ស្ថានទូតថៃនៅក្រុងឡុងដ៍ បានដាក់សំណើមួយទៅកាន់ការិយាល័យកិច្ចការបរទេសរបស់រដ្ឋាភិបាលអង់គ្លេស ដើម្បីស្នើសុំធ្វើបត្យាប័នអតីតនាយករដ្ឋមន្ត្រីលោកស្រី យីងឡាក់ ស៊ីណាវ៉ាត្រា ដើម្បីមកទទួលទោសជាប់ពន្ធនាគាររយៈពេល ៥ ឆ្នាំ ដែលត្រូវបានប្រកាសដោយតុលាការកំពូល សម្រាប់អ្នកកាន់មុខតំណែងនយោបាយ ដែលពាក់ព័ន្ធនឹងគម្រោងសន្យាទិញស្រូវរបស់រដ្ឋាភិបាលរបស់លោកស្រី ។ នេះបើយោងតាមគេហទំព័រជាភាសាថៃរបស់ BBC រាយការណ៍ឲ្យដឹង ។
លិខិតស្នើសុំចុះថ្ងៃទី៥ ខែកក្កដា ឆ្នាំ ២០១៨ បានលើកឡើងពីសន្ធិសញ្ញារវាងចក្រភពអង់គ្លេស និងសៀម ស្តីពីការធ្វើបត្យាប័នឧក្រិដ្ឋជនដែលរត់គេចខ្លួន ដែលបានចុះហត្ថលេខានៅទីក្រុងបាងកកនៅថ្ងៃទី៤ ខែមីនា ឆ្នាំ ១៩១១ ។
លិខិតនោះបាននិយាយថា លោកស្រី យីងឡាក់ គឺជាមនុស្សម្នាក់ដែលអាជ្ញាធរថៃចង់បាន ដើម្បីមកទទួលទោសជាប់ពន្ធនាគាររយៈពេល ៥ ឆ្នាំ ដែលត្រូវបានប្រកាសដោយតុលាការកំពូល សម្រាប់បុគ្គលកាន់កាប់តំណែងនយោបាយ ដែលបានរកឃើញថា នាងមានពិរុទ្ធពីបទរំលោភលើផ្នែកទី ១៥៧ នៃក្រមព្រហ្មទណ្ឌ និងផ្នែក 123 / 1 នៃច្បាប់ទប់ស្កាត់ និងបង្ក្រាបអំពើពុករលួយរបស់ BE 2442 (1999) ។
លិខិតនោះបន្តឲ្យដឹងទៀតថា ដីកាចាប់ខ្លួនលោកស្រីត្រូវបានចេញចាប់តាំងពីថ្ងៃទី២៧ ខែកញ្ញា ឆ្នាំ២០១៧ នៅពេលដែលតុលការបានចេញសេចក្តីសម្រេចរបស់ខ្លួន ។
លោកស្រី Busadee Santipitaks អ្នកនាំពាក្យក្រសួងការបរទេស ដែលនៅពេលនោះបានសួរនាំអំពីបញ្ហានេះ បាននិយាយថា អង្គភាពផ្លូវការថៃកំពុងធ្វើការទៅលើសំណើរសុំធ្វើបត្យាប័ននេះ ។
នៅពេលសួរថាតើសំណើរផ្លូវការត្រូវបានបញ្ជូនទៅកាន់រដ្ឋាភិបាលអង់គ្លេស អ្នកស្រី Busadee និយាយថា វា «ជាការរំខាន» សម្រាប់នាង ក្នុងការឆ្លើយតបឥឡូវនេះ ព្រោះលោកស្រីជាប់រវល់ជួយពលរដ្ឋថៃ ដែលរងផលប៉ះពាល់ដោយគ្រោះរញ្ជូយដីនៅក្នុង Lombok ប្រទេសឥណ្ឌូនេស៊ី ។
គេហទំព័រ BBC និយាយថា បាននិយាយថា ការិយាល័យបរទេសរបស់រដ្ឋាភិបាលចក្រភពអង់គ្លេស ក៏បានបដិសេធមិនធ្វើអត្ថាធិប្បាយលើបញ្ហានេះ ហើយបញ្ជូនលិខិតនេះទៅការិយាល័យរដ្ឋាភិបាល ។
ការិយាល័យរបស់រដ្ឋាភិបាលអង់គ្លេស បានឆ្លើយតបតាមសារអេឡិចត្រូនិចថា វាជាគោលនយោបាយរបស់ខ្លួន និងបែបបទនៃការអនុវត្ត មិនត្រូវបញ្ជាក់ ឬបដិសេធថាតើការិយាល័យនោះបានទទួលការស្នើសុំធ្វើបត្យាប័ននរណាម្នាក់ រហូតទាល់តែជននោះត្រូវបានចាប់ខ្លួន ៕ ឧត្តម (englishnews.thaipbs.or.th)