ព្រះសីហនុ៖ លោក យន្ត មីន អភិបាល នៃគណៈអភិបាលខេត្តព្រះសីហនុ នៅថ្ងៃចន្ទ ទី២០ ខែវិច្ឆិកា ឆ្នាំ២០១៧ បានទទួលស្វាគមន៍គណៈប្រតិភូមកពីខេត្តជាំងស៊ី នៃសាធារណៈរដ្ឋប្រជាមានិតចិន ដោយបានលើកឡើងអំពីសក្តានុពលវិស័យទេសចរណ៍ នាមូលដ្ឋានជាប់ឆ្នេរសមុទ្រមួយនេះ ជូនគណៈប្រតិភូចិន បានស្គាល់ និងស្នើជួយផ្សព្វផ្សាយបន្តទៅកាន់ប្រជាជនចិន ពិសេសអ្នកវិនិយោគទុន អោយងាកមកចាប់អារម្មណ៍ខេត្តព្រះសីហនុ អោយបានទូលំទូលាយថែមទៀត។
នាឱកាសនោះ លោកអភិបាល បានរៀបរាប់អំពីសក្តានុពលលើគ្រប់វិស័យ នាមូលដ្ឋានខេត្តព្រះសីហនុ ជាពិសេសអំពីសក្តានុពលវិស័យទេសចរណ៍ និងកំពង់ផែអន្តរជាតិដ៏ធំ ដែលអំណោយផលដល់ការងារវិនិយោគ។
ព្រមជាមួយគ្នានោះដែរ លោក សុង បាវឡាង លេខាធិការងក្រុង ណានឆាង បានបង្ហាញទឹកចិត្តរីករាយ ចំពោះការទទួលស្វាគមន៍ និងបានរៀបរាប់អំពីសក្តានុពលខេត្តជាំង ស៊ី ជាពិសេសក្រុង ណានឆាង ដ៏សម្បូរបែប ជូនមន្ត្រីថ្នាក់ដឹកនាំខេត្តព្រះសីហនុ បានសិក្សាស្វែងយល់ អំពីសកម្មភាពនៃការវិនិយោគរបស់អ្នកវិនិយោគ ខេត្តជាំងស៊ី ដែលបានមកវិនិយោគនៅប្រទេសកម្ពុជា នាពេលកន្លងទៅ និងតទៅថ្ងៃខាងមុខទៀត។
នាឱកាសនោះដែរ ប្រតិភូចិន ក៏បានលើកទឹកចិត្តដល់ក្រុមហ៊ុនវិនិយោគខេត្ត ជាំង ស៊ី និងក្រុងណានឆាង អោយមកវិនិយោគ នៅកម្ពុជា ជាពិសេសខេត្តព្រះសីហនុ លើវិស័យផ្សេងៗ រួមមានវិស័យទេសចរណ៍ជាដើម អោយបានច្រើនថែមនាថ្ងៃអនាគត។ ជាងនេះទៀត ក៏បានសន្យាថា នឹងបង្កើនទំនាក់ទំនង និងធ្វើកិច្ចសហប្រតិបត្តិការលើគ្រប់វិស័យ រវាងខេត្តព្រះសីហនុ ជាមួយខេត្តជាំងស៊ី។
ឆ្លើយតបបញ្ហានេះ លោក យន្ត មីន អភិបាលខេត្តព្រះសីហនុ មានប្រសាសន៍តបទៅកាន់គណៈប្រតិភូចិនថា ក្នុងនាមរដ្ឋបាលខេត្ត សូមស្វាគមន៍ជានិច្ច នូវរាល់កិច្ចសហប្រតិបត្តិការ និងការចងសម្ព័ន្ធភាព រវាងខេត្តព្រះសីហនុ ជាមួយខេត្តជាំងស៊ី ដើម្បីអោយប្រទេសកម្ពុជា-ចិន កាន់តែមានទំនាក់ទំនងល្អជាមួយគ្នា អោយបានស្អិតរមួតថែមទៀតនាថ្ងៃអនាគត៕ ដោយ៖ ដែន សីមា
