ភ្នំពេញ ៖ អភិបាលរាជធានីភ្នំពេញ លោកឃួង ស្រេង កាលពីព្រឹកថ្ងៃទី៣១ កក្កដា ២០១៨នេះ បានដឹកមន្ត្រីរដ្ឋបាលរាជធានី មន្ត្រីជំនាញពាក់ព័ន្ធនិងអាជ្ញាធរដែនដី ខណ្ឌព្រែកព្នៅ ចុះសួរសុខទុក្ខនិងជំរុញ ឲ្យកសាងហេដ្ឋារចនាសម្ព័ន្ធជាច្រើន ដូចជា ការស្ថាបនាផ្លូវបេតុង បណ្តាញប្រព័ន្ធលូបង្ហូរទឹកស្អុយ ក្នុងមូលដ្ឋាន បណ្តាញអគ្គិសនី និងបង្គោលភ្លើង ជូនប្រជាពលរដ្ឋនៅសហគមន៍អណ្តូង ចំនួន៥សហគមន៍ ក្រោយពីប្រជាពលរដ្ឋបាននាំគ្នា ទៅបោះឆ្នោត យ៉ាងសស្រោកសស្រាំ កាលពីថ្ងៃ២៩ កក្កដា កន្លងមកនេះ។
លោកឃួង ស្រេង ក្នុងឱកាសនៃការសួរសុខទុក្ខនោះ ក៏បានបើកឲ្យដំណើរការឡត៍ដុតសំរាមមួយកន្លែង នៅសហគមន៍អណ្តូង ស្ថិតនៅក្នុងសង្កាត់គោករការ ខណ្ឌព្រែកព្នៅ រាជធានីភ្នំពេញ ដើម្បីបរិស្ថានល្អ សម្រាប់ប្រជាពលរដ្ឋរស់នៅសហគមន៍នេះ។ ក្រៅពីនោះលោកអភិបាលរាជធានីភ្នំពេញ ក៏បានជំរុញឲ្យមន្ទីរសាធារណការ និងដឹកជញ្ជូន រាជធានីភ្នំពេញ ស្ថាបនាលូ ផ្លូវបេតុង និងការតភ្លើងបំភ្លឺសាធារណៈជូន ប្រជាពលរដ្ឋនៅក្នុងសហគមន៍នេះ។
សហគមន៍ ចំនួន៥សហគមន៍ ដែលលោកអភិបាលរាជធានីភ្នំពេញបានចុះសួរសុខទុក្ខ និងយកចិត្តទុកដាក់នេះ រួមមានសហគមន៍អណ្តូង១ អណ្តូង២ សណ្តូង៤ សហគមន៍អណ្តូងថ្មីរុងរឿង និងសហគមន៍សុព័រ ស្ថិតក្នុងសង្កាត់គោករកា ខណ្ឌព្រែកព្នៅ ដែលជាសហគមន៍ ទទួលបានការយកចិត្តទុកដាក់ ពីអាជ្ញាធររាជធានីភ្នំពេញកន្លងមក។
ពាក់ព័ន្ធនឹងការបង្កើតឲ្យ ឡត៍ដុតសំរាមមួយកន្លែង នៅសហគមន៍អណ្តូងថ្មីរុងរឿង ស្ថិតនៅក្នុងសង្កាត់គោករការ ខណ្ឌព្រែកព្នៅនេះ បើតាមការបញ្ជាក់ឲ្យដឹងពីលោកភោគ សុខខឿន ប្រធានការិយាល័យបរិស្ថាន ខណ្ឌព្រែកព្នៅថា ឡត៍ដុតសំរាមនេះ បានបង្កើតឡើងដោយរដ្ឋបាលរាជធានីភ្នំពេញ ដើម្បីបរិស្ថានល្អ សម្រាប់ប្រជាពលរដ្ឋរស់នៅសហគមន៍នេះ ដោយក្នុង១ថ្ងៃ ឡត៍ដុតសំរាមនេះ អាចដុតសំរាម បានប្រមាណពី១តោនទៅ៣តោន ដែលអាចជួយធ្វើឲ្យសហគមន៍ខាងលើ អាចដោះស្រាយលើបញ្ហាសំរាមនេះបាន។
គួរបញ្ជាក់ផងដែរថា ក្រោយបញ្ចប់ការសួរសុខទុក្ខ និងចុះមើលពីស្ថានភាពរស់នៅ របស់បងប្អូនប្រជាពលរដ្ឋក្នុងសហគម៍ នទាំងប៉ុន្មានខាងលើហើយ លោកឃួង ស្រេង នូវបានបន្តដំណើរទៅពិនិត្យមើលការដ្ឋានធ្វើផ្លូវ ធ្វើលូ ឲ្យប្រជាពលរដ្ឋនៅក្នុងសហគមន៍សំរោងមានជ័យ ស្ថិតក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ បន្តទៀត ដោយលោកអភិបាល បានជំរុញឲ្យក្រុមការងារ ដែលទទួលការស្ថាបនាផ្លូវនិងលូខាងលើ ស្ថាបនាឲ្យបានលឿន ដើម្បីជួយសម្រួលការលំបាក ក្នុងការរស់នៅរបស់ប្រជាពលរដ្ឋ ក្នុងសហគមន៍នេះ។
សូមបញ្ជាក់ផងដែរថា ប្រជាពលរដ្ឋ ដែលកំពុងរស់នៅសហគមន៍ខាងលើ ជាប្រជាពលរដ្ឋដែលត្រូវ បានអាជ្ញាធររាជធានីភ្នំពេញ បញ្ជូនមកពីសហគមន៍មិនរៀបរយ នៅតំបន់ប៊ូឌីញ សំបុក្រចាប ដីក្រហម និងបុរីកីឡា តាំងពីអំឡុងឆ្នាំ២០០៦។ ប៉ុន្តែទោះបីជាយ៉ាងណាក្តីរហូត មកដល់បច្ចុប្បន្ន សហគមន៍ទាំងអស់នោះ ទទួលបានការអភិវឌ្ឍរីកចម្រើន ទាំង ផ្លូវ លូ ទឹក ភ្លើងបំភ្លឺ និងហេដ្ឋារចនា សម្ព័ន្ធជាច្រើនផ្សេងទៀត៕ ដោយ ៖ កូឡាប
