គេហទំព័រ Shanghaiist បានរាយការណ៍ថា ក្មេងស្រីអាយុ ២ ឆ្នាំ បានធ្លាក់ពីអគារផ្ទះល្វែងជាន់ទី១៧ ប៉ុន្តែ ជីវិតនាងតូចពិតជាថ្លៃណាស់ ពុំស្លាប់ និងបានងើបដើរធម្មតា ជាមួយរបួសមិនធ្ងន់ធ្ងរ ដែលនេះជារឿងអម្ពូតហេតុមួយដ៏អស្ចារ្យបំផុត ។
ក្មេងស្រីតូចនេះត្រូវបានស្គាល់ថាមានឈ្មោះ Yueyue រស់នៅជាមួយគ្រួសាររបស់នាងនៅក្នុងផ្ទះល្វែងមួយនៅក្នុង Changzhou ខេត្ត Jiangsu ប្រទេសចិន ។ នៅថ្ងៃទី១១ ខែកក្កដា ឆ្នាំ២០១៨ Yueyue ត្រូវបានយាយរបស់នាងទុកឲ្យនៅក្នុងផ្ទះម្នាក់ ខណៈគាត់ចេញទៅខាងក្រៅដើម្បីគ្រឿងធ្វើម្ហូបមួយចំនួន ។
នៅពេលនាងតូចបានភ្ញាក់ពីគេង នាងក៏បានដើររកមើលលោកយាយរបស់នាងនៅជុំវិញផ្ទះ ប៉ុន្តែ ដោយសារតែរកលោកយាយរបស់នាងពុំឃើញ នាងតូចក៏បានឡើងទៅលើតុកុំព្យួទ័រ ដើម្បីអើតមើលតាមបង្អួច ដែលពុំត្រូវបានចាក់សោ ប៉ុន្តែ នៅពេលនោះ Yueyue ស្រាប់តែធ្លាក់ចុះពីជាន់ទី១៧ ដ៏ពុំនឹកស្មាន ។
ប្រភពព័ត៌មានបានបញ្ចេញឲ្យដឹងថា សំណាងណាស់ ដែលការធ្លាក់របស់នាងត្រូវបាន«រង»ដោយមែកឈើ ហើយនាងបានបន្តធ្លាក់ចុះនៅលើបំណះស្មៅដែលមានដីទន់ទើបត្រូវបានស្រោចទឹកថ្មី បានជួយកាត់បន្ថយការប៉ះទង្គិចនៃការធ្លាក់របស់នាង ។
បន្ទាប់ពីការធ្លាក់ Yueyue បានក្រោកឡើងដ៏អស្ចារ្យ និងដើរចូលក្នុងអគារផ្ទះវិញ ខណៈស្រែកយំរកលោកយាយរបស់នាង ។ សំណាងល្អ ដែលលោកយាយរបស់នាងបានវិលត្រលប់ទាន់ពេលនោះ នៅពេលដែលអ្នកជិតខាងបានកំពុងជួយសម្រួលភាពឈឺចាប់ និងប្រកាសរកឪពុកម្តាយរបស់នាង បន្ទាប់ពីបានដឹងថា នាងទើបត្រូវបានធ្លាក់ពីជាន់ទី១៧ ។
ពួកគេបានប្រញាប់ប្រញាល់នាំយក Yueyue ទៅកាន់មន្ទីរពេទ្យ ដើម្បីឲ្យគ្រូពេទ្យត្រួតពិនិត្យស្ថានភាពរបស់នាង ហើយនាងត្រូវបានព្យាបាលសម្រាប់ការប៉ះទង្គិចថ្លើម និងការបាក់ឆ្អឹងជំនីរស្រាល ដែលជាលទ្ធផលនៃការធ្លាក់របស់នាង ៕ ចន្ទី (worldofbuzz)
