ប៉ុន្មានថ្ងៃមុននេះ មានហេតុការណ៍បង្កឡើងដោយយុវជន “ពាល” មួយក្រុម បាននាំគ្នាយកស៊ុត និងម្សៅមី គប់លើស្ត្រីពិការម្នាក់ នៅឧទ្យាន Suffolk ប្រទេសអង់គ្លេសធ្វើឲ្យបណ្តាញសង្គមប្រទេសនេះផ្ទុះកំហឹងតាមរកមុខដើម… ចាត់ការ ។
រូបភាពត្រូវបានពួកក្មេងពាលទាំងនោះបង្ហោះឡើងបណ្តាញសង្គម ហាក់ដូចជាដើម្បីអបអរ “ស្មាដៃ” ដែលខ្លាចគេបានវាយឈ្នះលើស្ត្រីគ្មាន… លទ្ធភាពការពារខ្លួនម្នាក់ ។
ភ្លាមៗនោះពលរដ្ឋក្នុងតំបន់ រួមទាំងលោក Robin Arms បានបន្លឺសំឡេងថា ៖ យើងនឹងប្រដៅពួកឯង! ។
ក្មេងពាលទាំង ៤នាក់ ត្រូវបានប៉ូលិសចាប់ខ្លួននៅថ្ងៃទី ២៧ ខែកក្កដា កន្លងមក តែពុំបង្ហាញអត្តសញ្ញាណ (នៅអនីតិជន) ប៉ុន្តែឈ្មោះរបស់ពួកគេ បានបែកធ្លាយចេញលើបណ្តាញសង្គម ។ ក្មេងពាលម្នាក់ថែមទាំងជិតរៀបចំបុណ្យកំណើតលើកទី… ១៦ ទៀតផង ហើយតាមម្តាយក្មេងនជ គឺព្រឹត្តិការណ៍ខាងលើបានបំផ្លាញ… បុណ្យកំណើតរបស់វាបាត់ហើយ ។
អ្នកស្រីបានប្រាប់កាសែត Daily Mail ថា … ឈ្មោះរបស់កូនប្រុសខ្ញុំ បានបែកធ្លាយចេញហើយ ហើយវាក៏កំពុងទទួលនូវការគំរាមកំហែង ។ ខ្ញុំបានរាយការណ៍រឿងនេះ ប្រាប់ប៉ូលិស ហើយបណ្តោះអាសន្ន ប៉ូលិសកំពុងការពារគ្រួសាររបស់ខ្ញុំ ។ ក្រៅពីនោះវាក៏នៅមានខ្សែទូរស័ព្ទពិសេសមួយទៀត សម្រាប់គ្រាមានអាសន្ន ។
ឪពុករបស់ក្មេងពាលម្នាក់ ដែលដើរតួនាទី ជាអ្នកថតរូបបាននាំកូនចេញទៅសារភាពនៅប៉ុស្តិ៍ប៉ូលិស ។ គាត់ក៏និយាយថា ពិតជាមានការគំរាមកំហែងដល់អាយុជីវិតរបស់កូនខ្លួន ក៏ដូចជាក្រុម “ពាល” របស់ពួកវា ។ ពេលនេះវាបង្ខំចិត្ត ត្រូវស្ថិតនៅក្នុងផ្ទះ ដើម្បី… ធានាអាយុជីវិត ។
ប្រយ័ត្នណា! អ្នកសាបខ្យល់ ត្រូវតែច្រូតយក… ព្យុះ!
ចន្ទ្រា
