ខេត្តស្វាយរៀង ៖ ប្រជាពលរដ្ឋព្រួយបារម្មណ៍អំពីសត្វក្របីគោបាត់ខណៈមានក្រុមហ៊ុននាំក្របីគោចេញទៅប្រទេសវៀតណាមដោយគ្មានការត្រួតពិនិត្យពីមន្ត្រីជំនាញ គឺដឹកតាមរថយន្តយកទៅទម្លាក់តាមព្រំដែនរួចដឹកចេញតាមច្រករបៀងក្នុងមួយថ្ងៃៗ២០ទៅ៣០ក្បាលដោយមានការបើកភ្លើងខៀវពីសមត្ថកិច្ចឈជើងតាមច្រករបៀងទាំងនោះនេះបើតាមការអៈអាងពីសំណាក់ប្រជាពលរដ្ឋនៅតំបន់ជាប់ព្រំដែនប្រទេស វៀតណាម ។
ប្រភពខាងលើបានឱ្យដឹងថាៈជាក់ស្តែងនៅថ្ងៃទី២សីហាឆ្នាំ២០១៨នេះ ឈ្មួញបានដឹកក្របីតាមរថយន្តចំនួន២គ្រឿងមានក្របីប្រមាណជាង២០ក្បាល ចុះត្រង់ចំណុចវត្តតាឡុកស្ថិតនៅភូមិបាវិតកណ្តាលសង្កាត់បាវិតក្រុងបាវិតនោះគឺរថយន្តកូរ៉េ ម៉ាកហ៊ីយិនដាយចំណោះ២តោនកន្លះ ពាក់ស្លាកលេខភ្នំពេញ 3B 0348 និងរថយន្ត១គ្រឿងទៀតម៉ាកហ៊ីយិនដាយចំណុះ២តោនកន្លះដូចគ្នាពណ៍ស មិនបានឃើញស្លាកលេខ។
ទាក់ទិនករណីឈ្មួញនាំក្របីចេញទៅប្រទេសវៀតណាមនេះ មន្ត្រី ការិយាល័យផលិតកម្មនិងបសុព្យាបាលនៃមន្ទីរកសិកម្មរុក្ខាប្រម៉ាញ់និងនេសាទខេត្តស្វាយរៀងមានប្រសាសន៍ប្រាប់ក្រុមអ្នកសារព័ត៍មានថា៖ បញ្ហាឈ្មួញនាំក្របីចេញទៅប្រទេសវៀតណាមតាមច្រករបៀងវត្តតាឡុកក្រុងបាវិតនេះលោកមិនបានដឹងទេ។ កន្លងមកមានក្រុមហ៊ុនយុវពាណិជ្ជ ដោយមាន អ្នកគ្រប់គ្រងនាំក្របីឆ្លងកាត់ និងគ្រប់គ្រងប្រមូលទិញ គោនិងក្របី ផ្គត់ផ្គង់ទីផ្សារក្នុងស្រុកឬឡដ៌សត្តឃាតក្នុងខេត្តតែប៉ុណ្ណោះរឿងនាំក្របីគោចេញលោកអត់បានដឹងនោះទេ។
ពាក់ពន្ធ័ករណីនាំក្របីគោចេញទៅប្រទេសវៀតណាមនេះដែរ ខាង តំណាងក្រុមហ៊ុនយុវពាណិជ្ជ បានឲ្យដឹងថា៖ បញ្ហាច្បាប់ទម្លាប់លោកមិនសូវដឹងទេ លោកគ្រាន់តែមើលការងារឲ្យក្រុមហ៊ុននាំក្របីឆ្លងកាត់ រីឯក្របី គោ ក្នុងខេត្តស្វាយរៀងគឺមាន អាជីវករដើរប្រមូលទិញ តាមភូមិស្រុកផ្គត់ផ្គង់ទីផ្សារក្នុងស្រុក ហើយលើសពីការផ្គត់ផ្គង់ក្នុងស្រុក អជីវករបានសុំ នាំចេញ ទៅលក់នៅប្រទេសវៀតណាម ពី១០ក្បាលទៅ២០ក្បាលលោកក៏ជួយសម្រួលអោយទៅ ។
