ខេត្តស្វាយរៀង៖ ប្រុសស្រីជនជាតិចិន២នាក់បានរងរបួសស្រាល ដោយសង្ស័យងងុយដេក និងស្រវឹងស្រាបានបើករថយន្តហាយលែនឌ័មួយគ្រឿងដូចហោះ ទៅបុករបង និងបន្តទៅបុកជញ្ជាំងផ្ទះរបស់ប្រជាពលរដ្ឋយ៉ាងពេញទំហឹងលាន់សូរកក្រើកដី បង្កឱ្យមានការភ្ញាក់ផ្អើលដល់អ្នកភូមិកំពុងដេកលង់លក់ក្នុងដំណេក ចេញមកមើលទាំងភិតភ័យព្រលឹងចុងសក់ ។
ហេតុការណ៏ខាងលើនេះ បានកើតឡើងកាលពីវេលាម៉ោង ៣ ទៀបភ្លឺឈានចូលថ្ងៃទី៣ ខែសីហា ឆ្នាំ២០១៨ ស្ថិតក្នុងភូមិលាប ឃុំកណ្ដៀងរាយ ស្រុកស្វាយទាប ខេត្តស្វាយរៀង ។ សំណាងល្អអ្នកបើករថយន្ត និងអ្នករួមដំណើររងរបួសស្រាល និងមិនមានគ្រោះថ្នាក់ដល់អ្នកភូមិ។
យោងតាមសាក្សីបានអោយដឹងថា មុនកើតហេតុមានរថយន្តម៉ាកហាយលេនឌ័រពណ៏ត្រីឆ្លូញមួយគ្រឿងពាក់ស្លាកលេខភ្នំពេញ២W៣៨០៧ បើកបរដោយបុរសជនជាតិចិន និងស្ត្រីម្នាក់មិនត្រូវបានស្គាល់អត្តសញ្ញាណ បានធ្វើដំណើរលើកំណាត់ផ្លូវជាតិលេខ១ក្នុងទិសដៅពីលិចមកកើត ស្រាប់តែរ៉េចង្កូតរថយន្តមកបុករបងថ្មពេញទំហឹង ខណៈមិនទាន់អស់ល្បឿនក៏បានបន្តទៅបុកជញ្ជាំងផ្ទះអ្នកភូមិតែម្ដង។
ប្រភពដដែលបានឱ្យដឹងទៀតថា ក្រោយមកអ្នកភូមិក៏ដូចជាម្ចាស់ផ្ទះបានចេញមកមើល និងរាយការណ៍ មកសមត្ថកិច្ចមូលដ្ឋានមកអន្តរាគមន៍ភ្លាមៗ និងឃើញប្រុសស្រី២នាក់ចេញពីក្នុងរថយន្តទាំងត្រដាបត្រដួស ។ សំណាងល្អមិនមានអ្នកភូមិរងគ្រោះថ្នាក់អ្វីនោះឡើយ។
លុះព្រឹកឡើងសមត្ថកិច្ចបានមកធ្វើការវាស់វែង និងអោយម្ចាស់ផ្ទះនិងភាគីម្ចាស់រថយន្តធ្វើការដោះស្រាយសម្របសម្រួលគ្នាចេញថ្លៃខូចខាត ដោយមិនបានអូសមកអធិការដ្ឋាននគរបាលស្រុកស្វាយទាបនោះទេ៕ វ៉ៃកូ