ក្រោយពេលលោក យូនីស្កូ ត្រូវបានសប្បុរសជនទាំងក្នុង និងក្រៅស្រុក ជ្រាបអំពីជម្ងឺដ៏ធ្ងន់ធ្ងរបស់លោក លោកក៏ត្រូវបានទទួលនូវសេចក្ដីអាណិត ព្រមទាំងទទួលបានថវិការមួយចំនួនដើម្បីព្យាបាល ហើយរហូតមកទល់ពេលនេះខណៈដែលបានចេញទៅព្យាបាលវះកាត់ប្តូរក្រលៀននៅឥណ្ឌា ត្រូវបានគេផ្ដល់ដំណឹងមកថា តារាសម្ដែងល្បីល្បាញនាអំឡុងឆ្នាំ២០០០ ខាងលើបានប្រសើរជាងមុនហើយ និងត្រៀមហោះហើរមកកម្ពុជាវិញនាពេលឆាប់ៗខាងមុខនេះ ។
គួរបញ្ជាក់ថា លោក យូនីស្កូ មានជម្ងឺខូចក្រលៀនរ៉ាំរ៉ៃយូរណាស់មកហើយ ហើយនៅទីបំផុតលោកក៏មិនមានលទ្ធភាពព្យាបាលបន្តដោយសារក្រលៀនរបស់លោក ចាំបាច់ត្រូវតែវះកាត់ដើម្បីប្ដូរ ខណៈដែលការព្យាបាលថ្លៃលើសលប់ធ្វើឱ្យលោក និងគ្រួសារអស់លទ្ធភាព ទើបបណ្ដោយតាមយថាកម្ម ។
ក្រោយមកទៀត ស្ថានភាពរបស់ យូនីស្កូ ត្រូវបានអ្នកដែលស្គាល់លោកពីមុនមកជាច្រើននាក់ ទាំងក្នុង និងក្រៅប្រទេសនាំគ្នាជួយ ព្រមទាំងមានការខ្នះខ្នែងពីសមាគមន៍សិល្បៈផងនោះ ទើបលោកអាចមានលទ្ធភាពចេញទៅវះកាត់ក្រលៀននៅប្រទេសឥណ្ឌា កាលពីខែឧសភា ឆ្នាំ ២០១៨ កន្លងទៅ ហើយរហូតមកទល់ពេលនេះ ស្ថានភាពរបស់លោកត្រូវបានគេដឹងថា ប្រសើរឡើងវិញហើយ ៕ សាវុធ