ភ្នំពេញ-ក្រុមហ៊ុនក្នុងស្រុកParkway Investment Co. , Ltd និងក្រុមហ៊ុនចិនNantong City Daxin Engineering (Cambodia)
នឹងរួមគ្នាបង្ហាញរូបរាងអគារកម្ពស់២៩ជាន់ ២៥ជាន់និង៣៥ជាន់ ដែលរួមបញ្ចូលគ្នានៅរចនាបទនៃស្ថាបត្យកម្មខ្មែរនិងរចនាបទសម័យទំនើបនឹងលេចចេញបង្អួតរាងនិងបង្កើនសោភណភាពរាជធានីភ្នំពេញនៅឆ្នាំ២០២០
ដែលមានទីតាំងនៅខណ្ឌទួលគោកនិងមានចំនួនរហូតដល់ ១៥០០យូនីត។
លោក សួ សុខថេង នាយកប្រតិបត្តិនៃក្រុមហ៊ុន ផាកវេ អ៊ិនវេសម៉ិនបានមានប្រសាសន៍ថា៖ គម្រោងអភិវឌ្ឍន៍នេះនឹងមានអគារចំនួន៣ដោយអគារទីមួយមាន២៩ជាន់ អគារទីពីរមាន២៥ ជាន់ និងអគារទី៣មានរហូតដល់៣៥ជាន់។អគារខុនដូទាំងមូលមានខុនដូទំនើបៗចំនួន១៥០០យូនីតដែលមានទំហំចាប់ពី ៤៥ម៉ែត្រការ៉េ ដល់១៣៥ ម៉ែត្រការ៉េ។
លោកសុខថេង បានមានប្រសាសន៍បន្ថែមថា៖ «ការវិនិយោគរបស់យើងសម្រាប់គម្រោងខុនដូទាំងនេះ មិនមែនសម្រាប់រយៈពេលខ្លីនោះទេប៉ុន្តែយើងធ្វើការវិនិយោគសម្រាប់រយៈពេលវែង ដោយយើងបានសម្លឹងឃើញអំពីកំណើនយ៉ាងឆាប់រហ័សនៃប្រជាជន ថ្នាក់កណ្តាលរួមជាមួយ និងប្រាក់ចំណូលរបស់ពួកគេដែលកើនឡើងផងដែរ ដូច្នេះហើយពួកគេប្រាកដជាចង់ធ្វើការផ្លាស់ប្តូរនូវរបៀបរស់នៅប្រចាំថ្ងៃ អោយកាន់តែមានភាពប្រសើរឡើង និងប្រកបដោយផាសុកភាព។ យើងជឿជាក់ថាចំនួនអ្នករស់នៅក្នុងរាជធានីភ្នំពេញនឹងកាន់តែមានចំនួនច្រើនឡើងៗ ហើយពួកគេនឹងជ្រើសរើសលំនៅស្ថានដែលនៅជិតទីក្រុងដើម្បីកាត់បន្ថយពេលវេលាធ្វើដំណើរការកកស្ទះចរាចរនិងកាត់បន្ថយឧបទ្ទវហេតុនៅតាមផ្លូវផងដែរ។
លោកបានបន្តឱ្យដឹងថា ជាន់និមួយៗនៃខុនដូបានបង្តើតនូវទីធ្លាសាធារណៈ សម្រាប់អ្នកស្នាក់នៅក្នុងអគារអាចឆ្លៀតពេលទំនេររបស់ពួកគេសម្រាកនិងរីករាយជាមួយនិងទេសភាពបៃតងនៅជុំវិញពួកគេ។ការអភិវឌ្ឍខុនដូនេះនឹងមានលក្ខណៈពិសេសពេញលេញសម្រាប់សតវត្សរ៍ទី២១នេះតែម្តងដោយរួមមានទាំងអាងហែលទឹកដ៏ធំទូលាយនិងកន្លែងហាត់ប្រាណ។នៅជាន់ផ្ទាល់ដីនឹងមានហាងទំនិញមួយដែលផ្តល់ជូននូវជម្រើសជាច្រើនដូចជាកន្លែងទទួលទានអាហារកន្លែងកម្សាន្តនិងកន្លែងទិញទំនិញជាច្រើនទៀត។ អគារនេះក៏មានសាលារៀនតូចមួយសម្រាប់ការប្រើប្រាស់ផ្តាច់មុខសម្រាប់កូនៗរបស់អ្នករស់នៅទីនោះផងដែរ។
លោក ម៉ា ហេជុន ប្រធានក្រុមប្រឹក្សាភិបាលនៃក្រុមហ៊ុនDaxin Engineering បានលើកឡើងថា៖ កម្ពុជាមានស្ថិរភាពនយោបាយ សេដ្ឋកិច្ចកម្ពុជារីកលូតលាស់ ជីឌីភីកើនវិស័យអចលនទ្រព្យរីកចម្រើនដូចប្រទេសចិនកាលពី២០ឆ្នាំមុន ដូច្នេះនេះជាពេលវេលាសមស្របដើម្បីវិនិយោគទុនលើវិស័យសំណង់ក៏ដូចជាអចលនទ្រព្យ»។
លោកបានបញ្ជាក់ផងដែរថាក្រុមហ៊ុន Daxin Engineering ជាក្រុមហ៊ុនចិនដែលមានជំនាញវិស្វកម្ម និងសំណង់ដែលឈានមុខគេនៅក្នុងប្រទេសចិន។ សម្តេចក្រឡាហោម ស ខេង បានចាត់ទុកវត្តមាននៃគំរោង The Parkway Investment គឺជាសមិទ្ធិផលថ្មីមួយទៀតនៅក្នុងរាជធានីភ្នំពេញនៃទីផ្សារវិស័យអចលនទ្រព្យនៅកម្ពុជា ដែលជាវិស័យកំពុងតែពង្រីកខ្លួនបោះជំហានទៅមុខជាលំដាប់យ៉ាងឆាប់រហ័ស។ជាងនេះទៀត គំរោងនេះ គឺជាការឆ្លើយតបដ៏សមស្របទៅនិងសភាពការណ៍ វិវត្តន៍នៃសេដ្ឋកិច្ចកម្ពុជា និងជាកត្តារួមចំណែកធ្វើឱ្យប្រជាពលរដ្ឋមានជំរើសកាន់តែច្រើនឡើងក្នុងការទទួលបាននូវលំនៅដ្ឋានរស់នៅប្រកបដោយគុណភាព បរិយាកាសល្អសោភណ្ឌភាពសុខមាលភាព ជាមួយតំលៃកាន់តែប្រកួតប្រជែង ជាពិសេសឆ្លើយតបនិងកំណើនតម្រូវការ នៃប្រណិតភាពសំរាប់ការរស់ នៅតាមបែបទាន់សម័យ នាពេលបច្ចុប្បន្ននេះ។
សូមបញ្ជាក់ថា កាលពីព្រឹកថ្ងៃទី១៨ ខែវិច្ឆិកា ២០១៧ ខុនដូទំនើបមួយមាន៣អគារកម្ពស់២៩ជាន់ ២៥ជាន់និង៣៥ជាន់ បានត្រូវបើកសម្ពោធជាផ្លូវការនូវការិយាល័យតាំងបង្ហាញអគារគំរូរបស់ខ្លួន ដោយមានការអញ្ជើញចូលរួមពីសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ៕ ដោយ-ក្រុមហ៊ុន
