ភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានចេញប្រកាសព័ត៌មាន អំពីចំនួនពាក្យបណ្តឹងពាក់ព័ន្ធនឹងការបោះឆ្នោត និងរាប់សន្លឹកឆ្នោត ក្នុងការបោះឆ្នោតជាតិជ្រើស តំណាងរាស្រ្តអាណត្តិទី៦ ឆ្នាំ២០១៨។បើតាមគ.ជ.ប គិតត្រឹមថ្ងៃទី១ខែសីហា ឆ្នាំ២០១៨ ពាក្យបណ្តឹងពាក់ព័ន្ធនឹងការបោះឆ្នោត និងការរាប់សន្លឹកឆ្នោត មានចំនួន ២៥២៥បណ្តឹង ក្នុងនោះមាន គណបក្សប្រជាជនកម្ពុជា៣បណ្តឹង គណបក្សសម្ព័ន្ធដើម្បីប្រជាធិបតេយ្យមាន ២៥២០ និងគណបក្សប្រជាធិបតេយ្យមូលដ្ឋានមាន២បណ្តឹង។ ក្នុងចំណោមបណ្តឹងទាំងនោះ មានបណ្តឹងសុំឱ្យផ្តន្ទាទោសចំនួន៣៤បណ្តឹង និងបណ្តឹងពាក់ព័ន្ធនឹងការបោះឆ្នោត និងការរាប់សន្លឹកឆ្នោត២៤៩១បណ្តឹង។ ជាលទ្ធផល គឃ.សប បានចេញសេចក្តីសម្រេច បដិសេធចំនួន១៨៦៩បណ្តឹង ផ្សះផ្សាសះជាចំនួន២០បណ្តឹង ផ្សះផ្សាមិនសះជាចំនួន១បណ្តឹង លិខិតជូនដំណឹងចំនួន១បណ្តឹង ចារបដិសេធចំនួន៩២បណ្តឹង ដើមបណ្តឹងសុំដកពាក្យបណ្តឹងចំនួន២៦បណ្តឹង និងកំពុងដោះស្រាយចំនួន៥១៦បណ្តឹង។
ក្នុងចំណោមមណ្ឌលបោះឆ្នោតទាំង២៥រាជធានីខេត្ត មានមណ្ឌលចំនួន២ ដែលមិនមានពាក្យបណ្តឹង គឺមណ្ឌលខេត្តព្រះសីហនុ និងមណ្ឌលខេត្តព្រះវិហារ។
លោក សោម សូរីដា អគ្គលេខាធិការរងគណៈកម្មាធិការជាតិរៀបចំការបោះឆ្នោត (គ.ជ.ប) នៅរសៀលថ្ងៃទី១ ខែសីហា ឆ្នាំ២០១៨នេះ បានអះអាងថា ទោះបីជាមានបណ្តឹងដល់ទៅជាង២០០០ ដែលប្តឹងមកគ.ជ.ប ក៏មិនធ្វើឲ្យប៉ះពាល់ដល់ការប្រកាសលទ្ធផលបោះឆ្នោត បណ្តោះអាសន្ន និងផ្លូវការ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៦ កាលពីថ្ងៃអាទិត្យ ទី២៩ ខែកក្កដា ឆ្នាំ២០១៨ នោះដែរ។ បណ្តឹងទាំងអស់ដែលបានដាក់មកគ.ជ.ប មានចំនួន ២៥២៥បណ្តឹង។ ជាមួយគ្នានេះ គណបក្សដែលដាក់ពាក្យបណ្តឹងរួមមាន៖ គណបក្សសម្ព័ន្ធដើម្បីប្រជាធិបតេយ្យ, គណបក្សប្រជាជនកម្ពុជា, និងគណបក្សប្រជាធិបតេយ្យមូលដ្ឋាន។ គណបក្សសម្ព័ន្ធដើម្បីប្រជាធិបតេយ្យ បានប្តឹងរហូតដល់២៥២០បណ្តឹង ហើយគណបក្សប្រជាជនកម្ពុជា និងគណបក្សប្រជាធិបតេយ្យមូលដ្ឋាន មានត្រឹមតែ ៥បណ្តឹងតែប៉ុណ្ណោះ។ លោកបន្ថែមថា ទោះបីជាមានបណ្តឹងច្រើនយ៉ាងនេះក៏ដោយ គ.ជ.ប នៅតែអាចប្រកាសលទ្ធផលបណ្តោះអាសន្ន និងផ្លូវការនៃការបោះឆ្នោត បានទាន់ពេលវេលាដែរ៕ ដោយ ៖ កូឡាប