ម្តាយរបស់មេភេរវកម្ម Osama Binladen ពុំបានទម្លាក់កំហុសឲ្យកូនប្រុសខ្លួន ដែលបានបង្កឲ្យមានព្រឹត្តិការណ៍រញ្ជួយពិភពលោក ថ្ងៃទី ១១ ខែកញ្ញាទេ តែថា នេះដោយសារត្រូវបានគេ “លាងសម្អាតខ្លួន” ។
អ្នកស្រី Ghamen ម្តាយរបស់ Osama Binladen ពេលនេះ អាយុជាង ៧០ឆ្នាំហើយ ។
តាម Daily Star Osama Bin Laden ធ្លាប់ជាមេភេរវករ ។ ត្រូវបានគេតាមប្រមាញ់ខ្លាំងជាងគេបំផុត លើពិភពលោកក្រោយព្រឹត្តិការណ៍ថ្ងៃទី ១១ ខែកញ្ញា បណ្តាលឲ្យមនុស្សជិត ៣.០០០នាក់ ស្លាប់ នៅអាមេរិក ។
មេភេរវកររូបនេះ ត្រូវបានកម្ចាត់នៅឆ្នាំ ២០១១ ដោយកងកុម្ម៉ង់ដូរអាមេរិក ប៉ុន្តែយ៉ាងនេះក្តីក៏ពលរដ្ឋជាច្រើនលើពិភពលោកនៅតែពុំអាចបំភ្លេចបាននូវអ្វីៗ ដែល Bin Laden បានបង្កឡើង ។
ក្រុមគ្រួសាររបស់ Bin Laden បច្ចុប្បន្នរស់នៅ Jeddah ទីក្រុងមួយនៅអារ៉ាប់ប៊ីសាអូឌីត ។ វង្សត្រកូលនេះ ជាកំពូលអ្នកមាន ហើយបានរួមវិភាគទានមិនតិចតួចទេ ក្នុងការស្ថាបនាទឹកដីនេះ នាសម័យទំនើបបច្ចុប្បន្ន ។
អ្នកស្រី Alia Ghamen ម្តាយរបស់ប៊ីនឡាដិន មានអាយុជាង ៧០ឆ្នាំហើយ ហើយថ្មីៗនេះ បានឆ្លើយតបជាមួយកិច្ចសម្ភាសន៍របស់កាសែត Guardian បន្ទាប់ពីមានការអនុញ្ញាតរបស់រាជទាយាទ ប្រទេសនេះព្រះអង្គម្ចាស់ Mohammed bin Salman ។ អ្នកស្រីបានពណ៌នាថា “កូនប្រុសគួរឲ្យស្រឡាញ់” របស់ខ្លួន បានវង្វេងផ្លូវជ្រុលហួស ។
អ្នកស្រី Alia អង្គុយក្បែរកូនប្រុស Ahmad
អ្នកស្រី Alia ពោល ៖ “ជីវិតរបស់ខ្ញុំពិបាកខ្លាំងណាស់ ! កូនប្រុសរបស់ខ្ញុំតែងនៅឆ្ងាយ ។ វាជាក្មេងល្អ ហើយស្រឡាញ់ម្តាយរបស់ខ្លួនខ្លាំងណាស់!” ប៉ុន្តែវាត្រូវបានគេ “លាងខួរ” ពេលទៅរៀននៅ Jeddah អារ៉ាប់ប៊ីសាអូឌីត ។
ក្រោយមក Bin Laden បានទៅអាហ្វហ្គានីស្ថាន ដើម្បីប្រយុទ្ធប្រឆាំងនឹងរុស្ស៊ី ។
អ្នកស្រី Alia ពោលបន្ត ៖ “ពួកអ្នកនៅសកលវិទ្យាល័យបានធ្វើឲ្យប្រែប្រួល Bin Laden ក្មេងប្រុសនេះបានក្លាយជាមនុស្សម្នាក់ផ្សេង”។ “វាគឺជាក្មេងម្នាក់ល្អមុនពេលជួបពួកអ្នកទាំងនោះក្នុងវ័យជាងម្ភៃឆ្នាំ ។ ពួកទាំងនោះដូចជានិកាយសាសនាមួយអីចឹង!” ។
អ្នកស្រីសង្កត់ធ្ងន់ថា ៖ “ខ្ញុំតែងរំលឹកវាឲ្យចៀសចេញឆ្ងាយពីពួកគេ តែវាពុំបាននិយាយអ្វីប្រាប់ខ្ញុំពីការងារដែលវាធ្វើឡើយ ព្រោះតែខ្លាចខ្ញុំខឹង !” ។
Osama Bin Laden មេក្លោងភេរវកម្ម ត្រូវបានគេតាមប្រមាញ់ខ្លាំងជាងគេលើលោក ។
រំលឹកពីចរិកកូនប្រុសខ្លួន (Bin Laden) អ្នកស្រីនិយាយថា ៖ វាជាមនុស្សមានចរិតនិយាយត្រង់ៗពេលទៅរៀន ហើយរៀនយ៉ាងព្យាយាម ។ លើកចុងក្រោយដែលអ្នកស្រីបានឃើញ Bin Laden គឺនៅឆ្នាំ ១៩៩៩ ពេលដែលទៅរកកូននៅអាហ្វហ្គានីស្ថាន ។
ចំណែកប្អូនរបស់ Bin Laden គឺ Ahmad វិញបែរជានិយាយរឿងមួយផ្សេង ហើយថាម្តាយរបស់ខ្លួនសំឡឹងឃើញតែចំណុចល្អរបស់ Binladen ប៉ុណ្ណោះ ។
Ahmad ពោល ៖ “គាត់ស្រឡាញ់កូនប្រុសខ្លាំងណាស់ ហើយតែងបញ្ចៀសការនិយាយទម្លាក់កំហុសឲ្យកូន ។ គាត់ទម្លាក់កំហុសឲ្យទៅអ្នកនៅជុំវិញកូន” ។
“គាត់ពុំដែឡបានដឹងអ្វីពីរឿងខ្មៅងងឹតពាក់កណ្តាលក្នុងខួរក្បាលរបស់ Bin Laden សោះឡើយ” ៕ ចន្ទ្រា