រថយន្តទំនើបៗម៉ាកល្បីៗ Lamborghini, Porsche, Mercedes Benz, Harley Davidson, Triumph និង Chopper ចំនួន ៦៨គ្រឿង (រថយន្ត) និងម៉ូតូទំនើប ៨គ្រឿង នៅថ្ងៃទី ៣០ ខែកក្កដា បានត្រូវត្រាក់ទ័រកិនកម្ទេចចោល ក្រោមអធិបតេយ្យរបស់ប្រធានាធិបតី ហ្វីលីពីន Rodrigo Duterte ។
តាម Telegraph ព្រឹត្តិការណ៍នេះ បានកើតឡើងនៅថ្ងៃទី ៣០ ខែកក្កដា នាខេត្ត Cagayan ប្រទេសហ្វីលីពីន ហើយយានយន្តទំនើបៗ ដែលត្រូវកម្ទេចចោលទាំងនោះ មានតម្លៃសរុបប្រមាណជិត ៤លានដុល្លារ ។
លោក Duterte ពោលថា ៖ ការកិនកម្ទេចវាចោល តែម្តងគឺដើម្បី “បញ្ជាក់ប្រាប់ពិភពលោកថា ហ្វីលីពីន មានបរិស្ថានវិនិយោគ និងអាជីវកម្មតម្លាភាព” ។
នេះពុំមែនជាលើកទី១ទេ ដែលប្រធានាធិបតីប្រទេសនេះ បានចេញបញ្ជាឲ្យធ្វើបែបនេះនោះ ។ កាលពីខែកុម្ភៈដើមឆ្នាំលោកក៏បានឲ្យកិនកម្ទេចរថយន្តទំនើប ៣០គ្រឿងមកហើយដែរ តែនៅមិនរាងចាល ។
មានការលើកឡើងថា គួរលក់ដេញថ្លៃ ដើម្បីប្រមូលថវិការជូនជាតិ ជាជាងការកិនកម្ទេច ប៉ុន្តែលោកបានការពារសកម្មភាពនេះដោយថា ៖ ការលក់ដេញថ្លៃបែបនេះ នឹងបង្កឲ្យពួកឈ្មួញរត់ពន្ធទុច្ចរិក មានឱកាស ទិញយកមកវិញ ឲ្យរថយន្តទាំងនោះ… ដោយស្របច្បាប់ ! ៕ ចន្ទ្រា