ភ្នំពេញ ៖ អគ្គិភ័យឆេះផ្ទះប្រជាពលរដ្ឋនៅ សង្កាត់ស្វាយប៉ាក ខណ្ឌឫស្សីកែវ អស់២ខ្នង សមត្ថកិច្ចបញ្ចេញឡានទឹក៣១គ្រឿង ទៅជួយអន្ដរាគមន៍ បានរលត់ទៅវិញ នៅវេលាម៉ោងប្រមាណ៩៖៣០នាទីយប់ ថ្ងៃទី៤ ខែសីហា ឆ្នាំ២០១៨នេះ ។
លោកឧត្តមសេនីយ៍ទោ នេត វន្ថា ប្រធាននាយកដ្ឋានបង្ការ និងពន្លត់អគ្គិភ័យ នៃក្រសួងមហាផ្ទៃ បានប្រាប់ឲ្យដឹងថា អគ្គិភ័យបានបំផ្លាញផ្ទះទាំងស្រុងអស់ចំនួន២ខ្នង ប៉ុន្ដែមិនបណ្ដាលឲ្យពលរដ្ឋម្នាក់ណារងគ្រោះថ្នាក់នោះទេ។ រថយន្ដពន្លត់អគ្គិភ័យចំនួន៣១គ្រឿង ត្រូវបានបញ្ចេញមកជួយសង្គ្រោះ ប៉ុន្ដែបាញ់បានតែ៨គ្រឿងប៉ុណ្ណោះ អគ្គិភ័យនេះក៏រលត់ ដោយមិនបង្កគ្រោះថ្នាក់កាន់តែធ្ងន់ធ្ងរនោះទេ។ សម្រាប់មូលហេតុដែលនាំឲ្យមានករណីអគ្គិភ័យ គេមិនទាន់ច្បាស់នៅឡើយទេ។
លោកវរសេនីយ៍ឯក ទៀង ច័ន្ទសារ អធិការនគរបាលខណ្ឌឫស្សីកែវ បានឲ្យដឹងថា អគ្គិភ័យឆេះផ្ទះប្រជាពលរដ្ឋអស់ចំនួន២ខ្នង នៅថ្ងៃសៅរ៍ ទី៤ ខែសីហា ឆ្នាំ២០១៨ វេលាម៉ោង២០ និង០៥នាទី នៅចំណុចក្រុមទី៨ ភូមិឡលូ សង្កាត់ស្វាយប៉ាក ខណ្ឌឫស្សីកែវ។ លោកអធិការបន្តថាផ្ទះរងគ្រោះទី១-ឈ្មោះឡេយ៉ាំងទៀង ភេទប្រុស អាយុប្រហែល៤៩ឆ្នាំ ជនជាតិវៀតណាម បុខរបរមិនពិតប្រាកដ (ឆេះចេញដំបូង) ផ្ទះឈើប្រក់ស័ង្កសី និងទី២-ម្ចាស់ផ្ទះឈ្មោះ ឱម វាន់ថា ភេទប្រុស អាយុ ៥០ឆ្នាំ ជនជាតិខ្មែរ មុខរបររត់ម៉ូតូរ៉ឺម៉កកង់បី ទីលំនៅកន្លែងកើតហេតុផ្ទះលេខ៥១៩C ផ្ទះឈើប្រក់ស័ង្កសីទំហំ៤x៩ម៉ែត្រ ឆេះទាំងស្រុង និងអណ្តាតភ្លើងរោលចំនួន ៣ផ្ទះ (មិនបណ្តាលឱ្យខូចខាតទេ)៕ ដោយ ៖ បញ្ញាស័ក្តិ