ភ្នំពេញ ៖ បាក់ច្រាំងទន្លេ នៅក្រុមទី២ ភូមិព្រែកតាគង់ សង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ បណ្តាលឲ្យខូចខាងយ៉ាងធ្ងន់ធ្ងរ បង្កប៉ះពាល់ដល់ផ្លូវមួយខ្សែ មិនអាចធ្វើដំណើរបាន។ ពាក់ព័ន្ធករណីនេះ លោកអភិបាលរាជធានីភ្នំពេញ បានណែនាំជាបន្ទាន់ ឱ្យមន្ត្រីជំនាញពាក់ព័ន្ធ ជាពិសេសអាជ្ញាធរដែន ត្រូវធ្វើការស្ថាបនាឡើងវិញ ជាបន្ទាន់នៅកំណាត់ផ្លូវមួយខ្សែ ដែលទទួលរងការខូចខាត ដោយបាក់ផ្តាច់ដោយសារទឹកជំនន់ទន្លេសាបនាប៉ុន្មានថ្ងៃកន្លងមកនេះ។
លោក ឃួង ស្រេង អភិបាលរាជធានីភ្នំពេញ កាលពីព្រឹកថ្ងៃទី៤ ខែសីហា ឆ្នាំ២០១៨នេះ បានដឹកនាំអាជ្ញាធរដែនដី និងមន្ត្រីជំនាញក្រោមឱវាទ ចុះទៅពិនិត្យមើលស្ថានភាពជាក់ស្តែង នៃការបាក់ច្រាំងទន្លេនេះ។
លោក ឃួង ស្រេង ក្នុងឱកាសនោះ បានសម្តែងការសោកស្តាយ ជាមួយបងប្អូនប្រជាពលរដ្ឋ ជុំវិញគ្រោះធម្មជាតិ ដែលបណ្តាលឱ្យបាក់ផ្តាច់ផ្លូវខាងលើនេះ ប៉ុន្តែទោះជាយ៉ាងណាក្តីជាការឆ្លើយតប លោកអភិបាលរាជធានី បានសន្យាថា នឹងស្ថាបនាផ្លូវដែលបាក់នេះឱ្យបានឆាប់ ដើម្បីប្រើប្រាស់ជាបណ្តោះអាសន្ន ។ ជុំវិញការងារនេះ លោកអភិបាលបានជំរុញឱ្យមន្ទីរពាក់ព័ន្ធ ពិសេសមន្ទីរសាធារណការ និងដឹកជញ្ជូនរាជធានីភ្នំពេញ នឹងមន្ទីរធនធានទឹកនិងឧតុនិយម ពិនិត្យនិងសិក្សាឱ្យបានហ្មត់ចត់ មុននឹងចាក់ថ្មធ្វើគ្រឹះចាក់ដីបំពេញច្រាំងបាក់នេះឡើងវិញ។
លោកបានបញ្ជាក់ថា ការស្ថាបនាលប់ច្រាំងទន្លេដែលបាក់នេះ ធ្វើឡើងជាបណ្តោះអាសន្ន សំខាន់ទប់កុំឱ្យបាក់បន្ត និងមួយវិញទៀត គឺអាចឱ្យប្រជាពលរដ្ឋអាចធ្វើដំណើរ បានជាបណ្តោះអាសន្ន ព្រោះប្រជាពលរដ្ឋនៅក្នុងតំបន់នេះ ប្រាស្រ័យតែផ្លូវមួយនេះទេ។ នៅរដូវទឹកស្រកខាងមុខនេះ លោកនឹងឱ្យមន្ត្រីជំនាញ ចុះមកសិក្សាបច្ចេកទេសឱ្យបានហ្មត់ចត់ ហើយយើងនឹងអាចបុកស៊ីវផាយ ដើម្បីធ្វើឱ្យផ្លូវនេះរឹងមាំជាប់លាប់តែម្តង។
ប្រជាពលរដ្ឋនៅមូលដ្ឋាន បាននិយាយថា ច្រាំងទន្លេ និងផ្លូវនេះ តែងបាក់ជារៀងរាល់ឆ្នាំ គ្រាន់តែបាក់តិចតួច ហើយអាជ្ញាធរមូលដ្ឋាន តែងតែធ្វើការជួសជុលជាបន្តបន្ទាប់ ប៉ុន្តែឆ្នាំនេះបាក់ខ្លាំង អាជ្ញាធរមូលដ្ឋាន មិនមានលទ្ធភាពជួសជុល ទើបរដ្ឋបាលរាជធានីភ្នំពេញ ធ្វើការជួសជុលឱ្យទាំងស្រុងតែម្តង ។ តំណាងប្រជាពលរដ្ឋរូបនេះ បានអរគុណចំពោះអាជ្ញាធររាជធានីភ្នំពេញ ដែលមកជួយជួសជុលច្រាំងទន្លេ និងស្ថាបនាផ្លូវនេះ ដើម្បីសម្រួលឲ្យប្រជាពលរដ្ឋ បានធ្វើដំណើរចរាចរណ៍បានស្រួល៕ ដោយ ៖ កូឡាប
