ស្ត្រីទេសចរជនជាតិអង់គ្លេសម្នាក់ ដែលបានវាយមកលើមន្ត្រីអន្តោប្រវេសន៍ម្នាក់ ត្រូវបានចាប់ខ្លួនហើយ នៅក្នុងប្រទេសឥណ្ឌូនេស៊ី ហើយកំពុងប្រឈមនឹងបទព្រហ្មទណ្ឌ ។ នេះបើយោងតាមអគ្គនាយកដ្ឋានអន្តោប្រវេសន៍ឥណ្ឌូនេស៊ីឲ្យដឹង ។
កាសែត Daily Mirror បានរាយការណ៍ថា ស្ត្រីឈ្មោះ Auj-e Taqaddas អាយុ ៤២ ឆ្នាំ បានមកដល់អាកាសយានដ្ឋានអន្តរជាតិ Ngurah Rai នៅកោះបាលី តែត្រូវបានគេប្រាប់ថា នាងនឹងត្រូវការបង់ប្រាក់ ៤,០០០0 ដុល្លារ បន្ទាប់ពីបានស្នាក់នៅហួសទិដ្ឋាការកំណត់របស់នាង ដែលបានផុតកំណត់នៅថ្ងៃទី១៨ ខែកុម្ភៈ ឆ្នាំ ២០១៨ ។
ច្បាប់ឥណ្ឌូនេស៊ីបានចែងថា អ្នកស្នាក់នៅហួសកំណត់ត្រូវបង់ប្រាក់ ២៤ ដុល្លារ ក្នុងមួយថ្ងៃ សម្រាប់ការស្នាក់នៅរយៈពេល ១៦០ ថ្ងៃ នៅក្នុងប្រទេសនេះ ដោយខុសច្បាប់ ។
វីដេអូរាលដាលមួយបង្ហាញឲ្យឃើញស្ត្រីដែលមានកំហឹងរូបនេះ បានទះកំផ្លៀងមន្ត្រីអន្តោប្រវេសន៍ម្នាក់ ខណៈពេលដែលគាត់បានពន្យល់ពីស្ថានភាពនេះទៅនាង ។
ស្ត្រីរូបនេះបានខកជើងហើររបស់ក្រុមហ៊ុនអាកាសចរណ៍ Jetstar Airlines វេលាម៉ោង ១១ និង ២៩ នាទីយប់ និងត្រូវបានឃាត់ខ្លួននៅក្នុងបន្ទប់ឃុំឃាំងអន្តោប្រវេសន៍ ចាប់តាំងពីថ្ងៃសៅរ៍ ខណៈដែលការទូទាត់ និងការពិន័យ ត្រូវបានដំណើរការ ។
នៅក្នុងវីដេអូនោះ Taqaddas ត្រូវបានគេលឺនិយាយថា៖ «ដោយសារអន្តោប្រវេសន៍ល្ងីល្ងើរបស់លោកឯង បានជាធ្វើឲ្យខ្ញុំខកខានការហោះហើររបស់ខ្ញុំ ដូច្នេះ ចូរយកលុយភ្លីភ្លើនេះ និងថយចេញទៅ….» ។
ទោះយ៉ាងណា ជោគវាសនារបស់ស្ត្រីរូបនេះ ពុំទាន់ដឹងច្បាស់យ៉ាងណានោះទេ ខណៈពេលដែលរឿងរ៉ាវរំលោភបំពានទាំងពីរករណីនេះ (ទាំងលើមន្ត្រីអន្តោប្រវេសន៍ និងទិដ្ឋាកាផុតកំណត់) នឹងត្រូវតែដោះស្រាយ មុនពេលនាងត្រូវបានអនុញ្ញាតឲ្យវិលត្រឡប់ទៅស្រុកកំណើតវិញ ៕ ឧត្តម (nextshark)