បុរសជាភ្ញៀវទេសចរម្នាក់ ត្រូវបានខាំហែកហួររហូតស្លាប់ ដោយសត្វខ្លាចំនួន ៣ ក្បាល នៅចំពោះមុខប្រពន្ធ និងកូនរបស់គាត់ដែលមានការស្លុតរន្ធត់យ៉ាងខ្លាំង បន្ទាប់ពីផ្លោះចូលក្នុងទ្រុងខ្លា ព្រោះតែដើម្បីគេចពីបង់ថ្លៃចូលទស្សនាសួនសត្វ ។
សារព័ត៌មានចិនបាននិយាយថា ជនរងគ្រោះមានឈ្មោះថា Zhang បានឡើងលើរបងទ្រុងខ្លា ដើម្បីគេចផុតពីការបង់ថ្លៃចូលទស្សនាសត្វព្រៃតម្លៃ ១៥ ផោនដ៏ (ប្រមាណ ២០ ដុល្លារ) ។ ប៉ុន្តែ នៅពេលគាត់បានលោតចូលក្នុងរណ្តៅមួយ ស្រាប់តែសត្វទាំងនោះចាប់ផ្តើមសង្គ្រប់លើគាត់តែម្តង ខណៈប្រពន្ធ និងកូនៗរបស់គាត់ សម្លឹងមើលក្នុងក្តីរន្ធត់បំផុត ។
ពួកអ្នកមើលថែសួនសត្វដែលពុំអាចជួយបាន បានប្រញាប់ប្រញាល់រិះរកមធ្យោបាយជួយសង្គ្រោះអ្នកទេសចររូបនេះ បន្ទាប់ពីគាត់បានឡើងចូលក្នុងទ្រុង នៃសួនសត្វ Ningbo Younger នៅក្នុងប្រទេសចិន ក្នុងអំឡុងពេលឲ្យចំណី ។
វីដេអូដ៏ស្លុតរន្ធត់បានបង្ហាញឲ្យឃើញបុរសនោះ រុំព័ទ្ធដោយការឈឺចាប់នៅលើដី ខណៈសត្វខ្លាកំពុងវាយប្រហារខាំហែកហួរគាត់ ជាមួយនឹងចង្កូមដ៏មុតស្រួចរបស់ពួកវា ។
ក្នុងប្រតិបត្តិការដេញបង្អើលពួកវាចេញពីជនរងគ្រោះ ពួកអ្នកមើលថែសួនសត្វ បានប្រើប្រាស់កាំជ្រួច និងកាំភ្លើងបាញ់ទឹក ។ ប៉ុន្តែ កិច្ចខិតខំប្រឹងប្រែងរបស់ពួកគេត្រូវបានបរាជ័យ ហើយខ្លា១ក្បាលក្នុងចំណោមនោះ ត្រូវបានបាញ់សម្លាប់ផងដែរ ។
បុរសអាយុ ៤០ ឆ្នាំ រូបនេះ ត្រូវបានគេបញ្ជូនទៅសង្គ្រោះនៅឯមន្ទីរពេទ្យភ្លាមៗផងដែរ ប៉ុន្តែ វាហួសពេលទៅហើយ ព្រោះគាត់បានស្លាប់ដោយសារតែរបួសដ៏ធ្ងន់ធ្ងរ ។ នេះជាលទ្ធផលចង់សប្បាយ តែមានគំនិតគេងចំណេញប្រាក់បន្តិចបន្តួចដ៏គួរឲ្យសោកស្តាយ ៕ ឧត្តម (dailystar.co.uk)
