ភ្នំពេញ ៖ នាយឧត្តមសេនីយ៍ មាស វិរិទ្ធ បានថ្លែងថា បញ្ហាគ្រឿងញៀនពិភពលោក មិនមានសញ្ញាថមថយទេ ដោយឧក្រឹដ្ឋជននៅតែប្រើប្រាស់កលល្បិច កាន់តែពិសពុលជាងមុនក្នុងការចរាចរដឹកជញ្ជូនគ្រឿងញៀនខុសច្បាប់ ទៅកាន់ទីផ្សារប្រើប្រាស់។
លោក នាយឧត្តមសេនីយ៍ មាស វិរិទ្ធ អគ្គលេខាធិការនៃអគ្គលេខាធិការដ្ឋាន អាជ្ញាធរជាតិ ប្រយុទ្ធប្រឆាំងគ្រឿងញៀន មានប្រសាសន៍បែបនេះ នៅកិច្ចប្រជុំ ពិនិត្យលើសេចក្ដីព្រាងរបាយការណ៍ ស្ដីពីលទ្ធផលការងារត្រួតពិនិត្យគ្រឿងញៀន ឆមាសទី១ ឆ្នាំ២០១៨ និងលើកទិសដៅ ឆមាសទី២ ឆ្នាំ២០១៨ ។
អគ្គលេខាធិការដ្ឋាន អាជ្ញាធរជាតិ ប្រយុទ្ធប្រឆាំងគ្រឿងញៀន បានលើកឡើងថា របៀបវារៈ នៃកិច្ចប្រជុំមានៈ ១.មតិសំណេះសំណាលនិងថ្លែងអំណរគុណចំពោះក្រុមចុះជួយការងារបក្សគ្រប់មូលដ្ឋាន នៅក្នុងអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន ។ ២.ត្រួតពិនិត្យលើការរៀបចំសេចក្ដីព្រាងផែនការជាតិ៥ឆ្នាំ ស្ដីពីការត្រួតពិនិត្យគ្រឿងញៀន ឆ្នាំ២០១៩-២០២៣ ដោយនាយកដ្ឋានផែនការ និងបណ្ដុះបណ្ដាល ។ ៣.ការត្រៀមលក្ខណៈរៀបចំកិច្ចប្រជុំទ្វេភាគី កម្ពុជា-ថៃ ដោយនាយកដ្ឋានសហប្រតិបត្តិការអន្តរជាតិ ។ ៤.ឆ្លងរបាយការណ៍ ស្ដីពីលទ្ធផលការងារត្រួតពិនិត្យគ្រឿងញៀនឆមាសទី១ ឆ្នាំ២០១៨ និងទិសដៅការងារ ឆមាសទី២ឆ្នាំ២០១៨ ។
ក្នុងឱកាសនោះដែរ នាយឧត្តមសេនីយ៍ មាស វិរិទ្ធ បានបន្ថែមទៀតថា តាមរយ:សកម្មភាពខាងលើកម្ពុជា នៅតែបន្តទទួលរងផលប៉ះពាល់ ពីការចរាចរគ្រឿងញៀន ឆ្លងកាត់ពីបណ្តាប្រទេសនានា ទាំងក្នុងអនុតំបន់ តំបន់ និងអន្តរជាតិ។
សូមបញ្ជាក់ថា បើតាមរបាយការណ៍លទ្ធផលការងារត្រួតពិនិត្យគ្រឿងញៀនឆមាសទី១ អាជ្ញាធរជាតិ និងវិស័យឯកជន បានបញ្ជូនសារអប់រំពីគ្រោះថ្នាក់ នៃគ្រឿងញៀនដល់ប្រជាពលរដ្ឋបានជាច្រើនលាននាក់ ពង្រីកសេវាព្យាបាលអ្នកញៀនគ្រឿងញៀន តាមប្រព័ន្ធសុខាភិបាលមានមន្ទីរពេទ្យជាតិ មន្ទីរពេទ្យបង្អែក មណ្ឌលសុខភាពបានចំនួន៤១៩កន្លែង បង្ក្រាបបទល្មើសចំនួន៣៦៣០ករណី ៕ ដោយ ៖ បញ្ញាស័ក្តិ
