គូស្នេហ៍វ័យក្មេង១គូ ត្រូវបានគេបាញ់សម្លាប់យ៉ាងឃោរឃៅ ស្ថិតនៅចំពោះមុខភ្ញៀវទេសចររាប់សិបនាក់ ទាំងកណ្តាលថ្ងៃត្រង់ នៅមុខកន្លែងទាក់ទាញទេសចរក្នុងតំបន់ភ្នំព្រះពុទ្ធរូប ក្នុងប្រទេសថៃ ។
គូស្នេហ៍នេះដែលបានដេកស្លាប់ក្បែរគ្នា កាលពីថ្ងៃអាទិត្យ ត្រូវបានគេស្គាល់ថា ខាងស្រីមានឈ្មោះ Paweena Nameuangrak អាយុ ២០ ឆ្នាំ និងខាងប្រុសឈ្មោះ Anantachai Jaritram អាយុ ២១ ឆ្នាំ ។
Paweena បានរងការបាញ់ប្រហារចំនួន ៤ គ្រាប់ ដោយគ្រាប់កាំភ្លើង 9mm ខណៈមិត្តប្រុសរបស់នាងត្រូវ ៣ គ្រាប់ ។ ប៉ូលីសបានរកឃើញសំបកគ្រាប់ ៦ គ្រាប់ និងឈាមយ៉ាងច្រើនរបស់ជនរងគ្រោះទាំងពីរនៅកន្លែងកើតហេតុ ។
សាកសពគូស្នេហ៍នេះបានដេកនៅជាប់រថយន្ត Toyota Innova ដែលពួកគេ និងមិត្តភក្តិ២នាក់ទៀត បានជួលក្នុងរយៈពេល១ថ្ងៃ ពីសណ្ឋាគារមួយ ដែលពួកគេកំពុងស្នាក់នៅក្នុងភាគខាងត្បូងទីក្រុង Pattaya ។
មិត្តភក្តិ២នាក់របស់ពួកគេមានឈ្មោះ Worathep Masoongngern អាយុ ២០ ឆ្នាំ និង Sayan Sreesuk ៤៣ ឆ្នាំ ពុំរងរបួសនោះទេ ។
តៃកុងរថយន្តឈ្មោះ Noppadol Bunsamer អាយុ ៣៣ ឆ្នាំ បាននិយាយថា ភ្ញៀវទេសចរទាំងនោះ បានជួលគាត់បើករថយន្តដឹកពួកគេដើរកម្សានជុំវិញតំបន់ទាក់ទាញទេសចរក្នុងទីក្រុង Pattaya ។ លោក Noppadol បន្តថា នៅពេលគូស្នេហ៍រងគ្រោះ គ្រាន់តែចុះពីរថយន្ត ដើម្បីញ៉ាំទឹក ស្រាប់តែស្នូរកាំភ្លើងបានផ្ទុះឡើងតែម្តង ។ ខណៈពេលនោះ គាត់បានក្រាបក្នុងកៅអីបើកបរទាំងភ័យខ្លាចបំផុត ។ ភ្ញៀវទេសចររាប់សិបនាក់បានរត់ស្រែកទាំងព្រលឹងចុងសក់ និងលាក់ខ្លួននៅខាងក្រោយរថយន្ត ហើយរបស់របរដទៃបានខ្ចាត់ខ្ចាយពីការបាញ់ប្រហារនេះ ។
មិត្តភក្តិរួមដំណើររបស់អ្នកទាំងពីរឈ្មោះ Worathep និយាយថា គូសេ្នហ៍នេះស្រលាញ់ធ្វើសង្សារនឹងគ្នាតាំងពីនៅរៀនវិទ្យាល័យមកម្លេះ ។ ពួកគេទាំងពីដែលមានស្រុកកំណើតរស់នៅខាងក្រៅតំបន់ Pattaya បានធ្វើសង្សារនឹងគ្នាអស់រយៈពេល ១០ ឆ្នាំ ហើយ ។ ពួកគេបានសម្រេចចិត្តទៅកាន់ Pattaya ដើម្បីប្រារព្ធខួបកំណើត Paweena កាលពីថ្ងៃអាទិត្យ និងឆ្លៀតឱកាសសម្រាប់ដំណើរកម្សាន៤ថ្ងៃនៅចុងសប្តាហ៍ ។ គាត់បាននិយាយថា មានបុរសៗជាច្រើនបានចាប់អារម្មណ៍នឹង Paweena យ៉ាងខ្លាំង ព្រោះថានាងជានារីស្រស់ស្អាតដ៏ទាក់ទាញម្នាក់ផងដែរ ។
ប៉ូលីសបានសង្ស័យថា ករណីនេះបានកើតឡើងជារឿងស្នេហាត្រីកោណ និងកំពុងតាមស្វែងរកអ្នកបើកបររថយន្ត Honda CRV ពាក់ស្លាកលេខ ก (gor) 5195 , ដែលគេជឿថាអំពើបាញ់ប្រហារបានកើតចេញពីរថយន្តនេះតែម្តង ។ ប៉ូលីសក៏បានស្នើសមាជិកសហគមន៍ក្នុងតំបន់ ជួយតាមដានរថយន្តនេះ ប៉ុន្តែ ត្រូវប្រុងប្រយ័ត្ន ព្រោះអ្នកបើកបរត្រូវបានចាត់ទុកថាមានអាវុធ និងអាចបង្កគ្រោះថ្នាក់ ៕ ឧត្តម (pattayaone, news.tnews)