វាជាទម្លាប់ធម្មតាមួយសម្រាប់ស្ត្រីទាំងឡាយ ដែលតែងឡើងផ្សារ ដើម្បីទិញសម្លៀកបំពាក់ពីហាងសម្លៀកបំពាក់ល្បីៗ ។ ទោះយ៉ាងណា ស្ត្រីម្នាក់នៅក្នុងប្រទេសសិង្ហបុរី បានជួបហេតុការណ៍ដ៏អាក្រក់មួយសម្រាប់រូបនាង នៅពេលនាងបានរកឃើញ «ប៊ិច» មួយត្រូវបានដាក់នៅផ្នែកខាងលើនៃមាត់បន្ទប់ផ្លាស់ប្តូរសម្លៀកបំពាក់ ដែលនាងកំពុងសាកនូវសម្លៀកបំពាក់ថ្មីនៅក្នុងនោះ ។
នៅពេលពិនិត្យយ៉ាងល្អិតល្អន់ ស្ត្រីម្នាក់បានរកឃើញថា «ប៊ិច» មួយមានកញ្ចក់កាមេរ៉ាមួយ ដែលមានន័យថាវាជាពិតមានកាមេរ៉ាត្រូវបានបង្កប់នៅក្នុងប៊ិចនោះ ។ នាងបានពន្យល់បន្ថែមនៅក្នុងហ្វេសប៊ុករបស់នាងថា កាមេរ៉ានោះនៅតែកំពុង «ធ្វើការ» នៅពេលនោះ ខណៈពេលនាងបានឃើញ «ភ្លើង flash» និងមានអារម្មណ៍ថាមានកម្តៅចេញពីតួប៊ិចនោះ ។
វាអាចកើតឡើងបាន ចំពោះអ្វីៗដែលនាងបានធ្វើនៅក្នុងបន្ទប់ផ្លាស់ប្តូរសម្លៀកបំពាក់ ដែលត្រូវបានកត់ត្រាដោយ «ប៊ិច» នេះ ។ ដោយផ្ទុះកំហឹងយ៉ាងខ្លាំងពីរឿងនេះ នាងក៏បានប្រញាប់ស្លៀកពាក់ និងយករូបភាពចេញពីក្នុង «ប៊ិច» ហើយចាកចេញពីក្នុងហាងនៃផ្សារទំនើប ដើម្បីរាយការណ៍ទៅប៉ូលីស ។
ទោះយ៉ាងណា នាងត្រូវបានបង្អាក់ដំណើរដោយមនុស្សប្រុសម្នាក់ ក្នុងចំណោមកម្មករជាច្រើននាក់របស់ផ្សារទំនើប ។ នាងបានសរសេរថា៖
«មានតែអ្នកចាំតែម្នាក់គត់ នៅក្នុងហាងនាពេលនោះ ដែលបានរត់មកកាន់ខ្ញុំ ។ គាត់សុំខ្ញុំកុំរាយការណ៍រឿងនេះទៅប៉ូលីស និងនិយាយថា គាត់មានការសោកស្តាយខ្លាំងណាស់» ។
«គាត់សុំខ្ញុំកុំរាយការណ៍ទៅប៉ូលីស ព្រោះជីវិតរបស់គាត់ នឹងត្រូវបានបំផ្លាញ ប្រសិនរឿងនេះត្រូវបានធ្វើឡើង ។ គាត់ក៏បានពន្យល់ថា គាត់បានជំពាក់លុយគេ ហើយឆ្លៀតរកលុយបន្ថែមពីការលក់រូបភាពមិនសមរម្យរបស់ស្ត្រីពីប៊ិចនេះ ដើម្បីបង់បំណុលគេ» ។
«រឿងនេះបានធ្វើឲ្យខ្ញុំកាន់តែខកចិត្ត» ។
ដោយសារតែទប់កំហឹងពុំបាន ស្ត្រីរងគ្រោះពុំលើកលែងទោសឲ្យ ដែលជាហេតុធ្វើឲ្យបុរសមានការអស់សង្ឃឹមរូបនោះ ព្យាយាមកញ្ឆក់ «ប៊ិច» ពីនាងតែម្តង ។
អ្នកទាំងពីរក៏បានប្រតាយប្រតប់គ្នា ហើយបុរសកំហូចនោះក៏បានរុញនាងដួលទៅនឹងកម្រាល បណ្តាលឲ្យនាងរងរបួសជាំនៅលើភ្លៅរបស់នាង ។ បុរសនោះបន្ទាប់មក បានគ្រប់គ្រងចាប់យកបាន «ប៊ិច» និងរត់គេចខ្លួនតែម្តង ។ ដោយមានការជួយពីមនុស្សមួយចំនួននៅទីនោះ ស្ត្រីរងគ្រោះក៏បានរៀបចំរបាយការណ៍ប្តឹងទៅប៉ូលីស ។
តាមសេចក្តីរាយការណ៍របស់ China Press បុរសម្នាក់នោះមានឈ្មោះថា Jia Jun ក៏បានរាយការណ៍រឿងបែបនេះទៅប៉ូលីសនៅក្នុង Johor Bahru ផងដែរ បន្ទាប់ពីរូបភាពរបស់គាត់បានរីករាលនៅលើបណ្តាញសង្គមហ្វេសប៊ុក ។
ចំណែកស្ត្រីរងគ្រោះខាងលើនេះវិញ ក៏បានពន្យល់ថា ហេតុផលដែលនាងចែករំលែកអំពីហេតុការណ៍នេះរបស់នាង ក៏ព្រោះតែនាងចង់ព្រមានដល់ស្ត្រីដទៃ ឲ្យមានការប្រុងប្រយ័ត្ន ជាមួយអ្វីៗនៅជុំវិញខ្លួនរបស់ពួកគេ និងរៀនការពារខ្លួនពួកគេ ៕ ចន្ទី (worldofbuzz)