ចំណែកអាជីវករនៅភូមិព្រៃផ្តៅ សង្កាត់បាវិតក្រុងបាវិតបាននិយាយថា៖ ពួកគេប្រមូលទិញក្របីគោពីប្រជាពលរដ្ឋលក់ឲ្យវៀតណាមគេមកទិញដល់ក្រោល ហើយជួលរថយន្តខ្មែរដឹកទៅទម្លាក់នៅតាមព្រំដែន ដោយបង់ឲ្យខាងក្រុមអ្នកដើរប្រមូលទិញ ក្របីតូច១ក្បាល៥ម៉ឺនរៀល ក្របីធំ ១ក្បាល១០ម៉ឺនរៀល ក្នុងនោះវៀតណាមក៏បានបង់ឲ្យសមត្ថកិច្ចយាមនៅច្រករបៀងនិងពេទ្យសត្វផងដែរ ក៏ប៉ុន្តែមិនដឹង១ក្បាលបង់ប៉ុន្មាននោះទេ។
ដោយឡែកនាពេលកន្លងមកក៍មានប្រជាពលរដ្ឋជនរងគ្រោះឈ្មោះ លឹម ពិសិដ្ឋ ភេទស្រី អាយុ៤០ឆ្នាំនៅភូមិថ្នល់កែងឃុំកណ្តៀងរាយស្រុកស្វាយទាបបានឲ្យដឹងថា៖ កាលពីថ្ងៃទី០៣ខែកក្កដាឆ្នាំ ២០១៨ វេលាម៉ោង២រសៀល មានករណីចោរលួចគោរបស់គាត់មួយក្បាលដែលចងឲ្យស៊ីស្មៅនៅវាលស្រែខាងក្រោយផ្ទះចម្ងាយ២០០ម៉ែត្រ យកទៅបាត់ក្រោយមកស្រាប់តែឃើញគេដឹកតាមរ៉ឺម៉កក៏នាំគ្នាជិះម៉ូតូដេញតាមរហូតដល់ខាងមុខរោងចក្រសានតុងស្ថិតនៅភូមិជ្រៃធំសង្កាត់ព្រៃអង្គុញក្រុងបាវិតទើបស្ទាក់ចាប់បាន ជនសង្ស័យឈ្មោះ ប៉ុន វុន ភេទប្រុស អាយុ៧៦ឆ្នាំមានទីលំនៅភូមិដើមពោធិឃុំស្វាយតាយានស្រុកកំពង់រោទ៌ បានប្រគល់ឲ្យសមត្ថកិច្ចសង្កាត់ព្រៃអង្គុញដោះស្រាយ ក៏ប៉ុន្តែសមត្ថកិច្ចនគបាលព្រៃអង្គុញបញ្ជូនជនសង្ស័យទៅឃុំស្វាយតាយានមកធ្វើការសាកសួរ ជនសង្ស័យបានឆ្លើយថា៖ គេគ្រាន់តែជាអ្នកដឹកស៊ីឈ្នួលឲ្យក្រុមហ៊ុននោះទេ សមត្ថកិច្ចកំពុងស្រាវជ្រាវបន្តហើយកន្លងមកគោក្របីប្រជាពលរដ្ឋបាត់រកមិនឃើញទេ ដូច្នេះប្រជាពលរដ្ឋមានការព្រួយបារម្មណ៍យ៉ាងខ្លាំងអំពីសុវត្ថិភាពគោក្របី ពួកគាត់ដោយមានឈ្មួញដើរប្រមូលទិញគោក្របីទៅប្រទេស វៀតណាមនេះយកផ្លាកក្រុមហ៊ុនមកលួចលាក់ប្រមូលទិញគោក្របីពីអ្នកស្រុក រីឯចោរឆ្លៀតឱកាសលួចគោក្របីអ្នកស្រុកទាំងថ្ងៃនាំទៅវៀតណាម។
ចំណែកមន្ត្រីម្នាក់សុំមិនបញ្ចេញឈ្មោះបានបង្ហើបឲ្យដឹងថា៖ សមត្ថកិច្ចតាមច្រករបៀងមិនហ៊ានជាមួយតំណាងក្រុមហ៊ុនទេគេនិយាយយកឈ្មោះអ្នកធំៗមកលាបទើបសមត្ថកិច្ចសុំតែលុយបាយមួយក្បាល៥ម៉ឺនដុងប្រាក់វៀតណាមប៉ុណ្ណោះដើម្បីកាត់បន្ថយភាពក្រីក្របានមួយគ្រាផងដែរ៕ វ៉ៃកូ
