តាមក្យូដូដែលដកស្រង់ប្រភពព័ត៌មានការទូតនៅថ្ងៃទី៣ ខែសីហាឱ្យដឹងថាប្រមុខការទូតកូរ៉េខាងជើងបានអំពាវនាវបន្ធូរបន្ថយវិធានការដាក់ទណ្ឌកម្មអន្ដរជាតិមកលើប្រទេសខ្លួន ដោយទាញយកទឡ្ហីករណ៍ពីការដែលក្រុងព្យុងយ៉ាងបានផ្អាកធ្វើការសាកល្បងនុយក្លេអ៊ែរនិងកាំជ្រួច។
ប្រភពខាងលើបញ្ជាក់បន្ថែមថា លោក Ri Yong Ho បានលើកសំណើបែបនេះក្នុងជំនួបជាមួយសមភាគីនៃប្រទេសជាសមាជិកអាស៊ាននៅសិង្ហបុរី។ លោកធ្វើការចោទសួរថា ហេតុអ្វីបានជាវិធានការដាក់ទណ្ឌកម្មរបស់យូអិននៅពុំទាន់បានបន្ធូរបន្ថយទោះបីជាបញ្ហានុយក្លេអ៊ែររបស់កូរ៉េខាងជើងកំពុងមាន«ការរីកចម្រើន»ទៅមុខ។
ប្រមុខការទូតរូបនេះនិយាយថា លោកនឹងលើកបញ្ហានេះនៅវេទិកាតំបន់ (ARF), ដែលរួមមានប្រទេសសមាជិកគឺអាមេរិក ជប៉ុន កូរ៉េខាងត្បូង ចិននិងរុស្ស៊ី។តាមលោក កូរ៉េខាងជើងប៉ងប្រាថ្នាឱ្យបណ្ដាប្រទេសផ្សេងទៀតជួយលុបចោលវិធានការដាក់ទណ្ឌកម្មរបស់ UN សំដៅលើក្រុងព្យុងយ៉ាង។
នៅថ្ងៃដដែល ប្រភពព័ត៌មានមួយពីរដ្ឋាភិបាលជប៉ុនឱ្យដឹងថា ប្រមុខការទូតជប៉ុនTaro Kono កំពុងប្រឹងប្រែងដើម្បីមានជំនួប ជាមួយសមភាគីកូរ៉េខាងជើងផងដែរ ក្នុងពេលដែលប្រមុខការទូតរបស់ប្រទេសដទៃកំពុងមានផែនការជួបទ្វេភាគីជាមួយលោក Ri Yong Ho ។
គួររំលឹកថា នាយករដ្ឋមន្ដ្រីជប៉ុន Shinzo Abe បានត្រៀមខ្លួនចរចាផ្ទាល់ជាមួយមេដឹកនាំកូរ៉េខាងKim Jong-un ៕
សូយន