវ ឬនិងការសងជំងឺចិត្ត។ យើងខ្ញុំក៏យល់ឃើញថា អ្នកសារព័ត៌មានកម្ពុជា បានអនុវត្តតាមមាត្រា៥ នៃច្បាប់សារព័ត៌មាន ដែលចែងថា សារព័ត៌មាន មានសិទ្ធិទទួលព័ត៌មាន ដែលស្ថិតក្នុងការគ្រប់គ្រង របស់រាជរដ្ឋាភិបាល លើកលែងតែព័ត៌មានណា ដែលបណ្តាលឲ្យមានអន្តរាយ ដល់សន្តិសុខជាតិ អន្តរាយដល់ទំនាក់ទំនង ជាមួយប្រទេសដទៃ។ អាស្រ័យហេតុនេះ សូមតុលាការ មេត្តាពិចារណា ទម្លាក់បទចោទប្រកាន់នេះ ដោយក្តីអនុគ្រោះ៕ដោយ៖បញ្ញាស័ក្តិ
